ନୂଆଦିଲ୍ଲୀ,୨୬/୧୦: ଟାଟା ଗ୍ରୁପ୍ର ପୂର୍ବତନ ମଙ୍ଗୁଆଳ ତଥା ଦେଶର ମହାନ ଉଦ୍ୟୋଗପତି ସ୍ୱର୍ଗତ ରତନ ଟାଟା ମୃତ୍ୟୁ ବାଦ୍ ପ୍ରାୟ ୧୦,୦୦୦ କୋଟି ଟଙ୍କାର ସମ୍ପତ୍ତି ଛାଡ଼ିଯାଇଛନ୍ତି । ତାଙ୍କ ୱିଲ୍ ବା ଇଚ୍ଛାପତ୍ରରେ ସେ ଅନେକ ଲୋକଙ୍କ ନାଁ ସାମିଲ କରିଛନ୍ତି । ଏହି ତାଲିକାରେ ଅଛନ୍ତି ସାନ୍ତନୁ ନାଇଡୁ, ଯିଏକି ରତନ ଟାଟାଙ୍କ ଅତି ଘନିଷ୍ଠ ଭାବେ ଜଣା । ଟାଟା ଜୀବିତ ଥିବା ସମୟରେ ତାଙ୍କ ପାଖେ ପାଖେ ରହୁଥିଲେ ଶାନ୍ତନୁ । ଦୁଇ ଜଣଙ୍କ ମଧ୍ୟରେ ଅତ୍ୟନ୍ତ ଘନିଷ୍ଠ ସମ୍ପର୍କ ଥିଲା । ଉଭୟ ଥିଲେ କୁକୁରପ୍ରେମୀ । ଏହା ହିଁ ଦୁହିଁଙ୍କୁ ପରସ୍ପରର ନିକଟତର କରିଥିଲା । ଶାନ୍ତନୁଙ୍କ ଷ୍ଟାର୍ଟଅପ୍ରେ ନିବେଶ କରିଥିଲେ ରତନ ଟାଟା, ଯେଉଁ ଷ୍ଟାର୍ଟଅପ୍ କୁକୁରମାନଙ୍କ କଲ୍ୟାଣ ଦିଗରେ କାର୍ଯ୍ୟ କରୁଥିଲା । ଟାଟା ଏବଂ ନାଇଡୁଙ୍କ ମଧ୍ୟରେ ଥିବା ସମ୍ପର୍କକୁ ନେଇ ଅନେକ ସମୟରେ ଗଣମାଧ୍ୟମରେ ଚର୍ଚ୍ଚା ହେଉଥିଲା । ଟାଟାଙ୍କ ଅନ୍ତିମ ସଂସ୍କାର ବେଳେ ଗଣମାଧ୍ୟମର ଦୃଷ୍ଟି ଆକର୍ଷଣ କରିଥିଲେ ନାଇଡୁ ।
ରତନ ଟାଟାଙ୍କ ଏକ୍ଜିକ୍ୟୁଟିଭ୍ ଆସିଷ୍ଟାଣ୍ଟ ଶାନ୍ତନୁ ନାଇଡୁଙ୍କ ନାଁ ୱିଲ୍ରେ ସାମିଲ ଅଛି । ନାଇଡୁଙ୍କ କମ୍ପାନି ଗୁଡ୍ଫେଲୋରେ ଟାଟା ନିଜ ଅଂଶଧନ ଛାଡ଼ି ଦେଇଛନ୍ତି । ଏହାସହିତ ସେ ନାଇଡୁଙ୍କ ଦ୍ୱାରା ବିଦେଶରେ ଶିକ୍ଷା ପାଇଁ ନିଆଯାଇଥିବା ବ୍ୟକ୍ତିଗତ ଋଣକୁ ବି କ୍ଷମା କରିଦେଇଛନ୍ତି ।
