ପୁରୀ,୧୦/୦୬: ବୁଧବାର ମହାପ୍ରଭୁଙ୍କ ସ୍ନାନ ଯାତ୍ରା । ସ୍ନାନ ମଣ୍ଡପରୁ ଗଜାନନ ବେଶରେ ଦର୍ଶନ ଦେବେ ମହାବାହୁ । ଶ୍ରୀମନ୍ଦିର ସମ୍ମୁଖରେ ରୁଣ୍ଢ ହୋଇ ଚତୁର୍ଦ୍ଧାମୂର୍ତ୍ତିଙ୍କୁ ହାତୀ ବେଶରେ ଦର୍ଶନ କରିବେ ଅଗଣିତ ଭକ୍ତ । ଏଣୁ ସଜେଇ ହେଉଛି ଶ୍ରୀମନ୍ଦିର ସ୍ନାନମଣ୍ଡପ ଓ ବଡ଼ଦାଣ୍ଡ । ପାରମ୍ପରିକ ଚିତ୍ରକରମାନେ ମଣ୍ଡପରେ ରଙ୍ଗ ଦେଇ ସୁସଜ୍ଜିତ କରୁଛନ୍ତି । ମାର୍କେଟ ଛକରୁ ଦର୍ଶନାର୍ଥୀଙ୍କ ପାଇଁ ବାରିକେଡ଼୍ ତିଆରି ହୋଇଛି । ହାତୀ ବେଶ ପୂର୍ବରୁ ଠାକୁରଙ୍କୁ ଜଳ ଲାଗି କରାଯିବ ।
ସୁନା କୂଅରୁ ଜଳ ଆସି ୧୦୮ ଗରା ଜଳ ଲାଗି ହେବେ ଠାକୁରେ । ଏଣୁ ମଙ୍ଗଳବାର ସୁନା କୂଅ ଉଝୁଳା ଯିବ । ଏପଟେ ହାତୀ ବେଶରେ ଶେଷ ସ୍ପର୍ଶ ଦିଆଯାଉଛି । ଦୟଣାମାଳୀ ସେବକ ବସନ୍ତ(ଇଲା) ରଣାଙ୍କ ତତ୍ତ୍ୱାବଧାନରେ ପ୍ରସ୍ତୁତ ହେଉଛି ଠାକୁରଙ୍କ ହାତୀ ବେଶ । ଶ୍ରୀବଳଭଦ୍ରଙ୍କ ପାଇଁ ଧଳାରଙ୍ଗର ବେଶ ଓ ମହାପ୍ରଭୁ ଶ୍ରୀଜଗନ୍ନାଥଙ୍କର କଳାରଙ୍ଗର ବେଶ ପ୍ରସ୍ତୁତ ହୋଇଛି । ଠାକୁରଙ୍କ ଶ୍ରୀମସ୍ତକ ପାଇଁ ତରାସ ଓ ତାର ନିମ୍ନଅଂଶ ପାଇଁ ଡ଼ାଳି ନିର୍ମାଣ ହୋଇଛି । ମୁଖାରବିନ୍ଦରେ ଲାଗି ହେବେ କିଆଫଳି । ଚନ୍ଦ୍ରସୂର୍ଯ୍ୟ, ଛତି, କାନ, ଚିତା, ଥୋଡ଼ହସ୍ତ, ଅଧର, ତୋରଣା ଓ ଗଜଖୁମ୍ୱ ତିଆରି ହୋଇଛି । ଦେବୀ ସୁଭଦ୍ରାଙ୍କ ପାଇଁ ୨ଟି ତଡ଼କୀ, ନାକୁଆସୀ, ତରାସ, ଛତି ଓ ଚୂଳ, ଚିତା ଆଦି ବେଶ ଉପକରଣ ପ୍ରସ୍ତୁତ ହୋଇଛି । ସୁଦର୍ଶନ ମହାପ୍ରଭୁଙ୍କ ପାଇଁ ସବୁଜ ରଙ୍ଗର ଚକ୍ର, ଚୂଳ ଏବଂ ଓଲାର ତିଆରି କରାଯାଉଛି । ସ୍ନାନଯାତ୍ରା ଦିନ ପଟୁଆରରେ ବେଶ ବିଜେ ହୋଇ ସ୍ନାନମଣ୍ଡପରେ ଠାକୁରଙ୍କ ବେଶ ଅନୁଷ୍ଠିତ ହେବ । ମଙ୍ଗଳବାର ଦୟଣାମାଳୀ ସେବକମାନେ ମହାପ୍ରଭୁଙ୍କ ସେବାରେ ନିୟୋଜିତ ହୋଇ ଶ୍ରୀମନ୍ଦିର ଉତ୍ତରଦ୍ୱାର ନିକଟ ଶୀତଳା ଠାକୁରାଣୀଙ୍କ ସମୀପସ୍ଥ ସୁନା କୂଅକୁ ଶୋଧ କରିବେ ।
