ଡାମାସ୍କସ୍,୦୯/୧୨: ଦୀର୍ଘବର୍ଷ ଧରି ଗୃହଯୁଦ୍ଧରେ ମାତିଥିବା ସିରିଆରେ ରବିବାର ବଡ଼ଧରଣର ପରିବର୍ତ୍ତନ ହୋଇଛି । ସିରିଆ ରାଜଧାନୀ ଡାମାସ୍କସ୍ ବିଦ୍ରୋହୀ ହୟାତ ତହରିର ଅଲ୍-ଶାମ୍(ଏଚ୍ଟିଏସ୍)ର କବ୍ଜାକୁ ଆସିବା ପରେ ଇସ୍ତଫା ଦେଇ ଦେଶରୁ ପଳାୟନ କରିଛନ୍ତି ରାଷ୍ଟ୍ରପତି ବଶର ଅଲ୍-ଅସଦ । ତାଙ୍କ ପଳାୟନ ବାବଦରେ ସେନା ପକ୍ଷରୁ ସୂଚନା ଦିଆଯାଇଛି । ସିରିଆରେ ଗତ ୧୧ ଦିନ ହେଲା ବିଦ୍ରୋହୀ ଏବଂ ସେନା ମଧ୍ୟରେ ଘମାଘୋଟ ଲଢ଼େଇ ପରେ ଅସଦଙ୍କୁ ବିଦ୍ରୋହୀ କ୍ଷମତାଚ୍ୟୁତ କରିଛନ୍ତି । ଫଳରେ ଅସଦଙ୍କ ଦୀର୍ଘ ୨୪ ବର୍ଷର ଶାସନର ଅନ୍ତ ଘଟିଛି । ଅସଦଙ୍କ ବିରୋଧରେ ଦୀର୍ଘ ୧୪ ବର୍ଷ ହେଲା ବିଦ୍ରୋହ ଜାରି ଥିଲା । ଅସଦଙ୍କ ପଳାୟନ ପରେ ସିରିଆ ପ୍ରଧାନମନ୍ତ୍ରୀ ବିଦ୍ରୋହୀଙ୍କୁ କ୍ଷମତା ହସ୍ତାନ୍ତର ପାଇଁ ପ୍ରସ୍ତାବ ଦେଇଛନ୍ତି ।
ପ୍ରଧାନମନ୍ତ୍ରୀ ମହମ୍ମଦ ଗାଜି ଅଲ୍ ଜଲାଲି ଏକ ଭିଡିଓରେ କହିଛନ୍ତି ଯେ, ସେ ଦେଶରେ ରହିବେ ଏବଂ ଯାହାଙ୍କୁ ସିରିଆ ଲୋକେ ବାଛିବେ ତାଙ୍କ ସହ ମିଶି କାମ କରିବେ । ଡାମାସ୍କସ୍ ସମେତ ପ୍ରମୁଖ ସହର ଅଲେପ୍ପୋ, ହମା, ହୋମ୍ସ ସହର କବ୍ଜା କରିସାରିଥିବା ବିଦ୍ରୋହୀ ସିରିଆକୁ ସ୍ୱାଧୀନ ଘୋଷଣା କରିଛନ୍ତି । ଏକଛତ୍ରବାଦୀ ଶାସକ ଅସଦଙ୍କ କ୍ଷମତାର ଅନ୍ତ ଘଟାଇଥିବା ନେଇ ସେମାନେ ଏକ ସରକାରୀ ଟିଭି ଚ୍ୟାନେଲ ଏବଂ ରେଡିଓରେ ଘୋଷଣା କରିଛନ୍ତି । ଏବେ ପାଇଁ ପ୍ରଧାନମନ୍ତ୍ରୀ ହିଁ ସରକାରୀ ସଂସ୍ଥାଗୁଡ଼ିକର ତଦାରଖ କରିବେ ବୋଲି ବିଦ୍ରୋହୀ ଗୋଷ୍ଠୀ କହିଛନ୍ତି । ଡାମାସ୍କସ୍ରେ କର୍ଫ୍ୟୁ ଲାଗୁ ହୋଇଛି ଏବଂ ଲୋକଙ୍କୁ ଘରେ ରହିବାକୁ କୁହାଯାଇଛି । ଏହା ଭିତରେ ଏଚ୍ଟିଏସ୍ ମୁଖ୍ୟ ଅବୁ ମହମ୍ମଦ ଅଲ୍-ଜୋଲାନି ଡାମାସ୍କସ୍ରେ ପହଞ୍ଚିଛନ୍ତି । ସିରିଆ ଲୋକଙ୍କ ଅଧିକାର ସୁରକ୍ଷିତ ନ ହେବା ପର୍ଯ୍ୟନ୍ତ ଲଢ଼େଇ ଜାରି ରହିବ । ଏଣିକି ଭବିଷ୍ୟତ ଆମର ଏବଂ ବିଜୟ ଦିଗରେ ଆମେ ଅଗ୍ରସର ହୋଇଛୁ ବୋଲି ଜୋଲାନି କହିଛନ୍ତି ।
