ୱାଶିଂଟନ୍,୦୫/୧୧: ବିଶ୍ୱର ସବୁଠୁ ଶକ୍ତିଶାଳୀ ରାଷ୍ଟ୍ର ଆମେରିକାରେ ଏଥର ବେଶ୍ ରୋଚକ ହୋଇଛି ରାଷ୍ଟ୍ରପତି ନିର୍ବାଚନ। ଉପରାଷ୍ଟ୍ରପତି ତଥା ଡେମୋକ୍ରାଟ୍ କମଳା ହାରିସ୍ ଏବଂ ପୂର୍ବତନ ରାଷ୍ଟ୍ରପତି ତଥା ରିପବ୍ଲିକାନ୍ ଡୋନାଲ୍ଡ ଟ୍ରମ୍ପ୍ଙ୍କ ମଧ୍ୟରେ ଚାଲିଛି କଡ଼ା ମୁକାବିଲା । ମଙ୍ଗଳବାର ଦେଶରେ ଶେଷ ପର୍ଯ୍ୟାୟ ଭୋଟିଂ ହେବାକୁ ଥିବାବେଳେ ଏଥର କାହା ମୁଣ୍ଡରେ ଆମେରିକାବାସୀ ସୁନାକଳସ ଢାଳୁଛନ୍ତି ତାହା ଉପରେ ସାରା ବିଶ୍ୱର ନଜର । ଏବେ ସବୁ ପ୍ରକାର ଆକଳନ ସ୍ୱିଙ୍ଗ୍ ଷ୍ଟେଟ୍ସ ବା ଝୁଲା ପ୍ରଦେଶ ଉପରେ ଅଟକି ରହିଛି । ଉଭୟ କମଳା ଏବଂ ଟ୍ରମ୍ପ୍ ନିଜର ସବୁ ବଳ ପ୍ରୟୋଗ କରି ସ୍ୱିଙ୍ଗ୍ ଷ୍ଟେଟ୍ସରେ ଜୋରଦାର ପ୍ରଚାର କରିଛନ୍ତି । ଯଦି ଚଳିତ ନିର୍ବାଚନରେ କମଳା ବାଜିମାତ୍ କରନ୍ତି ତେବେ ଆମେରିକା ଭଳି ବିକଶିତ ରାଷ୍ଟ୍ରର ସେ ହେବେ ପ୍ରଥମ ମହିଳା ରାଷ୍ଟ୍ରପତି । ଏପରି କରି ସେ ଆମେରିକା ଇତିହାସରେ ନୂଆ ଫର୍ଦ୍ଦ ଯୋଡ଼ିବେ । ଟ୍ରମ୍ପ୍ ଜିତିଲେ କମଳା ଏହି ରେକର୍ଡ କରିବାରୁ ବଞ୍ଚିତ ହେବେ ଏବଂ ୪୭ତମ ରାଷ୍ଟ୍ରପତି ଭାବେ ଟ୍ରମ୍ପ୍ ନିଜର ଦ୍ୱିତୀୟ ପାଳି କାର୍ଯ୍ୟକାଳ ଆରମ୍ଭ କରିବେ ।
ସୂଚନା ଅନୁସାରେ, ମଙ୍ଗଳବାର ସେଠାକାର ସମୟ ସକାଳ ୬ଟାରୁ ରାତି ୮ଟା ପର୍ଯ୍ୟନ୍ତ ଭୋଟ ଗ୍ରହଣ କରାଯିବ । ଭାରତୀୟ ସମୟ ଅନୁସାରେ ଅପରାହ୍ନ ସାଢ଼େ ୪ଟାରୁ ବୁଧବାର ସକାଳ ସାଢ଼େ ୬ଟା ପର୍ଯ୍ୟନ୍ତ ମତଦାନ ଚାଲିବ । ଏହାର କିଛି