ଆଠଗଡ଼,୨୪/୦୧: ବିଳମ୍ବିତ ରାତ୍ରରେ ଘନ କୁହୁଡ଼ି ଯୋଗୁଁ ଓଲଟିଲା ଗୋରୀ ନାମକ ଘରୋଇ ଯାତ୍ରୀବାହୀ ବସ୍ । ଘଟଗାଁ ତାରିଣୀ ଦର୍ଶନ ସାରି ଫେରୁଥିବା ବେଳେ ପୁରୁଣା କଟକ-ସମ୍ବଲପୁର ରାସ୍ତାର ଦ୍ଵାରବତୀପୁର ଗାଁ ପାଖରେ ରାସ୍ତା ତଳକୁ ଖସି ପଡିଲା ବସ୍ । ୨ ଜଣ ଗୁରୁତର ଆହତଙ୍କୁ କଟକ ସ୍ତାନାନ୍ତର କରାଯାଇଛି । କଟକ ଜିଲ୍ଲା ଆଠଗଡ଼ ଅଞ୍ଚଳରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଗୋରୀ ନାମକ ଏକ ଯାତ୍ରୀବାହୀ ବସ୍ ଆଠଗଡ଼ ମହାକାଳବସ୍ତ ଝରଣ ଗାଁର ୨୫ ରୁ ଉର୍ଦ୍ଧ୍ୱ ଯାତ୍ରୀଙ୍କୁ ଘଟଗାଁ ତାରିଣୀ ଦର୍ଶନ ପାଇଁ ନେଇ ଯାଇଥିଲା । ଗୁରୁବାର ବିଳମ୍ୱିତ ରାତିରେ ସେଠାରୁ ଦର୍ଶନ ସାରି ଫେରିବା ବେଳେ ଘନ କୁହୁଡ଼ି ହେବା କାରଣରୁ କଟକ-ସମ୍ବଲପୁର ରାସ୍ତାର ଦ୍ଵାରବତୀପୁର ଗାଁ ପାଖରେ ବସ୍ଟି ଓଲଟି ପଡ଼ିଥିଲା । ଫଳରେ ବସ୍ରେ ଥିବା ଯାତ୍ରୀଙ୍କ ମଧ୍ୟରୁ ୨ ଜଣ ଗୁରୁତର ହୋଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବରେ ଉଦ୍ଧାର କରିଛି । ଏହା ସହ ଗୁରୁତରଙ୍କୁ ତୁରନ୍ତ କଟକ ସ୍ଥାନାନ୍ତର କରାଇଛି ।
