ଅନୁଗୁଳ,୨୪/୧୧: ମାଆକୁ ପିଟି ପିଟି ମାରିଦେଲା ନିର୍ଦୟୀ ପୁଅ । ଏହି ହତ୍ୟାକାଣ୍ଡର କାରଣ ଅସ୍ପଷ୍ଟ ଥିବା ବେଳେ କୌଣସି କାରଣକୁ ନେଇ ବଚସା ପରେ ମାଆକୁ ନିର୍ମତ ଭାବରେ ହତ୍ୟା କରିଛି ପୁଅ । ପୁଅ ସରୋଜ ନାଏକ ନିଜ ମାଆ ଲତା ନାଏକ(୭୦)ଙ୍କୁ ପିଟି ପିଟି ମାରିଥିବା ଅଭିଯୋଗ କରିଛନ୍ତି ପରିବାର ଲୋକେ । ଏହି ଘଟଣାରେ ପୁଅ ସରୋଜ ନାଏକଙ୍କୁ ଗିରଫ କରିଛି ପୋଲିସ । ଅନୁଗୁଳ ଜିଲ୍ଲା ଶୁଶୁଡା ଗାଁର ଏଭଳି ଘଟଣା ଘଟିଛି ।

ସୂଚନା ମୁତାବକ, ପୁଅ ସରୋଜ ଏବଂ ଲତାଙ୍କ ମଧ୍ୟରେ କୌଣସି କାରଣକୁ ନେଇ ବଚସା ହୋଇଥିଲା । ସେଥିରେ ଉତ୍ୟକ୍ତ ହୋଇ ସରୋଜ ନିଜ ମାଆଙ୍କୁ ମାର ପିଟ କରିଥିଲା । ସେ କଷ୍ଟରେ ଚିତ୍କାର କରିଥିଲେ କିନ୍ତୁ ସରୋଜର କ୍ରୋଧ ଶାନ୍ତ ହୋଇ ନଥିଲା । ଶେଷରେ ମାଆକୁ ପିଟି ପିଟି ହତ୍ୟା କରିଥିଲା ନିର୍ଦୟୀ ପୁଅ । ଏହା ଦେଖି ତାଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ଅନୁଗୁଳ ଟାଉନ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିଛି । ଏହା ସହ ଅଭିଯୁକ୍ତକୁ ଗିରଫ କରି ଘଟଣାର ତଦନ୍ତ ଚଳାଇଛି ପୋଲିସ ।