ନୂଆଦିଲ୍ଲୀ: ଦେଶର ୧୦୮୭ଟି ଟୋଲ୍‌ ପ୍ଲାଜାରୁ ପ୍ରତିଦିନ ୧୬୮ କୋଟି ଆଦାୟ ହେଉଛି । ଲୋକସଭାରେ ଗୁରୁବାର ସାଂସଦ ଦାରୋଗା ପ୍ରସାଦ ସରୋଜଙ୍କ ଏକ ପ୍ରଶ୍ନରେ ଉତ୍ତର ଦେଇଛନ୍ତି ସରକାର । ଏହା ସହ ବୁଧାନପୁରରୁ ଗୋସାଇଁ କି ବଜାର ବାଇପାସ୍ ଏବଂ ଗୋସାଇଁ କି ବଜାର ବାଇପାସରୁ ବାରାଣସୀ ପର୍ଯ୍ୟନ୍ତ ରାସ୍ତା ନିର୍ମାଣରେ ମୋଟ ୫,୭୪୬.୯୭ କୋଟି ଟଙ୍କା ଖର୍ଚ୍ଚ ହୋଇଛି ।  ଏପର୍ଯ୍ୟନ୍ତ ଏହି ରାସ୍ତାରେ ୭୩.୪୭ କୋଟି ଟଙ୍କା ଟୋଲ୍‌ ଆଦାୟ ହୋଇଛି । କେନ୍ଦ୍ର ସଡ଼କ ପରିବହନ ମନ୍ତ୍ରଣାଳୟ ଅନୁସାରେ, ନିୟମ ଅନୁଯାୟୀ ଏକ ବ୍ୟବହାରିକ ଶୁଳ୍କ ଆଦାୟ କରିବା ହିଁ ଟୋଲ୍‌ ଆଦାୟର ଲକ୍ଷ୍ୟ ।  

ଜୁନ୍ ୨୦୨୫ ସୁଦ୍ଧା ମୋଟ ଟୋଲ୍ ପ୍ଲାଜା: ୧,୦୮୭

ଦୈନିକ ଟୋଲ୍ ଆଦାୟ: ୧୬୮.୨୪ କୋଟି ଟଙ୍କା

୨୦୨୪-୨୫ରେ ମୋଟ ଟୋଲ୍ ଆଦାୟ: ୬୧,୪୦୮.୧୫ କୋଟି ଟଙ୍କା

ସାର୍ବଜନୀନ ପାଣ୍ଠି ପ୍ଲାଜା: ୨୮,୮୨୩.୭୪ କୋଟି ଟଙ୍କା

ବେସରକାରୀ ଅପରେଟରମାନଙ୍କ ଦ୍ୱାରା ପରିଚାଳିତ ପ୍ଲାଜା: ୩୨,୫୮୪.୪୧ କୋଟି ଟଙ୍କା

ସରକାର କହିଛନ୍ତି ଯେ, ଜାତୀୟ ରାଜପଥଗୁଡ଼ିକୁ ଟୋଲ୍-ମୁକ୍ତ କରିବାର କୌଣସି ଯୋଜନା ନାହିଁ । ଏହି ଆଦାୟରୁ ରାଜସ୍ୱ କେନ୍ଦ୍ରୀୟ ସମନ୍ୱିତ ପାଣ୍ଠି କୁ ଯାଏ ଏବଂ ସେଥିରୁ ନୂତନ ରାସ୍ତା ନିର୍ମାଣ ଏବଂ ମରାମତି କରାଯାଏ। BOT (ବିଲ୍ଡ-ଅପରେଟ୍-ଟ୍ରାନ୍ସଫର) ପ୍ରକଳ୍ପଗୁଡ଼ିକରେ, ଏକ ନିର୍ଦ୍ଦିଷ୍ଟ ସମୟ ପରେ,ଟୋଲ୍ ସରକାରଙ୍କୁ ହସ୍ତାନ୍ତର କରାଯାଏ । ସାର୍ବଜନୀନ ପାଣ୍ଠି ଦ୍ୱାରା ପରିଚାଳିତ ରାସ୍ତାରେ ଟୋଲ୍ ଆଦାୟ ନିରନ୍ତର ଜାରି ରହିବ ଏବଂ ପ୍ରତିବର୍ଷ ଏହାକୁ ସଂଶୋଧନ କରାଯିବ ।

ରାସ୍ତା ନିର୍ମାଣର ଦୈନିକ ଖର୍ଚ୍ଚ ସମ୍ପର୍କରେ ସରକାର କହିଛନ୍ତି, ‘ନିର୍ମାଣ ଖର୍ଚ୍ଚ ନିର୍ଣ୍ଣୟ କରୁଥିବା କାରକଗୁଡ଼ିକ ହେଉଛି, ଅଞ୍ଚଳର ଭୂଭାଗ, ମାଟି, ଉଚ୍ଚତା, ସେତୁ ନିର୍ମାଣ, ସାମଗ୍ରୀ, ଟ୍ରାଫିକ୍ ଇତ୍ୟାଦି । ଏହା ସହିତ, ସରକାର ଖର୍ଚ୍ଚ ନିର୍ଣ୍ଣୟ କରିବା ପାଇଁ ଏକ ଆଇଟି ଉପକରଣ ତିଆରି କରିଛନ୍ତି । ଯାହା ସମସ୍ତ ବୈଷୟିକ ଇନପୁଟ୍ ନେଇ ଆନୁମାନିକ ଖର୍ଚ୍ଚ ଆକଳନ କରିଥାଏ।’ 

ରାସ୍ତା ନିର୍ମାଣ ପାଇଁ ନାଗରିକଙ୍କଠାରୁ ଟିକସ ଆଦାୟ କରାଯାଏ କି ? ଏହି ପ୍ରଶ୍ନର ଉତ୍ତରରେ ସରକାର କହିଛନ୍ତି, ‘ଏହା ଦୁଇଟି ଉପାୟରେ ସଂଗ୍ରହ କରାଯାଏ । ପ୍ରଥମଟି ହେଉଛି ଉପଭୋକ୍ତା ଫି (ଟୋଲ୍)- ରାଜପଥରେ ଯାତ୍ରା କରୁଥିବା ଲୋକଙ୍କଠାରୁ ଆଦାୟ କରାଯାଏ । ଏହା ଏନଏଚ୍‌ ଫି ନିୟମ, ୨୦୦୮ ଅନୁଯାୟୀ ଆଦାୟ କରାଯାଏ ଏବଂ ଦ୍ୱିତୀୟଟି ହେଉଛି ଇନ୍ଧନ ସେସ୍ । ଅର୍ଥାତ୍ ପେଟ୍ରୋଲ ଏବଂ ଡିଜେଲ ଉପରେ ଲାଗୁ ହୋଇଥିବା ସରଚାର୍ଜ । ଏହି ଟଙ୍କା କେନ୍ଦ୍ରୀୟ ସଡ଼କ ଏବଂ ଭିତ୍ତିଭୂମି ପାଣ୍ଠି (CRIF)କୁ ଯାଏ । ଏହାକୁ ରାଜପଥ, ରେଳ କ୍ରସିଂ, ଗ୍ରାମୀଣ ରାସ୍ତା, ସେତୁ, ବିମାନବନ୍ଦର ଇତ୍ୟାଦିର ବିକାଶ ପାଇଁ ଖର୍ଚ୍ଚ କରାଯାଏ।"