ମୁମ୍ବାଇ,୧୮/୧ : ଆଉ ନାହାନ୍ତି ଟେଲିଭିଜନ ଅଭିନେତା ଅମନ୍ ଜୈସ୍ବାଲ । ଟିଭି ସିରିଏଲ 'ଧରତୀପୁତ୍ର ନନ୍ଦିନୀ' ମୁଖ୍ୟ ଅଭିନେତା ଅମନ୍ ଜୈସ୍ବାଲଙ୍କ ଦେହାନ୍ତ ହୋଇଛି । ସଡକ ଦୁର୍ଘଟଣାର ଶିକାର ହୋଇ ମାତ୍ର ୨୩ ବର୍ଷ ବୟସରେ ଦୁନିଆରୁ ବିଦାୟ ନେଇଛନ୍ତି ଅମନ୍ ।
ଶୁକ୍ରବାର ମୁମ୍ବାଇ ଜୋଗେସ୍ବରୀ ୱେଷ୍ଟ ଅଞ୍ଚଳରେ ଅନମଙ୍କର ସଡକ ଦୁର୍ଘଟଣା ହୋଇଥିଲା । ତାଙ୍କ ବାଇକ୍ ଏକ ଟ୍ରକରେ ପିଟି ହୋଇଥିଲା । ପୋଲିସର ସୂଚନା ଅନୁସାରେ ରାତି ପ୍ରାୟ ୩ଟା ୧୫ ହେବ ହିଲ୍ ପାର୍କ ରାଉଣ୍ଡ ନିକଟରେ ସଡକ ଦୁର୍ଘଟଣା ହୋଇଛି । ଅମନ୍ ବାଇକ୍ ଚଲାଇ ଯାଉଥିଲେ । ଏହା ସମୟରେ ତାଙ୍କ ବାଇକକୁ ଧକ୍କା ଦେଇଥିଲା ଏକ ଟ୍ରକ ।
ଦୁର୍ଘଟଣା ସମୟରେ ସେଠାରେ କିଛି ଲୋକ ତାଙ୍କୁ କାମା ହସ୍ପିଟାଲ ଟ୍ରମା ୱାର୍ଡରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୋଲିସ ଟ୍ରକକୁ ଜବତ କରିଛି । ଡ୍ରାଇଭରକୁ ଅଟକ ରଖିଛି ପୋଲିସ । ଅମ୍ବୋଲି ପୋଲିସ ଷ୍ଟେସନରେ ମାମଲା ରୁଜ୍ଜୁ ହୋଇଛି । ଘଟଣାର ତଦନ୍ତ ଚାଲିଛି ।
ଏହା ବି ପଢନ୍ତୁ...ଅସ୍ତ୍ରୋପଚାର ପରେ ଆଇସିୟୁରେ ଭର୍ତ୍ତି ହେଲେ ସୈଫ୍, ଅଭିଯୁକ୍ତକୁ ଚିହ୍ନଟ କଲା ବାନ୍ଦ୍ରା ପୋଲିସ
ଟେଲିଭିଜନ ଅଭିନେତା ଅମନ୍ ଜୈସ୍ବାଲ ' ଧରତୀପୁତ୍ର ନନ୍ଦିନୀ' ସିରିଏଲରେ ମୁଖ୍ୟ ଚରିତ୍ରରେ ନଜର ଆସିଥିଲେ । ସିରିଏଲର ନିର୍ଦ୍ଦେଶକ ଧୀରଜ ମିଶ୍ରା ଅମନଙ୍କ ଦେହାନ୍ତ ହୋଇଥିବା ନେଇ ଇଣ୍ଡିଆ ଟୁଡେକୁ ସୂଚନା ଦେଇଛନ୍ତି । ଅମନଙ୍କ ଶେଷ ଇନଷ୍ଟାଗ୍ରାମ ପୋଷ୍ଟ 'ଧରତୀପୁତ୍ର ନନ୍ଦିନୀ' ସିରିଏଲକୁ ନେଇ ରହିଥିଲା । ସେ ତାଙ୍କ ପୋଷ୍ଟରେ ସିରିଏଲ ଯାତ୍ରା ସମ୍ପର୍କରେ କହିଥିଲେ । ଉତ୍ତରପ୍ରଦେଶ ବଲିଆର ଅମନ୍ 'ଧରତୀପୁତ୍ର ନନ୍ଦିନୀ' ଟିଭି ସିରିଏଲରୁ ବେଶ୍ ପ୍ରଶଂସା ସାଉଁଟି ଥିଲେ । ରବି ଦୁବେ ଓ ସରଗୁନ ଦୁବେଙ୍କ 'ଉଡାରିଆ ' ସିରିଏଲରୁ ଅମନ୍ ଅଭିନୟ କ୍ୟାରିଅର ଆରମ୍ଭ କରିଥିଲେ । ଅମନଙ୍କ ବିୟୋଗ ଖବରରେ ଟେଲିଭିଜନ ଜଗତ ସ୍ତବ୍ଧ ହୋଇଛି । ଏହି ଦୁଃଖଦ ଖବର ମିଳିବା ପରେ ଅମନଙ୍କ ସାଥୀ କଳାକାର ଶୋକ ପ୍ରକାଶ କରିବା ସହିତ ପରିବାରକୁ ଭଗବାନ ଶକ୍ତି ଦିଅନ୍ତୁ ବୋଲି କହିଛନ୍ତି ।
