ନୀଳଗିରି ୧୯/୦୧: ନୀଳଗିରିରେ ଅଘଟଣା। ମିଠା ଦୋକାନରେ ମିଠା ତିଆରି କରୁଥିବା ବେଳେ ଗ୍ୟାସ ଲିକ୍ ଯୋଗୁ ଲାଗିଲା ନିଆଁ। ଭୟଙ୍କର ଅଗ୍ନିକାଣ୍ଡରେ ପୋଡ଼ି ହୋଇ ଗଲେ ୩ ଜଣ। ଦୋକାନ ମାଲିକ ସମେତ ଦୁଇ ଜଣ ଗୁରୁତର। ୧୦ ପ୍ରତିଶତ ଜଳିଗଲା ଶରୀର। ସମସ୍ତଙ୍କୁ ଉଦ୍ଧାର କରାଯାଇ ନୀଳଗିରି ହସ୍ପିଟାଲରେ ଭର୍ତ୍ତି କରାଯାଇଛି। ଏବେ ଚିକିତ୍ସା ଜାରି ରହିଛି।
ସୂଚନା ମୁତାବକ, ଆଜି ନୀଳଗିରି ବ୍ଲକ ନିକଟ ଗଜାନନ ନାମକ ମିଠା ଦୋକାନରେ ମିଠା ତିଆରି ବେଳେ ହଠାତ୍ ଗ୍ୟାସ୍ ସିଲିଣ୍ଡରରେ ନିଆଁ ଲାଗିଯାଇଥିଲା। ଦେଖୁ ଦେଖୁ ଦୋକାନରେ ନିଆଁ ବ୍ୟାପି ଯାଇଥିଲା। ଫଳରେ ଦୋକାନ ମାଲିକ ଯଦୁନାଥ ସାହୁ , ରାଧାକିଶୋରପୁର ଅଞ୍ଚଳର ରାଜେଶ କୁମାର ସିଂହ ଓ ନରେଶ ସିଂହ ପୋଡ଼ି ହୋଇ ଗୁରୁତର ହୋଇଥିଲେ। ସ୍ଥାନୀୟଲୋକ ଅଗ୍ନିଶମ ବାହିନୀଙ୍କୁ ସୂଚନା ଦେବା ସହ ଗୁରୁତରଙ୍କୁ ଉଦ୍ଧାର କରି ନୀଳଗିରି ମୁଖ୍ୟ ହସ୍ପିଟାଲରେ ଭର୍ତି କରିଥିବା ଜଣାପଡିଛି। ସେଠାରେ ଗୁରୁତରଙ୍କୁ ଚିକିତ୍ସା ଜାରି ରହିଛି। ତେବେ ଅଗ୍ନିକାଣ୍ଡର କାରଣ ଜଣାପଡିନାହିଁ।
