ନୂଆଦିଲ୍ଲୀ: କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଅଭିଯୋଗକୁ ଭିତ୍ତିହୀନ ବୋଲି କହିଛନ୍ତି ନିର୍ବାଚନ ଆୟୋଗ । ଏହା ସହ ନିରପେକ୍ଷ ଭାବରେ କାମ କରିବାକୁ ଆୟୋଗ ପ୍ରତିବଦ୍ଧ ବୋଲି ମଧ୍ୟ କହିଛନ୍ତି । ନିର୍ବାଚନ ଆୟୋଗଙ୍କ ଉପରେ ହେରଫେର ନେଇ ଅଭିଯୋଗ କରିଥିଲେ ରାହୁଲ ଗାନ୍ଧୀ । ଏହା ସହ ଏଥିରେ ସଂପୃକ୍ତ ଥିବା କୌଣସି ଅଧିକାରୀଙ୍କୁ ଛଡ଼ାଯିବନି ଏବଂ ଅବସର ପରେ ବି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରାହୁଲ ଚେତାବନୀ ଦେଇଥିଲେ । ଏହାକୁ ନେଇ ନିଜର କର୍ମଚାରୀଙ୍କୁ ଭିତ୍ତିହୀନ ଅଭିଯୋଗ ଉପରେ ଧ୍ୟାନ ନଦେବାକୁ କହିଛନ୍ତି ନିର୍ବାଚନ କମିଶନ ।
ଏପରି ଭିତ୍ତିହୀନ ଅଭିଯୋଗକୁ ଅଣଦେଖା କରିବା ସହ ପ୍ରତିଦିନ ଧମକ ସତ୍ତ୍ୱେ, ନିରପେକ୍ଷ ଓ ସ୍ୱଚ୍ଛ ଭାବରେ କାର୍ଯ୍ୟ କରିବାକୁ କର୍ମଚାରୀଙ୍କୁ ନିର୍ବାଚନ କମିଶନ ପରାମର୍ଶ ଦେଇଛନ୍ତି । ବିରୋଧୀ ଦଳ ନେତାମାନେ ଭୋଟର ତାଲିକାର ସ୍ୱତନ୍ତ୍ର ବ୍ୟାପକ ସଂଶୋଧନ (ଏସଆଇଆର) ଉପରେ ପ୍ରଶ୍ନ ଉଠାଇଥିଲେ । ଅଭିଯୋଗ କରିଥିଲେ ଯେ, ଏହା ମାଧ୍ୟମରେ ଭୋଟରଙ୍କ ମତଦାନ ଅଧିକାର ଛଡ଼ାଇ ନେବାକୁ ଚେଷ୍ଟା କରାଯାଉଛି । ନିର୍ବାଚନ କମିଶନ ସ୍ପଷ୍ଟ କରିଛନ୍ତି ଯେ, ଭୋଟର ତାଲିକାରେ ସମସ୍ତଙ୍କ ଯୋଗ୍ୟ ଭୋଟରଙ୍କୁ ସାମିଲ କରିବା ଏହାର ଉଦ୍ଦେଶ୍ୟ । ନିର୍ବାଚନ କମିଶନ ଡ୍ରାଫ୍ଟ ଭୋଟର ତାଲିକା ମଧ୍ୟ ପ୍ରକାଶ କରିଛନ୍ତି । ଯେଉଁ ଲୋକମାନଙ୍କର ନାମ ଭୋଟର ତାଲିକାରେ ନାହିଁ, ସେମାନେ ସେପ୍ଟେମ୍ବର ୧ ପର୍ଯ୍ୟନ୍ତ ନିର୍ବାଚନ କମିଶନଙ୍କ ପାଖରେ ନିଜର ଅଭିଯୋଗ ଦାଖଲ କରିପାରିବେ ।
ରାହୁଲ ଗାନ୍ଧୀ କହିଥିଲେ ଯେ, ନିର୍ବାଚନ କମିଶନ ଅନିୟମିତତା କରୁଛନ୍ତି । ସଂସଦ ଭବନରେ ସାମ୍ବାଦିକଙ୍କ ପ୍ରଶ୍ନରେ ସେ କହିଥିଲେ, ଭୋଟ ଚୋରି ହେଉଛି । ଏଥିରେ ନିର୍ବାଚନ କମିଶନ ମଧ୍ୟ ଜଡିତ ଏବଂ ସେ ଦୃଢ଼ ପ୍ରମାଣ ସହିତ ଏହା କହୁଛନ୍ତି । ଏହା ପରେ, ଧମକପୂର୍ଣ୍ଣ ସ୍ୱରରେ ସେ କହିଥିଲେ ଯେ, ଏଥିରେ ଜଡିତ ଅଧିକାରୀମାନଙ୍କୁ ଛଡ଼ାଯିବ ନାହିଁ। ବିଜେପି ଇଙ୍ଗିତରେ ଭୋଟ ଚୋରି କରୁଥିବା ନିର୍ବାଚନ ଅଧିକାରୀମାନେ ଦେଶ ବିରୋଧରେ କାମ କରୁଛନ୍ତି । ଅବସର ନେବା ପରେ ମଧ୍ୟ ସେମାନଙ୍କୁ ଛଡ଼ାଯିବ ନାହିଁ । ରାହୁଲ ଗାନ୍ଧୀ ପୂର୍ବରୁ ମଧ୍ୟ ମହାରାଷ୍ଟ୍ର ଏବଂ ମଧ୍ୟପ୍ରଦେଶ ନିର୍ବାଚନ ସମ୍ପର୍କରେ ନିର୍ବାଚନ କମିଶନଙ୍କ ଭୂମିକା ଉପରେ ପ୍ରଶ୍ନ ଉଠାଇଥିଲେ ।
