କଟକ, ୨୦।୩: ମହୁଲ ଗଛରେ ଚଢ଼ି ଫୁଲ ତୋଳୁତୋଳୁ ଖସି ଯାଇଥିଲା ଗୋଡ଼ । ଭାରସାମ୍ୟ ହରାଇ ତଳେ କଚାଡ଼ି ହୋଇପଡ଼ିବାରୁ ପିଠିରେ ପଶିଯାଇଥିଲା ଗଛ ଡାଳ । ଦୁର୍ଘଟଣାଗ୍ରସ୍ତ ନାବାଳକଙ୍କ ପିଠିରୁ ପେଟ ଦେଇ ଛାତି ଯାଏ ପଶିରହିଥିବା ଗଛଡାଳ ପ୍ରାୟ ୩୦ ଘଣ୍ଟା ପରେ ଶରୀରରୁ ବାହାର କରାଯାଇଛି । ଏସ୍‌ସିବି କାର୍ଡ଼ିଓଥୋରାସି ବିଭାଗରେ ଜଟିଳ ଅପରେସନ୍‌ କରାଯାଇ ନାବାଳକଙ୍କ ପିଠିରୁ ଛାତି ଯାଏ ପଶି ରହିଥିବା ଦେଢ଼ଫୁଟିଆ ଡାଳକୁ ବାହାର କରାଯାଇଛି । ଏପରିସ୍ଥଳେ ଦୁଇ ଦିନ କାଳ ଜୀବନ ସହ ସଂଗ୍ରାମ କରିଆସୁଥିବା ମୟୂରଭଞ୍ଜ ଅଞ୍ଚଳର ନାବାଳକ ଲମ୍ବୋଦର ମାର୍ଣ୍ଡି ଏବେ ବିପଦମୁକ୍ତ ହୋଇଛନ୍ତି । 

ସୂଚନାଯୋଗ୍ୟ, ମୟୂରଭଞ୍ଜ ଜିଲ୍ଲା ଉଦଳା ବଇଦାଖୋଲି ଅଞ୍ଚଳର ହରିମୋହନ ମାର୍ଣ୍ଡିଙ୍କ ପୁଅ ୧୭ ବର୍ଷୀୟ ଲମ୍ବୋଦର ରବିବାର ସନ୍ଧ୍ୟାରେ ଘର ନିକଟବର୍ତ୍ତୀ ଏକ ମହୁଲ ଗଛରେ ଚଢ଼ି ମହୁଲ ଫୁଲ ତୋଳୁଥିବାବେଳେ ତଳକୁ ଖସିପଡ଼ିଥିଲେ । ତଳେ ପଡ଼ିଥିବା ଏକ ଗଛର ଡାଳ ଲମ୍ବୋଦରଙ୍କ ପିଠି ଭିତର ଦେଇ ଛାତିକୁ ପଶିଯାଇଥିଲା । ଡାଳଟି ମେରୁଦଣ୍ଡରେ ଫଶି ରହିବା ଦ୍ୱାରା ଲମ୍ବୋଦର ଭୂଇଁରୁ ଉଠି ପାରିନଥିଲେ । ଯନ୍ତ୍ରଣାରେ ଛଟପଟ ଲମ୍ବୋଦରଙ୍କ ଆର୍ତ୍ତ ଚିତ୍କାର ଶୁଣି ଆଖପାଖରେ ଥିବା ଲୋକେ ଘଟଣାସ୍ଥଳକୁ ଦୌଡ଼ିଆସିଥିଲେ । ଡାଳଟି ଲମ୍ବା ଥିବାରୁ ଏହାକୁ ଲମ୍ବୋଦରଙ୍କ ପିଠିରୁ ବାହାର କରିବା ଏତେ ସହଜ ନଥିଲା । ଏପରିସ୍ଥଳେ ସ୍ଥାନୀୟ ଲୋକେ ଗଛ ଡାଳର କିଛି ଅଂଶ ସତର୍କତାର ସହ କାଟି ଦେଇଥିଲେ । ତଥାପି ଦେଢ଼ ହାତର ଲମ୍ବ ଡାଳର କିଛି ଅଂଶ ଦେହ ଭିତରେ ଫଶି ରହିଥିଲା । ଗୁରୁତର