ସେପଟେ ଅସଦ ଯେଉଁ ବିମାନରେ ଯାଉଥିଲେ ତାହା ହଠାତ୍ ରାଡାରରୁ ଗାଏବ ହୋଇଯାଇଥିବା କୁହାଯାଉଥିଲା । ଏମିତି କି ବିମାନଟିକୁ ଖସାଇ ଦିଆଯାଇଥିବା କିମ୍ବା ଦୁର୍ଘଟଣାଗ୍ରସ୍ତ ହୋଇଥିବା ମଧ୍ୟ ଚର୍ଚ୍ଚା ହୋଇଥିଲା । କିନ୍ତୁ ଅସଦ ସପରିବାର ରୁଷ୍ ରାଜଧାନୀ ମସ୍କୋରେ ପହଞ୍ଚିଛନ୍ତି । ରୁଷ୍ରେ ଆଶ୍ରୟ ନେବା ଲାଗି ସେ ପୁଟିନ୍ ସରକାରଙ୍କ ଅନୁମତି ଲୋଡ଼ିଥିଲେ । ଏହାକୁ ସରକାର ଅନୁମୋଦନ ଦେଇଛନ୍ତି । ବର୍ତ୍ତମାନ ମସ୍କୋରେ ହିଁ ଅସଦ ନିଜ ପରିବାର ସହ ରହିବେ । ତେବେ କେତେଦିନ ପାଇଁ ସେଠାରେ ରହିବାକୁ ଅନୁମତି ମିଳିବ, ତାହା ନେଇ କ୍ରେମ୍ଲିନ୍ ପକ୍ଷରୁ କିଛି କୁହାଯାଇ ନାହିଁ । ଅନ୍ୟ ଦେଶଗୁଡ଼ିକ ଭଳି ସିରିଆ ଏକ ସାଧାରଣ ଦେଶ ବନିପାରିବ ଏବଂ ପଡ଼ୋଶୀଙ୍କ ସମେତ ଦୁନିଆର ଅନ୍ୟ ଦେଶଗୁଡ଼ିକ ସହ ଏହାର ଭଲ ସମ୍ପର୍କ ରହିବ ବୋଲି ପ୍ରଧାନମନ୍ତ୍ରୀ ମହମ୍ମଦ ଗାଜି ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଏହା ଭିତରେ ବିରୋଧୀ ଦଳ ନେତା ହାଦି ଅଲ୍-ବହରା ଡାମାସ୍କସ୍ ସୁରକ୍ଷିତ ଥିବା କହିଛନ୍ତି । ଅସଦଙ୍କ ପରେ ସିରିଆ ଇତିହାସର ଏକ କଳା ଯୁଗ ଶେଷ ହୋଇଥିବା ଏକ ଚ୍ୟାନେଲରେ କହିଛନ୍ତି । ଅସଦଙ୍କୁ କ୍ଷମତାଚ୍ୟୁତ କରିବା ପରେ ବିଦ୍ରୋହୀ ଗୋଷ୍ଠୀ ଉତ୍ସବ ପାଳିଛନ୍ତି । ସେପଟେ ଲୋକେ ରାଷ୍ଟ୍ରପତିଙ୍କ ବାସଭବନରେ ପଶି ଲୁଟ୍ପାଟ କରିଛନ୍ତି । ସିରିଆ ସ୍ଥିତିକୁ ଦେଖି ଇସ୍ରାଏଲ ଦକ୍ଷିଣ ପଶ୍ଚିମ ସିରିଆ ସୀମା ସହ ଲାଗିଥିବା ଇସ୍ରାଏଲ ଅଧିକୃତ ଗୋଲେନ୍ ହାଇଟ୍ସ ନିକଟ ବଫର ଜୋନ୍ରେ ଏହାର ସୈନ୍ୟଙ୍କୁ ମୁତୟନ କରିଛି ।
ସେହିପରି ସିରିଆରେ ସମସ୍ତ ଭାରତୀୟ ସୁରକ୍ଷିତ ଥିବା ଏବଂ ଡାମାସ୍କସ୍ରେ ଭାରତୀୟ ଦୂତାବାସ କାର୍ଯ୍ୟକ୍ଷମ ଥିବା ଭାରତର ବିଦେଶ ମନ୍ତ୍ରଣାଳୟ ସୂତ୍ରରୁ ଜଣାପଡ଼ିଛି । ସେଠାରେ ଭାରତୀୟଙ୍କ ସହ ଦୂତାବାସ ସମ୍ପର୍କରେ ଥିବା ଏବଂ ସେମାନଙ୍କ ସୁରକ୍ଷା ସୁନିଶ୍ଚିତ କରାଯାଉଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି । ଅନ୍ୟପକ୍ଷରେ ଡିସେମ୍ବର ୧୮ ପର୍ଯ୍ୟନ୍ତ ଡାମାସ୍କସ୍ ସମସ୍ତ ବିମାନ ଉଡ଼ାଣ ବାତିଲ କରିଛି ।
