ଭୁବନେଶ୍ଵର, ୧୨/୦୭ : ମୋହନ ସରକାରର ପ୍ରଥମ ପୂର୍ଣ୍ଣାଙ୍ଗ ବଜେଟ୍ ପାଇଁ ବସିଛି ପ୍ରାକ୍ ବଜେଟ୍ ପରାମର୍ଶ ବୈଠକ। ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଧ୍ୟକ୍ଷତାରେ ଲୋକସେବା ଭବନରେ ଆରମ୍ଭ ହୋଇଛି ଏହି ପରାମର୍ଶ ବୈଠକ। ବୈଠକରେ ସାମିଲ ହୋଇଛନ୍ତି ବିଭିନ୍ନ ବର୍ଗର ୮୦ ରୁ ଅଧିକ ବିଶେଷଜ୍ଞ।   

ସୂଚନାନୁଯାୟୀ, ୨୦୨୪-୨୫ ବଜେଟ୍ ରୂପରେଖ ପ୍ରସ୍ତୁତ ନେଇ ବିସ୍ତୃତ ଭାବେ ଆଲୋଚନା ଚାଲିଛି। ବିଜେପି ନେତୃତ୍ଵାଧୀନ ନୂଆ ସରକାର ଦେଇଥିବା ନିର୍ବାଚନ ପ୍ରତିଶ୍ରୁତି ପୂରଣ ପାଇଁ ବଜେଟ୍‌ରେ ବିଭିନ୍ନ ନୂଆ ଯୋଜନା ପାଇଁ ବ୍ୟୟ ବରାଦ ହୋଇପାରେ ବୋଲି ଅନୁମାନ କରାଯାଉଛି।

ପ୍ରକାଶ ଥାଉକି, ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନା କରିବେ ମୁଖ୍ୟମନ୍ତ୍ରୀ ମୋହନ ମାଝୀ। ଏଥିପାଇଁ ଅର୍ଥ ବିଭାଗ ପକ୍ଷରୁ ଆରମ୍ଭ ହୋଇଛି ପ୍ରସ୍ତୁତି। ଏଥର ରାଜ୍ୟ ବଜେଟ୍‌ରେ ରାଜ୍ୟବାସୀଙ୍କ ଆଶା, ଆକାଂକ୍ଷାକୁ ପ୍ରତିଫଳିତ କରିବା ସହ ବିଭାଗଗୁଡ଼ିକୁ ଅଧିକ କାର୍ଯ୍ୟକ୍ଷମ କରିବା ଉପରେ ମୁଖ୍ୟମନ୍ତ୍ରୀ ଜୋର୍ ଦେବେ। ସାଧାରଣ ନିର୍ବାଚନ ପାଇଁ ପୂର୍ବ ସରକାର କାମଚଳା ବଜେଟ୍ ଉପସ୍ଥାପନା କରିଥିଲେ। ଏପ୍ରିଲ୍‌ରୁ ଜୁଲାଇ ଯାଏ ଚାରି ମାସ ପାଇଁ ଏହି ବଜେଟ୍ ଉପସ୍ଥାପନା ହୋଇଥିଲା।