ଅବସ୍ଥାରେ ନାବାଳକଙ୍କୁ ସ୍ଥାନୀୟ ଲୋକେ ରବିବାର ରାତିରେ ପ୍ରଥମେ ଉଦଳା ମେଡିକାଲରେ ଭର୍ତ୍ତି କରିଥିଲେ । ପରେ ଏଠାରୁ ତାଙ୍କୁ ବାରିପଦା ମେଡିକାଲ୍‌ ସ୍ଥାନାନ୍ତର କରାଯାଇଥିଲେ ହେଁ ଡାକ୍ତର ତାଙ୍କୁ ଏସ୍‌ସିବି ଡାକ୍ତରଖାନା ପଠାଇ ଦେଇଥିଲେ । 

ସୋମବାର ସକାଳେ ଲମ୍ବୋଦର ଏସ୍‌ସିବି କାଜୁଆଲିଟିରେ ପହଞ୍ଚିବା ପରେ ସର୍ଜରୀ ବିଭାଗରେ ଅପରେସନ୍‌ କରାଯିବା ପାଇଁ ଯୋଜନା କରାଯାଇଥିଲା । ମାତ୍ର ପିଠିରୁ ଛାତି ଦେଇ ଡାଳଟି ଫଶି ରହିଥିବାରୁ ସର୍ଜରୀ ବିଭାଗ ଡାକ୍ତର କାର୍ଡିଓଥୋରାସି ବିଭାଗକୁ ସ୍ଥାନାନ୍ତର କରିଥିଲେ । ମାତ୍ର ନାବାଳକଙ୍କ ଜୀବନ ପ୍ରତି ବିପଦ ଥିବାରୁ ଡାକ୍ତର ବହୁ ପରୀକ୍ଷା ନିରୀକ୍ଷା କରିବା ପରେ ଅପରେସନ୍‌ ପାଇଁ ନିଷ୍ପତ୍ତି ନେଇଥିଲେ । ପ୍ରଫେସର ମନୋଜ କୁମାର ପଟ୍ଟନାୟକଙ୍କ ନେତୃତ୍ୱରେ ନାବାଳକଙ୍କର ଅପରେସନ୍‌ ରାତି ୮ ଟାରୁ ଆରମ୍ଭ ହୋଇଥିଲା । ଦୀର୍ଘ ୪ ଘଣ୍ଟାରୁ ଅଧିକ ସମୟ ଧରି ଅପରେସନ୍‌ ଚାଲିଥିଲା । ଅପରେସନ୍‌ କରି ଶେଷରେ ଡାକ୍ତରମାନେ ନାବାଳକର ପିଠିରୁ ଗଛ ଡାଳକୁ ରାତି ପ୍ରାୟ ୧୨ଟା ବେଳେ ବାହାର କରିବାରେ ସକ୍ଷମ ହୋଇଥିଲେ । ଦୁଇ ଦିନ ହେଲା ଜୀବନ ମରଣ ଆଶଙ୍କାରେ ଥିବା ନାବାଳକ ଜଣକ କାର୍ଡିଓଥୋରାସି ବିଭାଗ ମୁଖ୍ୟ ପ୍ରଫେସର ପଟ୍ଟନାୟକଙ୍କ ନେତୃତ୍ୱରେ ଗଠିତ ଟିମ୍‌ର ସଦସ୍ୟମାନଙ୍କ ଦୀର୍ଘ ସମୟର କସରତ ପରେ ବିପଦମୁକ୍ତ ହୋଇଥିଲେ । ନାବାଳକ ଜଣକ ଏବେ ଆଇସିୟୁରେ । ଲମ୍ବୋଦରଙ୍କ ଦେହରୁ ଗଛ ଡାଳ ବାହାରିଥିଲେ ହେଁ ପୁଅ କିପରି ସ୍ୱାଭାବିକ ଅବସ୍ଥାକୁ ଫେରିବ ସେଥିପାଇଁ ତାଙ୍କ ମା’ ଲକ୍ଷ୍ମୀ ମାର୍ଣ୍ଡି ଚାହିଁ ବସିଛନ୍ତି ।