ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ ୬ ଦିନ ହେଲା ଆସିଲାଣି କିନ୍ତୁ ମୁଖ୍ୟମନ୍ତ୍ରୀଙ୍କୁ ନେଇ ସସପେନ୍ସ ଦୂର ହୋଇନାହିଁ । ଏହି ପ୍ରସଙ୍ଗରେ ଗୁରୁବାର ଅମିତ ଶାହ ଓ ଜେପି ନଡ୍ଡାଙ୍କୁ ଭେଟି ଆଲୋଚନା କରିଛନ୍ତି ମହାୟୁତିରେ ସାମିଲ ୩ ଦଳର ନେତା । ୧ ଘଣ୍ଟା ଧରି ହୋଇଥିବା ଏହି ବୈଠକ ପରେ ମଧ୍ୟ ମୁଖ୍ୟମନ୍ତ୍ରୀ କିଏ ହେବେ ସେନେଇ ସ୍ପଷ୍ଟ ହୋଇପାରି ନାହିଁ । ସିନ୍ଦେ ଗୋଷ୍ଠୀର ସୂତ୍ରରୁ ମିଳିଥିବା ସୂଚନା ଅନୁସାରେ, କେନ୍ଦ୍ରମନ୍ତ୍ରୀ ଅମିତ ଶାହଙ୍କ ସହ ବୈଠକରେ ଏକନାଥ ସିନ୍ଦେ କେତେକ ଦାବି ରଖିଛନ୍ତି । ଶିବସେନା ଲାଗି ସେ ବିଧାନ ପରିଷଦର ଅଧ୍ୟକ୍ଷ ପଦ ମାଗିଛନ୍ତି । ଏହା ସହ ୧୨ ମନ୍ତ୍ରୀ ପଦ ଲାଗି ଦାବି କରିଛନ୍ତି ସିନ୍ଦେ । ଏଥିରେ ଗୃହ ଏବଂ ସହରୀ ବିକାଶ ମନ୍ତ୍ରାଳୟ ମଧ୍ୟ ସାମିଲ ରହିଛି । କିନ୍ତୁ ବୈଠକରେ ଅମିତ ଶାହ, ସିନ୍ଦେଙ୍କ ଦାବି ପୂରଣ ହେବ କି ନାହିଁ କୌଣସି ପ୍ରତିଶ୍ରୁତି ଦେବେ ନାହିଁ । ସିନ୍ଦେଙ୍କ ଦାବିକୁ ନେଇ ରାଜ୍ୟରେ ପୁଣି ଥରେ ବୈଠକ ହେବ ବୋଲି କୁହାଯାଉଛି ।
ସୂଚନା ଅନୁସାରେ, ମୁଖ୍ୟମନ୍ତ୍ରୀ ହେବା ଲାଗି ସମ୍ମତି ଜଣାଇଛନ୍ତି ବିଜେପି ନେତା ଦେବେନ୍ଦ୍ର ଫଡ଼ନାଭିସ । ଯଦି ଦେବେନ୍ଦ୍ର ଫଡ଼ନାଭିସ୍ ମୁଖ୍ୟମନ୍ତ୍ରୀ ହୁଅନ୍ତି ତେବେ ତାଙ୍କ ପାଇଁ ଗୃହ ବିଭାଗ କେତେ ମହତ୍ବପୂର୍ଣ୍ଣ ତାହା ବିଜେପିକୁ ଭଲ ଭାବେ ଜଣାଅଛି । ଆଉ ଏଥି ପାଇଁ ମୁଖ୍ୟମନ୍ତ୍ରୀ ଦୌଡ଼ରୁ ଓହରିବା ପରେ ଏକନାଥ ସିନ୍ଦେ ଭାବିଚିନ୍ତି ନିଜର ଦାବି ରଖୁଛନ୍ତି । ଏକନାଥ ସିନ୍ଦେଙ୍କ ଦାବି ପାଇଁ ହିଁ ମହାରାଷ୍ଟ୍ରରେ ନୂଆ ସରକାର ଗଠନରେ ବିଳମ୍ବ ହେଉଛି । କୌଣସି ପରିସ୍ଥିତିରେ ସିନ୍ଦେଙ୍କ ଶିବସେନାକୁ ନାରାଜ କରିବାକୁ ଦେବ ନାହିଁ ବିଜେପି । ଯଦି ଗୃହ ମନ୍ତ୍ରାଳୟ ସିନ୍ଦେ ଗୋଷ୍ଠୀକୁ ନଦିଆଯାଏ ତେବେ ବିଜେପି ସହରୀ ବିକାଶ ସହ ଆଉ କିଛି ଗୁରୁତ୍ବପୂର୍ଣ୍ଣ ବିଭାଗ ଦେଇପାରେ ।
ଏମିତି ମଧ୍ୟ ଖବର ରହିଛି ଯେ, ଏକନାଥ ସିନ୍ଦେଙ୍କ ଅସନ୍ତୋଷ ଦୂର କରିବା ଲାଗି ବିଜେପି ତାଙ୍କୁ ଗୃହ ମନ୍ତ୍ରାଳୟ ଦେବା ଉପରେ ବିଚାର କରିପାରେ । ଯଦି ସିନ୍ଦେ ଅସନ୍ତୋଷ ପ୍ରକାଶ କରନ୍ତି ତେବେ ଏହାର ପ୍ରଭାବ କେବଳ ମହାରାଷ୍ଟ୍ର ନୁହେଁ ବରଂ କେନ୍ଦ୍ରରେ ଏନଡିଏ ସରକାରରେ ସାମିଲ ଛୋଟ ଦଳଗୁଡ଼ିକ ଉପରେ ପଡ଼ିପାରେ । ଏଭଳି ସ୍ଥିତିରେ ମହାରାଷ୍ଟ୍ର ସମୀକରଣ ସାହାଯ୍ୟରେ ବିଜେପି ଜଣାଇବାକୁ ଚେଷ୍ଟା କରିବ ଯେ, ଦଳ ନିଜର ସହଯୋଗୀଙ୍କୁ କେବେ ବି ହତାଦର କରେ ନାହିଁ ବରଂ ସମ୍ମାଦ ଦିଏ । ଏମିତି ମଧ୍ୟ କୁହାଯାଉଛି ଯେ, ମହାରାଷ୍ଟ୍ରରେ ଶପଥ ଗ୍ରହଣ ଉତ୍ସବ ଡିସେମ୍ବର ୫ରେ ହୋଇପାରେ ।