କୁକୁରମାନଙ୍କ ପ୍ରତି ଉଭୟଙ୍କ ଚିନ୍ତା ସେମାନଙ୍କୁ ପରସ୍ପର ଆଡ଼କୁ ଟାଣିଥିଲା । ପରେ ପୁଣେଭିତ୍ତିକ ଏହି ଯୁବ ଉଦ୍ୟୋଗୀ ଟାଟା ଗ୍ରୁପ୍ କମ୍ପାନିରେ କାର୍ଯ୍ୟ କଲେ । ନାଇଡୁ ଏହା ପରେ ଆମେରିକାକୁ ନିଜ ମାଷ୍ଟର ଡିଗ୍ରୀ କରିବାକୁ ଯାଇଥିଲେ ଏବଂ ଫେରିବା ପରେ ଟାଟା ସନ୍ସର ସେବାନିବୃତ ଅଧ୍ୟକ୍ଷ ରତନ ଟାଟାଙ୍କ ଘରୋଇ ଅଫିସ୍ରେ ଯୋଗ ଦେଇଥିଲେ । ବିଭିନ୍ନ ପ୍ରକାର ନିଷ୍ପତ୍ତି ନେବାରେ ନାଇଡୁ ଟାଟାଙ୍କୁ ସହଯୋଗ କରୁଥିଲେ । ନାଇଡୁଙ୍କଠାରୁ ଗୁରୁତ୍ୱପୂର୍ଣ୍ଣ ଆଇଡିଆ ଗ୍ରହଣ କରୁଥିଲେ ଟାଟା ।
ନିଜ ଜର୍ମାନ ଶେଫର୍ଡ କୁକୁର ଟିଟୋର ଦେଖାରେଖା କରିବା ପାଇଁ ବି ରତନ ଟାଟା ୱିଲ୍ରେ ପ୍ରବନ୍ଧନ କରିଛନ୍ତି । ଭାରତରେ ଏହା ପ୍ରଥମ ଯେଉଁଠି ଜଣେ ଉଦ୍ୟୋଗପତି ନିଜ ୱିଲ୍ରେ ଏଭଳି ବ୍ୟବସ୍ଥା କରିଛନ୍ତି । ପାଶ୍ଚାତ୍ୟ ଦେଶଗୁଡ଼ିକରେ ପୋଷା ଜନ୍ତୁମାନଙ୍କ ପାଇଁ ସମ୍ପତ୍ତି ଛାଡ଼ିବା ଅସାମାନ୍ୟ ନୁହେଁ କିନ୍ତୁ ଭାରତରେ ଏହା ଦୁର୍ଲଭ । ଟିଟୋକୁ ରତନ ଟାଟା ୬ ବର୍ଷ ତଳେ ପୋଷ୍ୟ ଭାବେ ଗ୍ରହଣ କରିଥିଲେ ।
ରତନ ଟାଟା ନିଜ ଫାଉଣ୍ଡେଶନ୍, ଭାଇ ଜିମି ଟାଟା, ସାବତ ଭଉଣୀ ଶିରିନ୍ ଏବଂ ଡିଏନା ଜିଜିଭୟ, ହାଉସ୍ ଷ୍ଟାଫ ଏବଂ ଅନ୍ୟ ଲୋକମାନଙ୍କୁ ନିଜ ସମ୍ପତ୍ତିର ଅଂଶୀଦାର ବନାଇଛନ୍ତି । ଟାଟାଙ୍କ ସମ୍ପତ୍ତିରେ ଅଲିବାଗରେ ୨୦୦୦ ବର୍ଗଫୁଟ୍ ବଙ୍ଗଳା, ମୁମ୍ବାଇର ଜୁହୁରେ ଦୁଇ ମହଲା କୋଠା, ୩୫୦ କୋଟିର ଏଫ୍ଡି ଏବଂ ଟାଟା ଗ୍ରୁପ୍ର ହୋଲ୍ଡିଂ କମ୍ପାନି ଟାଟା ସନ୍ସରେ ୦.୮୩% ଅଂଶଧନ ସାମିଲ ଅଛି ।