ଘଣ୍ଟା ପରେ ହିଁ ଫଳାଫଳ ସାମ୍ନାକୁ ଆସିଯିବ । ତେବେ ଭୋଟଦାନ ପୂର୍ବରୁ ହିଁ ପ୍ରାୟ ସାଢ଼େ ୭ କୋଟି ଲୋକ ଆଗୁଆ ମତଦାନ କରିସାରିଛନ୍ତି । ଆମେରିକା ରାଷ୍ଟ୍ରପତି ନିର୍ବାଚନରେ ଇଲେକ୍ଟୋରାଲ କଲେଜ ପରୋକ୍ଷରେ ବିଜେତାଙ୍କ ସମ୍ପର୍କରେ ନିଷ୍ପତ୍ତି ନେଇଥାଏ । ଏଥିରେ ବିଜୟୀ ହେବାକୁ ହେଲେ ୫୦ ରାଜ୍ୟର ମୋଟ ୫୩୮ ଇଲେକ୍ଟୋରାଲ ଭୋଟ ବା ଇଲେକ୍ଟରଙ୍କ ମଧ୍ୟରୁ ଜଣେ ପ୍ରାର୍ଥୀ ୨୭୦ ଭୋଟ ଆବଶ୍ୟକ କରନ୍ତି ।
ନିର୍ବାଚନରେ ସଭିଁଙ୍କ ନଜର ସ୍ୱିଙ୍ଗ୍ ଷ୍ଟେଟ୍ସ ଉପରେ ରହିଛି । ଏହି ରାଜ୍ୟଗୁଡ଼ିକୁ ବ୍ୟାଟେଲଗ୍ରାଉଣ୍ଡ ବା ଯୁଦ୍ଧକ୍ଷେତ୍ର ବୋଲି ମଧ୍ୟ କୁହାଯାଏ । ଏଥର ଆରିଜୋନା, ନେଭାଡା, ୱିସ୍କନ୍ସିନ୍, ମିଶିଗାନ୍, ପେନ୍ସିଲଭାନିଆ, ନର୍ଥ କାରୋଲିନା ଏବଂ ଜର୍ଜିଆ ସ୍ୱିଙ୍ଗ୍ ଷ୍ଟେଟ୍ ରହିଛନ୍ତି । ଆମେରିକାରେ ଅଧିକାଂଶ ପ୍ରଦେଶ ଏକ ନିର୍ଦ୍ଦିଷ୍ଟ ପାର୍ଟିକୁ ଭୋଟ ଦେଇଥାନ୍ତି । କିନ୍ତୁ ସ୍ୱିଙ୍ଗ୍ ଷ୍ଟେଟ୍ସ୍ଗୁଡ଼ିକ ଯେ କୌଣସି ଦଳ ଆଡ଼କୁ ଢଳିପାରନ୍ତି । ତେଣୁ ଏହି ରାଜ୍ୟଗୁଡ଼ିକରେ ଉଭୟ ଡେମୋକ୍ରାଟ୍ ଏବଂ ରିପବ୍ଲିକାନ୍ ଦଳକୁ କଡ଼ା ମୁକାବିଲାର ସାମ୍ନା କରିବାକୁ ପଡ଼ିବ ।
ଆଟ୍ଲାସ୍ଇଣ୍ଟେଲ୍ ସର୍ଭେ ରିପୋର୍ଟ ଅନୁସାରେ, ଏଠାକାର ୪୯% ଭୋଟର ଟ୍ରମ୍ପ୍ଙ୍କୁ ଭୋଟ ଦେବା ସପକ୍ଷରେ ଅଛନ୍ତି । ଏଠାରେ ଟ୍ରମ୍ପ୍ ପ୍ରତିଦ୍ୱନ୍ଦ୍ୱୀ କମଳାଙ୍କ ତୁଳନାରେ ୧.