ନୂଆଦିଲ୍ଲୀ,୦୨/୦୩: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ହୋଇଥିବା ବିବାଦ ପରେ ଶନିବାର ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ବ୍ରିଟେନ ପ୍ରଧାନମନ୍ତ୍ରୀ କୀର ଷ୍ଟାର୍ମରଙ୍କୁ ଭେଟିଥିଲେ। ୟୁନାଇଟେଡ୍ କିଙ୍ଗଡମ୍ ଏବଂ ୟୁକ୍ରେନ ମିଳିତ ଭାବରେ ୟୁକ୍ରେନର ପ୍ରତିରକ୍ଷା କ୍ଷମତାକୁ ସୁଦୃଢ଼ କରିବା ପାଇଁ ୨.୨୬ ବିଲିୟନ ପାଉଣ୍ଡ ମୂଲ୍ୟର ଏକ ଋଣ ଚୁକ୍ତି ସ୍ୱାକ୍ଷର କରିଛନ୍ତି, ଯାହା ଅସ୍ତ୍ରଶସ୍ତ୍ର ନିର୍ମାଣ ପାଇଁ ବ୍ୟବହୃତ ହେବ। ଏଏଫ୍ପି ରିପୋର୍ଟ ଅନୁଯାୟୀ, ଏହି ସାକ୍ଷାତ ସମୟରେ ବ୍ରିଟେନ ପ୍ରଧାନମନ୍ତ୍ରୀ ପୁଣି ଥରେ ୟୁକ୍ରେନ ପ୍ରତି ତାଙ୍କର ସମର୍ଥନ ଦୋହରାଇଛନ୍ତି ଏବଂ କହିଛନ୍ତି ଯେ, 'ବ୍ରିଟେନ ସବୁବେଳେ ୟୁକ୍ରେନ ସହିତ ରହିବ। ପ୍ରଧାନମନ୍ତ୍ରୀ ଷ୍ଟାରମର କହିଛନ୍ତି ଯେ ଏକ ବାଟ ବାହାରକରାଯିବ, ଯାହା ରୁଷର ଅବୈଧ ଯୁଦ୍ଧର ଅନ୍ତ କରିବ ଏବଂ ସ୍ଥାୟୀ ଶାନ୍ତି ସୁନିଶ୍ଚିତ କରିବ, ଯାହାଦ୍ବାରା ୟୁକ୍ରେନର ଭବିଷ୍ୟତ ସୁରକ୍ଷିତ ରହିବ।
ଏହି ବୈଠକ ସମୟରେ, ଉଭୟ ଦେଶର ଅର୍ଥମନ୍ତ୍ରୀ, ରାହେଲ ରିଭ୍ସ ଏବଂ ସର୍ଜିଓ ମାର୍ଚ୍ଚେଙ୍କୋ, ଋଣ ଚୁକ୍ତିନାମାକୁ ଚୂଡ଼ାନ୍ତ କରିଥିବା ବେଳେ ପ୍ରଧାନମନ୍ତ୍ରୀ କୀର ଷ୍ଟାରମର ଜେଲେନ୍ସକିଙ୍କ ସହ ଆଲୋଚନା କରିଥିଲେ। ଷ୍ଟାରମର ଜେଲେନସ୍କିଙ୍କ ସହ ହୋଇଥିବା ଏହି ଚୁକ୍ତିକୁ ବାସ୍ତବିକ ନ୍ୟାୟ ଭାବରେ ବର୍ଣ୍ଣନା କରିଛନ୍ତି ଏବଂ କହିଛନ୍ତି ଯେ ଯିଏ ଏହି ଯୁଦ୍ଧ ଆରମ୍ଭ କରିଛି ତାକୁ ଏହାର ମୂଲ୍ୟ ଦେବାକୁ ପଡ଼ିବ। ଚୁକ୍ତିନାମା ପରେ, ଜେଲେନସ୍କି ଇନଷ୍ଟାଗ୍ରାମରେ ପୋଷ୍ଟ କରିଛନ୍ତି: “ଲଣ୍ଡନରେ ପ୍ରଧାନମନ୍ତ୍ରୀ କୀର ଷ୍ଟାର୍ମରଙ୍କ ସହ ଏକ ସାର୍ଥକ ଏବଂ ଉଷ୍ମ ବୈଠକ ହୋଇଛି। ଆମର ଆଲୋଚନା ସମୟରେ, ଆମେ ୟୁକ୍ରେନ ଏବଂ ସମଗ୍ର ୟୁରୋପ ସାମ୍ନା କରୁଥିବା ଚ୍ୟାଲେଞ୍ଜ, ଭାଗିଦାରୀମାନଙ୍କ ସହିତ ସମନ୍ୱୟ, ୟୁକ୍ରେନର ସ୍ଥିତିକୁ ସୁଦୃଢ଼ କରିବା ଏବଂ ନ୍ୟାୟପୂର୍ଣ୍ଣ ଶାନ୍ତି ସହିତ ଯୁଦ୍ଧର ଅନ୍ତ କରିବା ପାଇଁ ଠୋସ୍ ପଦକ୍ଷେପ, ଏବଂ ଦୃଢ଼ ସୁରକ୍ଷା ଗ୍ୟାରେଣ୍ଟି ଉପରେ ଆଲୋଚନା କରିଥିଲୁ।
ଜେଲେନ୍ସକି ଆହୁରି ଲେଖିଛନ୍ତି, “ଏହା ପ୍ରଧାନମନ୍ତ୍ରୀଙ୍କ ସମର୍ଥନର ଏକ ନୀତିଗତ ବିବୃତ୍ତି ଏବଂ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଥିଲା। ଆଜି ଆମ ଉପସ୍ଥିତିରେ ୟୁକ୍ରେନ ଏବଂ ବ୍ରିଟେନ ଏକ ଋଣ ଚୁକ୍ତିନାମା ସ୍ୱାକ୍ଷର କରିଛନ୍ତି। ଏହି ଋଣ ୟୁକ୍ରେନର ପ୍ରତିରକ୍ଷା କ୍ଷମତାକୁ ବୃଦ୍ଧି କରିବ ଏବଂ ରୁଷର ଫ୍ରିଜ୍ ହୋଇଥିବା ସମ୍ପତ୍ତିରୁ ରାଜସ୍ୱ ବ୍ୟବହାର କରି ପରିଶୋଧ କରାଯିବ। ଏହି ଟଙ୍କା ୟୁକ୍ରେନରେ ଅସ୍ତ୍ରଶସ୍ତ୍ର ଉତ୍ପାଦନ ପାଇଁ ବ୍ୟବହୃତ ହେବ। ପ୍ରକୃତ ନ୍ୟାୟ ହେଉଛି, ଯିଏ ଯୁଦ୍ଧ ଆରମ୍ଭ କରିଛି ତାକୁ ଏହାର ମୂଲ୍ୟ ଦେବାକୁ ପଡ଼ିବ। ଏହି ଯୁଦ୍ଧ ଆରମ୍ଭରୁ ବ୍ରିଟେନର ଜନତା ଏବଂ ସରକାରଙ୍କଠାରୁ ସେମାନଙ୍କର ବିପୁଳ ସମର୍ଥନ ପାଇଁ ମୁଁ ଧନ୍ୟବାଦ ଜଣାଉଛି। ଆମେ ଏପରି ରଣନୈତିକ ସହଯୋଗୀ ପାଇ ଆନନ୍ଦିତ।'
