ଲହୁଣୀପଡ଼ା, ୯।୬: ସୁନ୍ଦରଗଡ଼ ମହୁଲପଦା ଥାନା ଅନ୍ତର୍ଗତ ଡଲେଇସରା ଗ୍ରାମରେ ଭାଇର ଛଡ଼ ମାଡ଼ରେ ଭଉଣୀ ମୃତ । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ମୃତକ ଭଉଣୀ ଜଣକ ହେଲେ ପୂର୍ଣ୍ଣ ଚନ୍ଦ୍ର ମାହାନ୍ତଙ୍କ ସ୍ତ୍ରୀ ମହର୍ଗୀ ମାହାନ୍ତ ।
ସୂଚନାନୁସାରେ, ବିଜୁ ମାହାନ୍ତଙ୍କର ତାଙ୍କ ସ୍ତ୍ରୀଙ୍କ ସହ କୌଣସି କାରଣରୁ ଝଗଡ଼ା ହୋଇଥିଲା । ଝଗଡ଼ା ଏତେ ତୀବ୍ର ରୂପ ନେଇଥିଲା ଯେ, ବିଜୁ ଉତ୍ୟକ୍ତ ହୋଇ ଏକ ଛଡ଼ରେ ସ୍ତ୍ରୀକୁ ଆକ୍ରମଣ କରିଥିଲା । ଏହି ଆକ୍ରମଣ ସମୟରେ ଭାଉଜକୁ ବଞ୍ଚାଇବାକୁ ଯାଇ ମହର୍ଗୀ ମାହାନ୍ତ ସାମ୍ନାକୁ ପଳାଇ ଆସିଥିଲେ । ଯାହା ଫଳରେ ଲୁହା ରଡ଼ ତାଙ୍କ କାନ ପାଖରେ ବାଜିଥିଲା ଓ ପରେ ସେ ଗୁରୁତର ହୋଇଥିଲେ । ତାଙ୍କୁ ବଣାଇଁ ଡାକ୍ତରଖାନା ଅଣାଯାଇଥିଲେ ମଧ୍ୟ ସେଠାରେ ତାଙ୍କର ମୃତ୍ୟୁ ଘଟିଥିବା ଜଣାପଡ଼ିଛି । ଖବର ପାଇ ପୋଲିସ ଡାକ୍ତରଖାନାରେ ପହଞ୍ଚି ଶବ ଜବତ କରିବା ସହ ଘଟଣାର ତଦନ୍ତ ଚଳାଇଛି ।
