ନୂଆଦିଲ୍ଲୀ: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ୨୦୨୫ ମାର୍ଚ୍ଚ ୨୧ରେ ଆରମ୍ଭ ହେବାକୁ ଥିବା ବଳେ ମେ’ ୨୫ରେ ଶେଷ ହେବ । ଏନେଇ ଜାତୀୟ ଗଣମାଧ୍ୟମ ‘ଇଣ୍ଡିଆ ଟୁଡେ’କୁ ପ୍ରତିକ୍ରିୟା ଦେଇ କହିଛନ୍ତି ବିସିସିଆଇର ଉପସଭାପତି ରାଜୀବ ଶୁକ୍ଳା । ଜାନୁଆରୀ ୧୨ (ରବିବାର)ରେ ରାଜୀବ ଶୁକ୍ଳା, ଆଇପିଏଲର ପ୍ରଥମ ଏବଂ ଫାଇନାଲ୍ ମ୍ୟାଚ୍ ସଂପର୍କରେ ସୂଚନା ଦେଇଛନ୍ତି । ଆଜି ବିସିସିଆଇର ଗୁରୁତ୍ବପୂର୍ଣ୍ଣ ବୈଠକରେ ନୂଆ କୋଷାଧ୍ୟକ୍ଷ ଏବଂ ସଚିବ ନିଯୁକ୍ତି ଉପରେ ସହମତି ହୋଇଛି ।
ଆଜିର ବୈଠକରେ ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍)ର ଭେନ୍ୟୁକୁ ନେଇ ମଧ୍ୟ ନିଷ୍ପତ୍ତି ହୋଇଛି । ଆଇପିଏଲ-୨୦୨୪ ମାର୍ଚ୍ଚ ୨୨ରେ ଆରସିବି ଏବଂ ସିଏସକେ ମ୍ୟାଚ୍ ସହ ଆରମ୍ଭ ହୋଇଥିଲା । ମେ’ ୨୬ରେ ଫାଇନାଲ୍ ମ୍ୟାଚ୍ ଅନୁଷ୍ଠିତ ହୋଇଥିବା ବେଳେ କେକେଆର ଟ୍ରଫି ଜିତିଥିଲା । ଏହା ପୂର୍ବରୁ ରାଜୀବ ଶୁକ୍ଳା ଭୁଲରେ ମାର୍ଚ୍ଚ ୨୩ରେ ଆଇପିଏଲ ଆରମ୍ଭ ହେବ ବୋଲି କହିଥିଲେ । ପରେ ମାର୍ଚ୍ଚ ୨୧ରେ ଆଇପିଏଲ-୨୦୨୫ ଆରମ୍ଭ ହେବ ବୋଲି ସେ ସ୍ପଷ୍ଟ କରିଛନ୍ତି ।
ସେପଟେ ଜାନୁଆରୀ ୧୮-୧୯ରେ ଆଉ ଏକ ବୈଠକ ଲାଗି ସମୟ ଧାର୍ଯ୍ୟ ହୋଇଛି । ଏହି ବୈଠକରେ ଆଗାମୀ ଚାମ୍ପିୟନ୍ସ ଟ୍ରଫି ଲାଗି ଟିମ୍ ଚୟନ ହେବ । ସୂଚନଯୋଗ୍ୟ, ଆଇପିଏଲ ୨୦୨୫ ଲାଗି ହୋଇଥିବା ମେଗା ଅକ୍ସନରେ ମୋଟ ୧୮୨ ଜଣ ପ୍ଲେୟାର ୬୩୯.୧୫ କୋଟିରେ ବିକ୍ରି ହୋଇଥିଲେ । ସାଉଦି ଆରବର ଜେଦାରେ ଅନୁଷ୍ଠିତ ୨ ଦିନିଆ ମେଗା ଅକ୍ସନରେ ୧୦ଟି ଟିମ୍ ନିଜକୁ ଦୃଢ଼ କରିବା ପାଇଁ ସବୁ ପ୍ରକାର ଚେଷ୍ଟା କରିଥିଲେ । ଏଥର ଆଇପିଏଲ ଅକ୍ସନରେ ସର୍ବାଧିକ ୨୭ କୋଟି ଟଙ୍କାରେ ଋଷଭ ପନ୍ତ ବିକ୍ରି ହୋଇଥିବା ବେଳେ ତାଙ୍କ ପରେ ଶ୍ରେୟସ ଆୟର (୨୬.୭୫ କୋଟି) ଏବଂ ଭେଙ୍କଟେଶ ଆୟର ୨୩.୭୫ କୋଟି ଟଙ୍କାରେ ବିକ୍ରି ହୋଇଛନ୍ତି । ସେହିଭଳି ଡେଭିଡ ଓ୍ବାର୍ଣ୍ଣର, ପୃଥ୍ବୀ ଶ ଏବଂ ଶାର୍ଦ୍ଦୁଳ ଠାକୁରଙ୍କ ଭଳି ପ୍ଲେୟାରଙ୍କୁ କୌଣସି ଟିମ୍ କ୍ରୟ କରିନାହାନ୍ତି ।
