ଚମ୍ପୁଆ, ୮/୧୨ : ଚମ୍ପୁଆ ରେଞ୍ଜ ଅନ୍ତର୍ଗତ ଚମ୍ପୁଆ ସେକ୍ସନରେ ଡେରା ପକାଇଥିବା ଗୋଠ ଛଡା ଦନ୍ତା ଆଜି ବନ ବିଭାଗକୁ ନାକେଦମ୍ କରିଛି । ପୂର୍ବରୁ ଏହି ଗୋଠ ଛଡା ଦନ୍ତାଟି ଗାଁ ଗାଁରେ ଆତଙ୍କ ସୃଷ୍ଟି କରିଥିବାବେଳେ ଆଜି ଦିନ ପ୍ରାୟ ୧୧ଟାରୁ ଦିନ ୪ଟା ପର୍ଯ୍ୟନ୍ତ କାଳିକାପ୍ରସାଦ ସଂରକ୍ଷିତ ଜଙ୍ଗଲ ଅନ୍ତର୍ଗତ ରଜିଆ ଜଙ୍ଗଲରେ ରହି ଉତ୍ପାତ ମଚାଉ ଥିବା ନେଇ ଦେଖିବାକୁ ମିଳିଥିଲା। ହାତୀଟି ଆଜି ରଜିଆ ଜଙ୍ଗଲ ମଧ୍ୟରେ ଯାଇଥିବା ୩୩କେଭି ବିଦ୍ୟୁତ୍ ଖୁଣ୍ଟକୁ ଶୁଣ୍ଢରେ ଠେଲି ଉପାଡ଼ିବାର ଚେଷ୍ଟା କରିବା ସହ ଖୁଣ୍ଟରେ ଲାଗିଥିବା ଷ୍ଟେ ତାର ଟିକୁ ମଧ୍ୟ ଉପାଡ଼ି ବାରେ ଲାଗିଥିଲା । ଖୁଣ୍ଟଟିକୁ ହାତୀଟି ସବୁ ବଳ ପ୍ରୟୋଗ କରି ଠେଲିବାରେ ଲାଗିଥିଲା । ଲାଗୁଥିଲା ଯେପରି ଖୁଣ୍ଟ ଉପରେ ହାତୀଟିର ପୁରୁଣା ରାଗ ରହିଛି । ହାତୀଟିକୁ ଘଉଡ଼ାଇବାକୁ ନେଇ ବନ ବିଭାଗ ଦିନ ସାରା ନାକେଦମ୍ ହୋଇଥିଲା । ଦୀର୍ଘ ପାଞ୍ଚ ଘଣ୍ଟା ଧରି ହାତୀ ଟି ବିଭାଗକୁ ନାକେଦମ୍ କରିଥିଲା । ଏହାପରେ ହାତୀଟି ୫୨୦ନଂ ଜାତୀୟ ରାଜପଥ ଉପରେ କିଛି ସମୟ ରହି ପୁଣି ଥରେ ଜଙ୍ଗଲ ଭିତରକୁ ପଳାଇଥିଲା ।
ସୂଚନାଯୋଗ୍ୟ କି, ଗତ ବର୍ଷ ଡିସେମ୍ବର ମାସ ପ୍ରଥମ ସପ୍ତାହରେ ରଜିଆ ଜଙ୍ଗଲ ଦେଇ ଯାଇଥିବା ଏହି ୩୩କେଭି (୫୫ ନଂ) ବିଦ୍ୟୁତ ଖୁଣ୍ଟ ତଳେ ଏକ ବୟସ୍କ ମାଈ ହାତୀର ଗଳିତ ଶବ ଉଦ୍ଧାର ହୋଇଥିଲା । ହାତୀର ଗୋଡରେ ବିଦ୍ୟୁତ୍ ଖୁଣ୍ଟରୁ ଆସିଥିବା ଷ୍ଟେ ତାରଟି ଲାଗିଥିବା ଦେଖିବାକୁ ମିଳିଥିଲା । ବିଦ୍ୟୁତ୍ ଆଘାତ କାରଣରୁ ହାତୀର ମୃତ୍ୟୁ ହୋଇଥିବା ନେଇ ବନ ବିଭାଗ କହିଥିବାବେଳେ ବିଦ୍ୟୁତ୍ ବିଭାଗ ପକ୍ଷରୁ ତାହାକୁ ଅସ୍ୱୀକାର କରାଯାଇଥିଲା । ବ୍ୟବଚ୍ଛେଦ ପରେ ହାତୀଟିକୁ ସେଇ ବିଦ୍ୟୁତ ଖୁଣ୍ଟ ନିକଟରେ ଗାତ ଖୋଳି ପୋତି ଦିଆଯାଇଥିଲା ।
ଆଜି ସେହି ବିଦ୍ୟୁତ୍ ଖୁଣ୍ଟଟିକୁ ହାତୀଟି ଆକ୍ରମଣ କରିଥିବା ଦେଖିବାକୁ ମିଳିଛି । ଖବରପାଇ ବନ ବିଭାଗ ଓ ବିଦ୍ୟୁତ ବିଭାଗର ଅଧିକାରୀମାନେ ପହଞ୍ଚିଥିଲେ । ବିଭାଗୀୟ ଅଧିକାରୀମାନେ ଜଙ୍ଗଲ ଭିତରକୁ ଯିବାକୁ ସାହସ କରିପାରି ନ ଥିଲେ। ଦୀର୍ଘ ସମୟ ଧରି ଉତ୍ପାତ କରିବା ପରେ ହାତୀଟି ସେଠାରୁ ପଳାଇଥିଲା। ବର୍ତ୍ତମାନ ଚମ୍ପୁଆ ସେକ୍ସନର ଟୁଣୁଟୁଣା ଜଙ୍ଗଲରେ ୨୬ଟି ହାତୀ ଥିବାବେଳେ ମୁକୁନ୍ଦପୁରରେ ୧୦ଟି ହାତୀ ଥିବା ନେଇ ଜଣାପଡ଼ିଛି । ଆସନ୍ତାକାଲି ଘଟଣାସ୍ଥଳକୁ ଯାଇ ବିଦ୍ୟୁତ୍ ଖୁଣ୍ଟର ସ୍ଥିତି ଅନୁଧ୍ୟାନ କରାଯିବ ବୋଲି ବିଭାଗୀୟ ଅଧିକାରୀଙ୍କଠାରୁ ଜଣାପଡ଼ିଛି । ଏଥି ଯୋଗୁଁ ଦିନ ବେଳେ ଚମ୍ପୁଆ ଅଞ୍ଚଳରେ ଦୀର୍ଘ ସମୟ ଧରି ବିଦ୍ୟୁତ କାଟ ହୋଇଥିଲା।
