ସମ୍ବଲପୁର,୩୦|୫(ବ୍ୟୁରୋ): ସମ୍ବଲପୁର ଜିଲ୍ଲାପାଳ କାର୍ଯ୍ୟାଳୟଠାରେ ବର୍ଷାରେ ଫସଲ ନଷ୍ଟ ନେଇ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀଙ୍କ ଭିଡିଓ କନଫେରେସିଂ ମାଧ୍ୟମରେ ସମୀକ୍ଷା ବୈଠକ। ଏଥିରେ ବିଭିନ୍ନ ଜିଲ୍ଲାର ଜିଲ୍ଲାପାଳଙ୍କ ସମେତ ଉପ ମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ର ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର, କୃଷି ସଚିବ ଅରବିନ୍ଦ ପାଢ଼ୀ ଏବଂ ଆଞ୍ଚଳିକ ପାଣିପାଗ ନିର୍ଦେଶକ ମନୋରମା ମହାନ୍ତି ଉପସ୍ଥିତ ଥିଲେ।
ଅଦିନିଆ ବର୍ଷାରେ ଅନେକ ଫସଲ ନଷ୍ଟ ହୋଇଛି। ବଲାଙ୍ଗୀର ଓ ନୂଆପଡାରେ ଏନେଇ ଅଧିକ କ୍ଷୟକ୍ଷତି ହେଇଛି। ଏହା ସହ ଅନ୍ୟାନ୍ୟ ଜିଲାରେ ମଧ୍ୟ ବ୍ୟାପକ କ୍ଷୟକ୍ଷତି ହୋଇଛି। ଯେପରି କୌଣସି ବ୍ୟକ୍ତି କ୍ଷତିପୂରଣରୁ ବଞ୍ଚିତ ନ ହେବେ, ସେଥିପାଇଁ ରାଜ୍ୟ ସରକାର ତତ୍ପର ଅଛନ୍ତି। ଯାହାର ଘର ଭାଙ୍ଗିଛି ପ୍ରଥମ ପର୍ଯ୍ୟାୟରେ ତାଙ୍କ ନିକଟରେ ପର୍ଯ୍ୟାପ୍ତ ପରିମାର ପଲିଥିନ ପହଁଚିବା ଆବଶ୍ୟକ ରହିଛି ଓ ପ୍ରାକୃତିକ ବିପର୍ଯ୍ୟୟର ୩ ଦିନ ମଧ୍ୟରେ ସମସ୍ତ ରିପୋର୍ଟ ଆସିବା ଲାଗି ସମସ୍ତ ଜିଲ୍ଲା ପ୍ରଶାସନକୁ କୁହାଯାଇଛି। ଚତୁର୍ଥ ଦିନ ହିଁ ସମସ୍ତ ହିତାଧିକାରୀଙ୍କୁ ଟଙ୍କା ଦିଆଯାଉଛି। ଯେଉଁଠି ଅଧିକ କ୍ଷୟକ୍ଷତି ହେଇଛି ତାର ନିକଟବର୍ତ୍ତୀ ରାଜସ୍ୱ ବିଭାଗର ଅଧିକାରୀଙ୍କୁ ମଧ୍ୟ କ୍ଷୟକ୍ଷତି ଆକଳନ କରିବା ପାଇଁ ନିୟୋଜିତ କରାଯାଉଛି।
ଡିସେମ୍ବରରୁ ଜୁନ ପର୍ଯ୍ୟନ୍ତ ହେଉଥିବା ଅଦିନିଆ ବର୍ଷାରେ ମଧ୍ୟ ହିତାଧିକାରୀଙ୍କୁ ଟଙ୍କା ଦିଆ ଯିବ। ଓଡ଼ିଶାରେ ବିଜୁଳିରେ ଅଧିକ ମୃତ୍ୟୁ ହେଉଥିବାରୁ ଜଙ୍ଗଲ ବିଭାଗକୁ ୬ କୋଟି ଟଙ୍କା ଦିଆଯାଇଛି। ଅଧିକରୁ ଅଧିକ ତାଳ ଗଛ ଲଗାଗଲେ ବିଜୁଳିର ପ୍ରକୋପ କମିବ। ପ୍ରାକୃତିକ ବିପର୍ଯ୍ୟୟ ପାଇଁ ଯେକୌଣସି କ୍ଷୟକ୍ଷତି ହେବ ସମସ୍ତଙ୍କୁ କ୍ଷତି ପୂରଣ ଦିଆଯାଉଛି। ମୌସୁମୀ ପହଁଚୁ ପହଁଚୁ ଏହି ସମୀକ୍ଷା ବୈଠକ କରାଯାଇଛି। ରାଜସ୍ୱ ବିଭାଗ ପାଖରେ ପର୍ଯ୍ୟାପ୍ତ ପରିମାଣର ଅର୍ଥରାଶି ରହିଛି। ସମସ୍ତ ଜିଲ୍ଲାପାଳଙ୍କୁ ଏନେଇ ରିପୋର୍ଟ ମଗାଯାଇଛି। କେହି ବି କ୍ଷତି ପୂରଣରୁ ବଞ୍ଚିତ ହେବେ ନାହିଁ ବୋଲି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି।
