ସିଙ୍ଗାପୁର,୦୧/୦୬: ଏସିଆର ସନ୍ତୁଳନ ବିଗାଡ଼ିବା ପାଇଁ ପ୍ରସ୍ତୁତି ଚଳାଇଛି ଚୀନ୍ । ୨୦୨୭ ସୁଦ୍ଧା ଏହା ତାଇୱାନ୍କୁ ଦଖଲ କରିନେବ । ଚୀନ୍ର ଏଭଳି କାର୍ଯ୍ୟ ଯୋଗୁ ସମଗ୍ର ବିଶ୍ୱ ପ୍ରଭାବିତ ହେବ । ଆମେରିକାର ପ୍ରତିରକ୍ଷା ମନ୍ତ୍ରୀ ପିଟ୍ ହେଗ୍ସେଥ୍ ଶନିବାର ଏହି ବୟାନ ଦେଇଛନ୍ତି । ଅନ୍ୟପକ୍ଷରେ ଚୀନ୍ ଏହି ଅଭିଯୋଗକୁ ଖଣ୍ଡନ କରିଛି ।
ସିଙ୍ଗାପୁରରେ ଅନୁଷ୍ଠିତ ସାଙ୍ଗରି-ଲା ବକ୍ତୃତା କାର୍ଯ୍ୟକ୍ରମରେ ଆମେରିକା ପ୍ରତିରକ୍ଷା ମନ୍ତ୍ରୀ କହିଛନ୍ତି, ଚୀନ୍ ଯଦି ଜୋର ଜବରଦସ୍ତ ତାଇୱାନକୁ କବ୍ଜା ପାଇଁ ଉଦ୍ୟମ କରେ, ତେବେ ଏହାର ପ୍ରଭାବ ଭାରତ-ପ୍ରଶାନ୍ତ ମହାସାଗର ଅଞ୍ଚଳ ତଥା ସମଗ୍ର ବିଶ୍ୱ ଉପରେ ପଡ଼ିବ । ଚୀନ୍ ସାଇବର ଆକ୍ରମଣ, ପଡ଼ୋଶୀ ଦେଶକୁ ଭୟଭୀତ କରାଇବା ଏବଂ ଦକ୍ଷିଣ ଚୀନ୍ ସାଗରରେ ବେଆଇନ କବ୍ଜା ଭଳି କାର୍ଯ୍ୟ ଜାରି ରଖିଛି। ଚୀନ୍ ଲଗାତର ଭାବେ ତାଇୱାନ ନିକଟରେ ଯୁଦ୍ଧାଭ୍ୟାସ କରୁଛି । ତାଇୱାନ ଉପରେ ବଡ଼ ହମଲା ପାଇଁ ପ୍ରସ୍ତୁତି ଚଳାଇଛି ।
ଚୀନ୍ ପଟୁ ସୃଷ୍ଟି ହୋଇଥିବା ଏହି ବିପଦ ବାସ୍ତବ । ଆମେରିକା ଏବଂ ଏହାର ସହଯୋଗୀ ଦେଶଗୁଡ଼ିକ ଚୀନ୍ର ଆକ୍ରାମକତାର ମିଳିତ ଭାବେ ମୁକାବିଲା କରିବେ । ଚୀନ୍କୁ ରୋକିବା ପାଇଁ ଟ୍ରମ୍ପ୍ ପ୍ରଶାସନ ବ୍ୟବସାୟ ଓ ପ୍ରତିରକ୍ଷା ଉଭୟ ଦିଗରୁ କାର୍ଯ୍ୟ କରୁଛି । ଆମେ ଭାରତ-ପ୍ରଶାନ୍ତ ମହାସାଗର ଅଞ୍ଚଳରେ ଶାନ୍ତି, ସ୍ଥିରତା ଓ ସୁରକ୍ଷା ଚାହୁଁଛୁ । ଭାରତ ସହିତ ଆମେରିକା ପ୍ରତିରକ୍ଷା ସମ୍ପର୍କ ସମ୍ପ୍ରସାରଣ କରୁଛି । ଟାଇଗର ଟ୍ରାୟମ୍ପ୍’ ଭଳି ଯୁଦ୍ଧାଭ୍ୟାସ ଜରିଆରେ ଭାରତ ସହ ଆମେରିକାର ସୁରକ୍ଷା ତଥା ରଣନୀତିକ ସହଯୋଗିତା ବୃଦ୍ଧି ପାଇବ ।ଏହାବ୍ୟତୀତ କ୍ୱାଡ୍ ଦେଶ ମଧ୍ୟରେ ଆହୁରି ସମନ୍ୱୟ ଲୋଡ଼ା ବୋଲି ହେଗ୍ସେଥ କହିଛନ୍ତି ।
ସିଙ୍ଗାପୁରରେ ଥିବା ଚୀନ୍ ପ୍ରତିନିଧି ଦଳ ହେଗ୍ସେଥଙ୍କ ଦାବିକୁ ଖଣ୍ଡନ କରିଛି । ତାଙ୍କ ଅଭିଯୋଗକୁ ଆଧାରହୀନ ଦର୍ଶାଇଛି । ଚୀନ୍ ପ୍ରତିନିଧି ଦଳର ମୁଖ୍ୟ ହୁ ଗାଙ୍ଗ୍ଫେଙ୍ଗ କହିଛନ୍ତି, କିଛି ଯୁକ୍ତି ତଥ୍ୟାତ୍ମକ ହୋଇପାରେ । କିନ୍ତୁ ଅଧିକାଂଶ ଦାବି ଭିତ୍ତିହୀନ । କିଛି ମାମଲା ‘ଚୋରକୁ ରୋକିବାକୁ ଚୋର କାନ୍ଦୁଥିବା’ ଭଳି ମନେହେଉଛି ।
