ମୁମ୍ବାଇ,୧୫/୧: ଘରୋଇ କ୍ରିକେଟକୁ ଫେରିବେ ଷ୍ଟାର କ୍ରିକେଟର । ରଣଜୀ ଖେଳିବେ ରୋହିତ ଶର୍ମା । ଖାଲି ରୋହିତ ନୁହଁନ୍ତି ବିରାଟ କୋହିଲ ଓ ଋଷବ ପନ୍ତ ମଧ୍ୟ ଆଗାମୀ ରଣଜୀ ଟ୍ରଫି ମ୍ୟାଚ ଖେଳିବା ଅନୁମାନ କରାଯାଉଛି । ଗତ ବର୍ଡର ଗାଭାସ୍କର ଟ୍ରଫି ଟେଷ୍ଟ ସିରିଜରେ ନୈରାଶ୍ୟଜନକ ପ୍ରଦର୍ଶନ ପରେ ତୀବ୍ର ସମାଲୋଚିତ ହୋଇଥିବା ଭାରତୀୟ ଖେଳାଳିମାନେ ଆଗାମୀ ରଣଜୀ ଟ୍ରଫିର ଦ୍ୱିତୀୟ ଭାଗ ଖେଳିବା ପାଇଁ ସମ୍ମତି ପ୍ରକାଶ କରିଛନ୍ତି । ଟିମ୍ ଇଣ୍ଡିଆ ଅଧିନାୟକ ରୋହିତ ଶର୍ମା ମୁମ୍ବାଇ ରଣଜୀ ଦଳ ସହ ଅଭ୍ୟାସ ଆରମ୍ଭ କରିଥିବା ଦେଖିବାକୁ ମିଳିଛି ।
ସେହିପରି ଯଶସ୍ୱୀ ଜୈସ୍ୱାଲ ମଧ୍ୟ ପରବର୍ତ୍ତୀ ମ୍ୟାଚ୍ ଖେଳିବାକୁ ଚାହୁଁଥିବା ମୁମ୍ବାଇ କ୍ରିକେଟ୍ ଆସୋସିଏସନକୁ ଜଣାଇଛନ୍ତି । ଏପଟେ ବିରାଟ କୋହଲି ଓ ରିଷଭ ପନ୍ତଙ୍କୁ ଦିଲ୍ଲୀ ସମ୍ଭାବ୍ୟ ଦଳରେ ସ୍ଥାନ ମିଳିଛି । ଅନ୍ୟ କୌଣସି ଖେଳାଳିଙ୍କ ବିଷୟରେ ଖବର ମିଳି ନଥିଲେ ହେଁ ରୋହିତ ଅଭ୍ୟାସ ଆରମ୍ଭ କରିଛନ୍ତି । ସେ ୱାଙ୍ଖଡ଼େ ଷ୍ଟାଡ଼ିୟମ୍ରେ ଦଳ ସହ ଦୀର୍ଘ ସମୟ ଧରି ବ୍ୟାଟିଂ ଅଭ୍ୟାସ କରିଥିଲେ ।
ଏହା ବି ପଢନ୍ତୁ...ଖୋ ଖୋ ବିଶ୍ବକପ; ବ୍ରାଜିଲକୁ ହରାଇଲା ପୁରୁଷ ଦଳ, ମହିଳା ଟିମଠୁ ହାରିଲା ଦକ୍ଷିଣ କୋରିଆ
ମୁଖ୍ୟତଃ ଥ୍ରୋ ଡାଉନ୍ରେ ସେ ଅଭ୍ୟାସ କରୁଥିବା ଦେଖିବାକୁ ମିଳିଥିଲା । ୨୩ତାରିଖରୁ ରଣଜୀ ଟ୍ରଫିର ଦ୍ୱିତୀୟ ଭାଗ ଆରମ୍ଭ ହେବ । ମୁମ୍ବାଇ ପରବର୍ତ୍ତୀ ମ୍ୟାଚ୍ରେ ଜାମ୍ମୁ ଓ କାଶ୍ମୀରକୁ ଭେଟିବ । ଏହି ମ୍ୟାଚ୍ ପାଇଁ ଚୂଡ଼ାନ୍ତ ମୁମ୍ବାଇ ଦଳ ଘୋଷଣା ହୋଇନାହିଁ । ରୋହିତ ସମ୍ମତି ପ୍ରକାଶ କଲେ ଦଳରେ ସ୍ଥାନ ପାଇବେ । ଦୀର୍ଘ ୯ ବର୍ଷ ପରେ ରୋହିତ ରଣଜୀ ଟ୍ରଫି ଖେଳିବାକୁ ଯାଉଛନ୍ତି । ଶେଷ ଥର ପାଇଁ ସେ ୨୦୧୫ରେ ଉତ୍ତରପ୍ରଦେଶ ବିପକ୍ଷରେ ରଣଜୀ ଟ୍ରଫି ମ୍ୟାଚ୍ ଖେଳିଥିଲେ । ସୂଚନାଯୋଗ୍ୟ, ବର୍ଡର-ଗାଭାସ୍କର ଟ୍ରଫିରେ ଭାରତର ପରାଜୟ ପରେ ସବୁ ସିନିୟର ଖେଳାଳିଙ୍କୁ ଘରୋଇ କ୍ରିକେଟ୍ ଖେଳିବାକୁ ନିର୍ଦ୍ଦେଶ ଦିଆଯାଇଛି ।
ଅଫ୍ ସିଜନରେ ଘରୋଇ କ୍ରିକେଟ୍ ଖେଳି ନିଜକୁ ପ୍ରସ୍ତୁତ ରଖିବାକୁ ଟିମ୍ ମ୍ୟାନେଜମେଣ୍ଟ ଓ ଚୟନ କମିଟି ନିର୍ଦ୍ଦେଶ ଦେଇଛି । ରୋହିତଙ୍କ ସମେତ ଶୁଭମନ ଗିଲ୍ ମଧ୍ୟ ରଣଜୀ ଟ୍ରଫି ଖେଳିବାକୁ ପ୍ରସ୍ତୁତ ହେଉଥିବା ଜଣା ପଡ଼ିଛି । ତେବେ ବିରାଟ କୋହଲିଙ୍କ ଖେଳିବା ନେଇ ଏପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ ।
