କୋରେଇ, ୧୦/୧୦ : ଯାତ୍ରା ମଞ୍ଚରେ ଆଇଟମ୍ ଡ୍ୟାନ୍ସ ପରିବେଷଣ ବେଳେ ଅଶ୍ଳୀଳ ନୃତ୍ୟକୁ ବିରୋଧ କରି ଦର୍ଶକ ନିଶା ମହାରଣାଙ୍କୁ ଚେୟାର ମାଡ଼ କରିଥିବା ଘଟଣା ଚର୍ଚ୍ଚାର ବିଷୟ ପାଲଟିଛି । ଏଥିରେ ନିଶାଙ୍କର ମୁଣ୍ଡରେ ଆଘାତ ଲାଗିଛି । ଏହାକୁ ନେଇ ସେ କୋରେଇ ଥାନାରେ ଅଭିଯୋଗ କରିଥିବା ସୂଚନା ମିଳିଛି । ରଗଡ଼ି ନିକଟସ୍ଥ ମା’ କାମୁଡ଼େଇ ପୀଠ ନିକଟରେ ସ୍ଥାନୀୟ ଯୁବକ ସଂଘ ଆୟୋଜନରେ ଯାତ୍ରା ସ୍ୱପ୍ନ ମହଲ ଚଳିତ ମାସ ୬ ତାରିଖଠାରୁ ଯାତ୍ରା ପରିବେଷଣ କରୁଛି ।
ମଙ୍ଗଳବାର ରାତିରେ ଆଇଟମ୍ ଗାର୍ଲ ନିଶା ମହାରଣା ନୃତ୍ୟ ପରିବେଷଣ ପାଇଁ ଆସିଥିଲେ । ନିଶା ନୃତ୍ୟ ପରିବେଷଣ କରୁଥିବା ସମୟରେ ସ୍ଥାନୀୟ ପରମାନନ୍ଦପୁର ଗ୍ରାମର ଜଣେ ଯୁବକ ତାଙ୍କୁ ଲକ୍ଷ୍ୟ କରି ଏକ ଚେୟାର ଫିଙ୍ଗିଥିଲେ । ଚେୟାରଟି ସିଧା ନିଶାଙ୍କ ମୁଣ୍ଡରେ ବାଜିଥିଲା । ଏଥିରେ ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା । ଯୁବକ ସଂଘ ଓ କୋରେଇ ପୁଲିସ ସହାୟତାରେ ନିଶାଙ୍କୁ କୋରେଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ନିଶାଙ୍କୁ ଚେୟାର ମାଡ଼ ଘଟଣାକୁ କିଛି ଦର୍ଶକ ବିରୋଧ କରିବା ସହ କାହିଁକି ତାଙ୍କୁ ଯାତ୍ରା ମଞ୍ଚକୁ ଅଣାଯାଇଥିଲା ବୋଲି ପ୍ରଶ୍ନ ଉଠାଇଥିଲେ । ଯାହାକୁ ନେଇ କିଛି ସମୟ ଉତ୍ତେଜନା ପ୍ରକାଶ ପାଇବା ସହ ଯାତ୍ରା ପରିବେଷଣ ବନ୍ଦ ହୋଇଥିଲା । ପରେ ସଂଘ ଓ ପୁଲିସ ପକ୍ଷରୁ ପରିସ୍ଥିତିକୁ ନିୟନ୍ତ୍ରଣ କରାଯାଇଥିଲା । ପରେ ଯାତ୍ରା ପରିବେଷଣ କରାଯାଇଥିଲା ।
ଘଟଣାକୁ ନେଇ ବୁଧବାର ନିଶା ଚେୟାର ଫିଙ୍ଗିଥିବା ଯୁବକଙ୍କ ବିରୋଧରେ କୋରେଇ ଥାନାରେ ଅଭିଯୋଗ କରିଛନ୍ତି । ଯାତ୍ରା କମିଟିର ସଭାପତି କଳାକାର ବାରିକଙ୍କ ସହିତ ଯୋଗାଯୋଗ କରିବାରୁ ସେ ଘଟଣାକୁ ନେଇ କ୍ଷୋଭ ପ୍ରକାଶ କରିବା ସହିତ ଯାତ୍ରା ପରିବେଷଣ ଓ ନିଶାଙ୍କ ନୃତ୍ୟ ଶୃଙ୍ଖଳାର ସହ ହେଉଥିଲା ବୋଲି କହିଥିଲେ । କେହି ଜଣେ ଯୁବକ ପେଣ୍ଡାଲକୁ ଚେୟାର ଫିଙ୍ଗିଥିବା ବେଳେ ଚେୟାରଟି ନିଶାଙ୍କ ମୁଣ୍ଡରେ ବାଜିଥିବା କହିଥିଲେ । ନିଶା ମହାରଣା କହିଛନ୍ତି, ବହୁ ଦର୍ଶକ ଶୃଙ୍ଖଳାର ସହ ଯାତ୍ରା ଦେଖୁଥିଲେ । କେହି ଜଣେ ଯୁବକ କ୍ରୋଧାନ୍ୱିତ ହୋଇ ଚେୟାର ପେଣ୍ଡାଲକୁ ପକାଇ ଦେବାରୁ ତାହା ତାଙ୍କ ମୁଣ୍ଡରେ ବାଜିଥିଲା । ଏହାକୁ ନେଇ ସେ ଆଇନ୍ର ଆଶ୍ରୟ ନେଇଛନ୍ତି ।
