କେନ୍ଦ୍ରାପଡା, ୧୯/୧୦: ସମୁଦ୍ରକୁ ମାଛ ଧରିବାକୁ ଯାଇଥିବା ବେଳେ ମିଳିଲା ସନ୍ଦିଗ୍ଧ ପାରା । ପାରାଟିର ଦୁଇ ଗୋଡରେ ଥିବା ଟ୍ୟାଗରେ ଇଂରାଜୀ ଅକ୍ଷରରେ ଲେଖାଥିବା ଦେଖିବାକୁ ମିଳିଛି । କେନ୍ଦ୍ରାପଡା ଜିଲ୍ଲା ମହାକାଳପଡା ବ୍ଲକ ଅନ୍ତର୍ଗତ ଜମ୍ବୁ ଗ୍ରାମର ରତନ ଦାସ ନାମକ ଜଣେ ସତ୍ସ୍ୟଜୀବୀ ମାଛ ଧରିବାକୁ ଯାଇଥିବା ବେଳେ ଏହି ପାରା ତାଙ୍କୁ ମିଳିଛି ।

ସୂଚନା ମୁତାବକ, ରତନ ଦାସ ମାଛ ଧରିବାକୁ ଯାଇଥିବା ବେଳେ ଏକ ପାରା ଗଭୀର ସମୁଦ୍ରରେ ଉଡିଆସି ରତନଙ୍କ ଭଗବତୀ ନାମକ ମାଛଧରା ବୋଟରେ ବସିଥିଲା । ବୋଟ୍‌ରେ ବସିବା ପରେ ରତନ ତାକୁ ଧରି ପକାଇଥିଲେ । ପାରାଟିର ଦୁଇଟି ଗୋଡ଼ରେ ଥିବା ଟ୍ୟାଗରେ ଇଂରାଜୀ ଅକ୍ଷରରେ କିଛି ଲେଖାଥିବା ସେ ଦେଖିଥିଲେ । ପାରା ଗୋଡରେ ଥିବା ଟ୍ୟାଗରେ CHN -19 - 2024 ମସିହା ଲେଖା ହୋଇଥିଲା । ଏହା ସହ 988822  ନାମକ ଏକ ନମ୍ୱର ମଧ୍ୟ ଲେଖା ହୋଇଥିଲା । କେବଳ ସେତିକି ନୁହେଁ ପାରାଟିର ପରରେ ମଧ୍ୟ କିଛି ଲେଖା ହୋଇଥିବାର ଦେଖିବାକୁ ମିଳିଥିଲା । ରତନ ଏହି   ପାରାକୁ ଜମ୍ବୁ ରେଞ୍ଜର ବନବିଭାଗ କର୍ମଚାରୀଙ୍କୁ ହସ୍ତାନ୍ତର କରିଥିଲେ । ପାରାଟିକୁ ବନବିଭାଗ ଦୁଇ ଦିନ ରଖିବା ପରେ ଛାଡି ଦେଇଥିବା ଜଣାପଡିଛି । ଏପରି ଏକ ସନ୍ଦିଗ୍ଧ ପାରା ଧରାପଡିବା ପରେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।