ଲକ୍ଷ୍ନୌ, ୪।୨: ମଶାଣି ତାଙ୍କ ଘର । ଜପ-ତପରେ କଟେ ଜୀବନ । ମହାଦେବଙ୍କର ସବୁଠୁ ବଡ଼ ଉପାସକ । ଯାକଜମକଠାରୁ ବହୁ ଦୂରରେ ସେମାନେ । ଅଘୋରୀ ନାଁରେ ପରିଚିତ । ଏବେ ଜଣେ ଅଘୋରୀଙ୍କ ପ୍ରେମରେ ପଡ଼ିଛନ୍ତି ଋଷୀୟ ମହିଳା । ଠିକ୍ ଯେପରି ମହାଦେବଙ୍କ ପ୍ରେମରେ ପଡ଼ିଥିଲେ ପାର୍ବତୀ । ବାବାଙ୍କୁ ଜୀବନସାଥୀ କରିବେ ବୋଲି କହିଥିଲେ । ବିବାହ କରିବାକୁ କରିବାକୁ ସ୍ଥିର କରିଥିଲେ । ଆଉ ଶେଷରେ ବିବାହ କଲେ ମଧ୍ୟ । କେମିତି ଆରମ୍ଭ ହେଲା ଅଘୋରୀ ଆଉ ଋଷୀୟ ମହିଳାଙ୍କ ଏ ନିଆରା ପ୍ରେମ କାହାଣୀ । ଆସନ୍ତୁ ଜାଣିବା ।
ଗଣମାଧ୍ୟମ ରିପୋର୍ଟ ଅନୁସାରେ, ଏହି ଋଷୀୟ ମହିଳା ଭାରତ ଭ୍ରମଣରେ ଆସିଥିଲେ । ମହାକୁମ୍ଭ ମେଳାରେ ଜଣେ ଅଘୋରୀ ବାବାଙ୍କ ସହ ଭେଟ ହୋଇଥିଲା । ଧିରେ ଧିରେ ସେ ତାଙ୍କ ସହ ସମୟ ବିତାଇବାକୁ ଲାଗିଲେ । ପ୍ରଥମେ ବନ୍ଧୁତା ଆଉ ବନ୍ଧୁତାରୁ ସେ ବାବାଙ୍କ ପ୍ରେମରେ ପଡ଼ିଯାଇଥିଲେ । ପ୍ରେମରେ ନା ଧର୍ମ କଥା ଆସେ ନା ଜାତି । କାହିଁ କେତେ ବଡ଼ ବଡ଼ ମହାରଥୀ ନିଜର ସର୍ବସ୍ୱ ତ୍ୟାଗ କରି ଚାଲିଆସନ୍ତି ନିଜ ପ୍ରେମ ପାଖକୁ । ଠିକ୍ ସେହିପରି ମହିଳା ଜଣକ ଅଘୋରୀ ବାବାଙ୍କ ତାଙ୍କ ପାଇଁ ନିଜ ଦେଶ ଛାଡ଼ି ଭାରତ ଚାଲିଆସିଥିଲେ । ଆଉ ତାଙ୍କ ସହ ଏହିଠାରେ ହିଁ ରହିବାକୁ ନିଷ୍ପତ୍ତି ନେଲେ । ପରେ ଅଘୋରୀ ବାବାଙ୍କୁ ବିବାହ କରି ଜୀବନସାଥୀ ଭାବେ ଗ୍ରହଣ କଲେ । ମହିଳା ଜଣକ ନିଜ ନାଁ ବଦଳାଇ ନତାଶାରୁ କରିଛନ୍ତି ଚନ୍ଦ୍ରିକା ।
ଚନ୍ଦ୍ରିକା ପ୍ରୟାଗରାଜ ମହାକୁମ୍ଭ ମେଳାକୁ ବୁଲିବାକୁ ଆସିଥିଲେ । ସେ ଋଷିଆର ଜଣେ ଜଣାଶୁଣା ସେଲିବ୍ରିଟି । ଭାରତର ସନାତନ ଧର୍ମ ତାଙ୍କୁ ଏତେ ମାତ୍ରାରେ ପ୍ରଭାବିତ କରିଥିଲା ଯେ, ତାଙ୍କ ପୂରା ଶରୀରରେ ସନାଧର୍ମ ସହ ଜଡ଼ିତ ଟାଟୁ ଓ ମନ୍ତ୍ର ଖୋଦିତ ହୋଇଛି । ସେ ଆଜୀବନ ସ୍ୱଦେଶ ଛାଡ଼ି ଭାରତରେ ବାସ କରିବାକୁ ନିଷ୍ପତ୍ତି ନେଲେ । ହିନ୍ଦୁ ଧର୍ମ ଓ ଆସ୍ଥା ଉପରେ ସେ ଖୁବ୍ ବିଶ୍ୱାସ କରନ୍ତି । ସେ ଭଗବାନ ଗଣେଶଙ୍କର ବଡ଼ ଭକ୍ତ । ତାଙ୍କ ପିଠିରେ ଗଣେଶଙ୍କ ଟାଟୁ ସହ ଏକାଧିକ ମନ୍ତ୍ର ଲେଖାହୋଇଛି । ତେବେ ମହାକୁମ୍ଭରେ ହିଁ ଉଭୟ ପରସ୍ପରଙ୍କୁ ବିବାହ କରିଥିଲେ । ଯାହା ପରେ ବାବାଙ୍କୁ ମହିଳା ଜଣକ ନିଜ ସ୍ୱାମୀ ଭାବେ ଗ୍ରହଣ କରିଥିବା କୁହାଯାଉଛି ।
ଚଳିତ ମହାକୁମ୍ଭରେ ମହିଳା ଓ ବାବା ଉଭୟଙ୍କ ଫଟୋ ଓ ଭିଡିଓ ଭାଇରାଲ ହେବାରେ ଲାଗୁଛି । ଭିଡିଓରେ ମହିଳା ଜଣକ ଅଘୋରୀ ବାବାଙ୍କୁ ନିଜର ସ୍ୱାମୀ ବୋଲି କହିଛନ୍ତି । ଋଷୀୟ ମହିଳାଙ୍କ ଯୋଗୁଁ ତପସ୍ୟା ବାଧାପ୍ରାପ୍ତ ହେଉଛି କି ? ବୋଲି ପ୍ରଶ୍ନ କରିବାରୁ ଅଘୋରୀ ବାବା କିଛି ନ କହି ମୁରୁକି ହସିଦେଇଥିଲେ । ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ବିଦେଶୀ ମହିଳା ହିନ୍ଦୁ ଧର୍ମକୁ ଆପଣେଇବା ପରେ ସନାତନ ଧର୍ମକୁ ପ୍ରଶଂସା କରୁଛନ୍ତି । ଭିଡିଓରେ ଚନ୍ଦ୍ରିକା ଧର୍ମର ଗୁରୁତ୍ୱ ଓ ଆଧ୍ୟାତ୍ମିକ ଯାତ୍ରା ବିଷୟରେ କହିଛନ୍ତି । ତେବେ ଏ ପର୍ଯ୍ୟନ୍ତ ଅଘୋରୀ ବାବାଙ୍କ ପରିଚୟ ସମ୍ପର୍କିତ କୌଣସି ପ୍ରମାଣ ମିଳିପାରିନାହିଁ । ତାଙ୍କ ବିବାହ ସତ କି ନୁହେଁ, ତାହା ମଧ୍ୟ ସ୍ପଷ୍ଟ ହୋଇନାହିଁ ।
