ନୂଆଦିଲ୍ଲୀ: ଭାରତୀୟ ସଶସ୍ତ୍ର ବାହିନୀର ସଦସ୍ୟମାନଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରିଛି ବିମାନ ଚଳାଚଳ କରୁଥିବା ସଂସ୍ଥା ଏୟାର ଇଣ୍ଡିଆ। ଏନେଇ ଏୟାର ଇଣ୍ଡିଆ ସାମାଜିକ ଗଣମାଧ୍ୟମ ଏକ୍ସରେ ଏକ ପୋଷ୍ଟ କରି ଘୋଷଣା କରିଛନ୍ତି ଯେ ଭାରତୀୟ ସଶସ୍ତ୍ର ବାହିନୀର କର୍ମଚାରୀମାନଙ୍କ ପାଇଁ ବିମାନ ଟିକେଟ୍ ରିଶେଡ୍ୟୁଲିଂ ସମ୍ପୂର୍ଣ୍ଣ ମାଗଣା କରାଯିବ। ଏହି ନିଷ୍ପତ୍ତି ‘ଅପରେସନ୍ ସିନ୍ଦୁର’ ପରେ ସୀମାରେ ଉତ୍ତେଜନା ଓ ସେନାର ବ୍ୟାପକ କାର୍ଯ୍ୟକଳାପକୁ ଦୃଷ୍ଟିରେ ରଖି ନିଆଯାଇଛି।
ଖବର ମୁତାବକ, ଗତ ବୁଧବାର ପାକିସ୍ତାନ ଉପରେ ହୋଇଥିବା ଆକ୍ରମଣ ପରେ ପ୍ରତିରକ୍ଷା ମନ୍ତ୍ରଣାଳୟ ସମସ୍ତ ଅର୍ଧ ସାମରିକ ସେନା କର୍ମଚାରୀଙ୍କ ଛୁଟି ବାତିଲ କରିଛି। ଏଣୁ ସଶସ୍ତ୍ର ବାହିନୀର ସଦସ୍ୟମାନେ ଜରୁରୀ କାରଣରୁ ନିଜର ଯାତ୍ରା ସ୍ଥଗିତ କିମ୍ବା ପରିବର୍ତ୍ତନ କରିବାର ଆବଶ୍ୟକତା ରହିଛି। ତେବେ ଏୟାର ଇଣ୍ଡିଆ କିମ୍ୱା ଏୟାର ଇଣ୍ଡିଆ ଏକ୍ସପ୍ରେସରେ ଯାତ୍ରା କରୁଥିବା କିମ୍ୱା ଟିକେଟ ବୁକ କରିଥିବା କର୍ମଚାରୀମାନଙ୍କୁ କୌଣସି ଅତିରିକ୍ତ ଶୁଳ୍କ ଦେବାକୁ ପଡ଼ିବ ନାହିଁ। ଏହି ସୁବିଧା ତୁରନ୍ତ ପ୍ରଭାବରୁ ଲାଗୁ ହେବ ବୋଲି ଜଣା ପଡିଛି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏକ ବୟାନରେ କହିଛନ୍ତି, “ଆମ ସେନା ଦେଶର ସୁରକ୍ଷା ପାଇଁ ନିଷ୍ଠାର ସହ କାର୍ଯ୍ୟ କରୁଛି। ଏହି ନିଷ୍ପତ୍ତି ସେମାନଙ୍କ ସେବାକୁ ସମ୍ମାନ ଜଣାଇବା ସହ ସେମାନଙ୍କ ବ୍ୟକ୍ତିଗତ ଓ ପେଷାଗତ ଜୀବନରେ ସୁବିଧା ଯୋଗାଇବ।”
ଏହି ଘୋଷଣାକୁ ସେନା ଅଧିକାରୀ ଓ ସମାଜର ବିଭିନ୍ନ ମହଲରୁ ସ୍ୱାଗତ କରାଯାଇଛି। ଜଣେ ବରିଷ୍ଠ ସେନା ଅଧିକାରୀ କହିଛନ୍ତି, “ଏହା ଆମ ସଦସ୍ୟମାନଙ୍କ ପାଇଁ ଆର୍ଥିକ ଓ ମାନସିକ ଚାପ ହ୍ରାସ କରିବ ଏବଂ ସେମାନେ ଅଧିକ ନିଷ୍ଠାର ସହ ଦାୟିତ୍ୱ ତୁଲାଇ ପାରିବେ।”
ଏହି ସୁବିଧା କେବଳ ସଶସ୍ତ୍ର ବାହିନୀର ସକ୍ରିୟ ସଦସ୍ୟମାନଙ୍କ ପାଇଁ ଉଦ୍ଦିଷ୍ଟ ହୋଇଥିବା ବେଳେ, ଆଗାମୀ ଭବିଷ୍ୟତରେ ସମସ୍ତ ସୈନିକମାନଙ୍କ ପାଇଁ ମଧ୍ୟ ଏଭଳି ସୁବିଧା ବିସ୍ତାର କରିବା ଉପରେ ବିଚାର କରୁଛନ୍ତି ବୋଲି ସୂଚନା ରିହଛି।
