ସେଞ୍ଚୁରିୟନ: ସେଞ୍ଚୁରିୟନରେ ଖେଳା ଯାଉଥିବା ତୃତୀୟ ଟି-୨୦ରେ ତିଳକ ବର୍ମାଙ୍କ ଦମଦାର ଶତକ । ପ୍ରଥମେ ବ୍ୟାଟିଂ କରିଥିବା ଭାରତ ତିଳକ ବର୍ମାଙ୍କ ଧୂଆଁଧାର ଶତକ ବଳରେ ୬ ଓ୍ଵିକେଟ୍ ହରାଇ ୨୧୯ ରନର ବିଶାଳ ସ୍କୋର କରିଛି । ତିଳକଙ୍କ ବ୍ୟତୀତ ଅଭିଷେକ ଶର୍ମା ୫୦ ରନର ଅର୍ଦ୍ଧଶତକୀୟ ଇନିଂସ ଖେଳିଛନ୍ତି । ମ୍ୟାଚ୍ ଜିତିବା ପାଇଁ ଘରୋଇ ଦଳ ସାମ୍ନାରେ ୨୨୦ ରନର ବିଶାଳ ବିଜୟ ଲକ୍ଷ୍ୟ ରଖିଛି ଭାରତୀୟ ଦଳ । ତିଳକ ବର୍ମା ନିଜର ଏହି ଇନିଂସରେ ୫୬ ବଲରୁ ୮ ଚୌକା ଓ ୭ ଛକା ସହ ୧୦୭ ରନର ଅପରାଜିତ ଇନିଂସ ଖେଳିଛନ୍ତି । ସେହିଭଳି ଓପନର ଅଭିଷେକ ଶର୍ମେ ୨୫ ବଲରେ ୫୦ ରନ୍ କରିଛନ୍ତି । ସେ ନିଜ ପାଳିରେ ୩ ଚୌକା ଏବଂ ୫ ଛକା ମାରିଛନ୍ତି ।
ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତକୁ ପ୍ରଥମ ଓଭରରୁ ହିଁ ଝଟକା ଲାଗିଥିଲା। ଦ୍ଵିତୀୟ ମ୍ୟାଚ୍ ପରି ତୃତୀୟରେ ବି ଖାତା ଖୋଲି ପାରି ନ ଥିଲେ ସଞ୍ଜୁ ସାମସନ। ଏହା ପରେ ଅଭିଷେକ ଶର୍ମା ଓ ତିଳକ ବର୍ମା ଆରମ୍ଭରୁ ବିସ୍ଫୋରକ ବ୍ୟାଟିଂ କରିଥିଲେ। ଉଭୟ ଘରୋଇ ବୋଲରଙ୍କୁ ପ୍ରହାର କରି ଦ୍ଵିତୀୟ ଓ୍ଵିକେଟ୍ ପାଇଁ ୧୦୭ ରନ ଯୋଡ଼ିଥିଲେ। ଏହି କ୍ରମରେ ଦୁଇ ବ୍ୟାଟର ଅର୍ଦ୍ଧଶତକ ପୂରଣ କରିଥିଲେ। ପ୍ରଥମ ଦୁଇଟି ମ୍ୟାଚରେ ବିଫଳ ହୋଇଥିବା ଅଭିଷେକ ଆଜି ବିସ୍ଫୋରକ ବ୍ୟାଟିଂ କରି ମାତ୍ର ୨୫ ବଲ୍ରୁ ୩ ଚୌକା ଓ ୫ ଛକା ସହ ୫୦ ରନ କରିଥିଲେ ।
ଅଧିନାୟକ ସୂର୍ଯ୍ୟକୁମାର ଯାଦବ କେବଳ ୧ ରନ୍ କରି ଆଉଟ୍ ହୋଇଥିଲେ । ଗୋଟିଏ ପଟେ ତିଳକ କ୍ରିଜରେ ଜମି ରହିଥିବା ବେଳେ ଅନ୍ୟପଟେ ହାର୍ଦ୍ଦିକ ପାଣ୍ଡ୍ୟା ୧୮ ରନ ଓ ରିଙ୍କୁ ସିଂ ୮ ରନ୍ କରି ପ୍ୟାଭିଲିୟନ୍ ଫେରିଥିଲେ । ରମଣଦୀପ ସିଂ ୬ ବଲରୁ ୧୫ ରନ କରିଥିଲେ । ତିଳକ ବର୍ମା ନିଜର ପ୍ରଥମ ଅନ୍ତର୍ଜାତୀୟ ଟି-୨୦ ଶତକ ପୂରଣ କରିବାରେ ସଫଳ ହୋଇଛନ୍ତି ।
