ଜହ୍ନାପଙ୍କ, ୧୫/୭ : ବୌଦ୍ଧ ବ୍ଲକ ଖୁଣ୍ଟବନ୍ଧ ପଞ୍ଚାୟତ ପୋଲାମ ଗ୍ରାମବାସୀଙ୍କ ରାସ୍ତା ଯନ୍ତ୍ରଣା। ସାମାନ୍ୟ ବର୍ଷାରେ କାଦୁଅ ପଚପଚ ହୋଇଯାଉଛି ରାସ୍ତା। ସାଇକେଲ୍ ବାଇକ୍ ତ ଦୂରର କଥା ହାତରେ ଚପଲ ଧରି ଯାଉଛନ୍ତି ଲୋକେ। ତୁରନ୍ତ ରାସ୍ତା କଂକ୍ରିଟ୍ କରିବାକୁ ଦାବି କଲେ ଗ୍ରାମବାସୀ।
ସୂଚନାନୁଯାୟୀ, ପୋଲାମ ଗାଁ ମୁଣ୍ଡରୁ ସାଲୁଙ୍କି ରାସ୍ତା ଉନ୍ନତିକରଣ ପାଇଁ ୨୦୨୨-୨୩ ଆର୍ଥିକ ବର୍ଷରେ ୯ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ଏହି ରାସ୍ତା କେବଳ ସ୍ନାନ ଶୌଚ ପାଇଁ ବ୍ୟବହାର ହେଉଛି। କିନ୍ତୁ ଗାଁ ରାସ୍ତା ପାଇଁ ପଞ୍ଚାୟତ କର୍ତୃପକ୍ଷ ଆଖିବୁଜି ଦେଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ୫୭ନଂ ଜାତୀୟ ରାଜପଥ ଠାରୁ ୧ କିମି ରାସ୍ତା ପର୍ଯ୍ୟନ୍ତ କଂକ୍ରିଟ କରାଯାଇଥିବା ବେଳେ ସେହିଠାରୁ ଗାଁ ମୁଣ୍ଡ ପର୍ଯ୍ୟନ୍ତ ୧୦୦ ମିଟର ରାସ୍ତାକୁ କଂକ୍ରିଟ କରାଯାଇ ନାହିଁ। ଫଳରେ ସାମାନ୍ୟ ବର୍ଷା ହେଲେ ରାସ୍ତା କର୍ଦମାକ୍ତ ହେଉଛି। ଏହା ସହିତ ଟ୍ରାକ୍ଟର ଚଳାଚଳ ଯୋଗୁଁ ରାସ୍ତା ଅବସ୍ଥା ଶୋଚନୀୟ ହୋଇପଡୁଛି। ଏହି ବାଟ ଦେଇ ପ୍ରତିଦିନ ଛାତ୍ରଛାତ୍ରୀମାନେ ସ୍କୁଲ କଲେଜ ଯାଉଛନ୍ତି। ଲୋକମାନେ ବୌଦ୍ଧ ଜିଲ୍ଲା ସଦର ମହକୁମାକୁ ବିଭିନ୍ନ କାମରେ ଯାଉଛନ୍ତି। ପଞ୍ଚାୟତରୁ ଭତ୍ତା ଆଣିବା ପାଇଁ ବୟସ୍କ ଲୋକମାନେ ଏହି ରାସ୍ତା ଉପରେ ନିର୍ଭର। ତେଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ପଞ୍ଚାୟତ କର୍ତ୍ତୃପକ୍ଷ ତୁରନ୍ତ ରାସ୍ତା କଂକ୍ରିଟ୍ କରିବାକୁ ଗ୍ରାମବାସୀ ଦାବି କରିଛନ୍ତି।