୮% ଅଧିକ ଭୋଟରେ ଆଗୁଆ ରହିବା ନେଇ ସର୍ଭେ କହୁଛି । ଆଉ ଏକ ସର୍ଭେ ଅନୁସାରେ ମଧ୍ୟ ସମସ୍ତ ୭ ସ୍ୱିଙ୍ଗ୍ ଷ୍ଟେଟ୍ରେ ଟ୍ରମ୍ପ୍ ବିଜୟୀ ହୋଇପାରନ୍ତି । ଆରିଜୋନାରେ ଟ୍ରମ୍ପ୍ଙ୍କ ମାର୍ଜିନ ୫୧.୯% ଥିବାବେଳେ କମଳାଙ୍କ ୪୫.୧% ରହିଛି । ନେଭାଡାରେ ୫୧.୪% ଲୋକ ଟ୍ରମ୍ପ୍ଙ୍କୁ ଭୋଟ ଦେବେ ବୋଲି କହିଥିବା ବେଳେ ୪୫.୯% କମଳାଙ୍କୁ ବାଛିଛନ୍ତି । ନର୍ଥ କାରୋଲିନାରେ ଟ୍ରମ୍ପ୍ ୫୦.୪% ଭୋଟ ପାଇବାକୁ ଥିବାବେଳେ କମଳାଙ୍କୁ ୪୬.୮% ଭୋଟ ମିଳିପାରେ ।
ଡେସ୍ ମେଇନେସ୍ ରେଜିଷ୍ଟର/ମିଡିଆକମ୍ ସର୍ଭେ ରିପୋର୍ଟ ଅନୁସାରେ, କମଳା ଆୟୋୱା ଆସନରେ ଟ୍ରମ୍ପ୍ଙ୍କୁ ହରାଇପାରନ୍ତି । ୨୦୧୬ ଏବଂ ୨୦୨୦ରେ ସେଠାକାର ଭୋଟର ଟ୍ରମ୍ପଙ୍କୁ ସମର୍ଥନ କରିଥିଲେ । ସେଠାକାର ମହିଳା ଭୋଟର କମଳାଙ୍କ ସପକ୍ଷରେ ଭୋଟ ଦେଇପାରନ୍ତି । ଅନ୍ୟପକ୍ଷରେ ନ୍ୟାସନାଲ ଏକ୍ଜିଟ୍ ପୋଲ୍ ଅନୁସାରେ ଟ୍ରମ୍ପ୍ ଏବଂ କମଳାଙ୍କ ମଧ୍ୟରେ କଡ଼ା ମୁକାବିଲା ହେବ ।
ଅକ୍ଟୋବର ୩୦ରୁ ନଭେମ୍ବର ୨ ମଧ୍ୟରେ ହୋଇଥିବା ଏନ୍ବିସି ନ୍ୟୁଜ୍ ପୋଲ୍ ଅନୁସାରେ, ପ୍ରତ୍ୟେକଙ୍କ ଭୋଟ ହାର ୪୯% ରହିବାକୁ ଥିବାବେଳେ ବାକି ୨% ଭୋଟର ଦୁଇ ନେତାଙ୍କ ଭାଗ୍ୟ ନିର୍ଦ୍ଧାରଣ କରିବେ । ୫୦%ରୁ ସାମାନ୍ୟ ଅଧିକ ଭୋଟର ଟ୍ରମ୍ପ୍ଙ୍କ ବିଜୟ ଚାହୁଁଥିବାବେଳେ ୪୯%ରୁ ସାମାନ୍ୟ ଅଧିକ ମତଦାତା କମଳାଙ୍କୁ ଚାହୁଁଥିବା ୟୁଏସ୍ଏ ଟୁଡେ ରିପୋର୍ଟ କହୁଛି । ଏକାଧିକ ସର୍ଭେ ରିପୋର୍ଟରେ ସ୍ୱିଙ୍ଗ୍ ଷ୍ଟେଟ୍ସରେ ମିଶ୍ରିତ ଫଳାଫଳ ରହିଛି । ପେନ୍ସିଲଭାନିଆ, ମିଶିଗାନ୍ରେ କଡ଼ା ଟକ୍କର ହେବ ।
