ଯାଜପୁର,୧୯/୧୦: ଦଶହରାର ୫ ଦିନ ପରେ ପାଣିକୁ ନଯାଇ ମଣ୍ଡପରେ ରହିଛନ୍ତି ମା' ଦୁର୍ଗା । ଯାଜପୁର ଟାଉନ ଥାନା ଅନ୍ତର୍ଗତ ରାମ୍ବାଗ ଠାରେ ଏଭଳି ଘଟଣା ଦେଖିବାକୁ ମିଳିଛି ।
ସୂଚନା ମୁତାବକ, ପୂଜା ମଣ୍ଡପ ଏବଂ ଏହାର ପାଖ ଯାଗାକୁ ନେଇ ପୂଜା କମିଟି ଓ ଜମି ମାଲିକଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା । ଏହି ଜମିକୁ ନେଇ ୧୪୪ ଧାରା ଜାରି ହୋଇଥିବାରୁ ମା'ଙ୍କ ମଣ୍ଡପ ସମ୍ମୁଖରେ ଜମି ମାଲିକଙ୍କ ବାଲି ପଡି ରହିଛି । ଏହି କାରଣରୁ ଠାକୁର ମଣ୍ଡପରୁ ବାହାରି ପାରୁନଥିବା ପୁଜା କମିଟି ଅଭିଯୋଗ କରିଥିଲା । ଅନ୍ୟପଟେ ୧୬୩ ଧାରା ଲଗାଇ ଯାଗା ଉପରକୁ ଯିବାକୁ ରୋକ ଲଗାଇଥିବା ନେଇ ଜମି ମାଲିକ କହିଛନ୍ତି । ଏଭଳି ସ୍ଥିତିରେ ପୂଜା କମିଟି ଠାକୁରଙ୍କୁ ଭସାଣି କରପାରୁ ନାହିଁ ଏବଂ କୋର୍ଟଙ୍କ ନିର୍ଦ୍ଦେଶକୁ ମଧ୍ୟ ଅବମାନନା କରିପାରୁନାହିଁ । ତେଣୁ ମା'ଙ୍କ ବିସର୍ଜନରେ ପ୍ରଶାସନ ହସ୍ତକ୍ଷେପ କରିବାକୁ ଦାବି କରିଛନ୍ତି ।
ଅନ୍ୟପଟେ ଦେବୀଙ୍କ ବିସର୍ଜନ ଲାଗି ପୋଲିସ ନିକଟରେ ଅଭିଯୋଗ ହୋଇନଥିବା ବେଳେ ଥାନା ଅଧିକାରୀ ତହସିଲଦାରଙ୍କୁ ଖୁବ୍ ଶୀଘ୍ର ମା'ଙ୍କ ଭସାଣି କରାଇବାକୁ ନିର୍ଦ୍ଦେଶ ଦିଆଯାଇଛି । କିପରି ଶୀଘ୍ର ମା'ଙ୍କ ଭସାଣି କାର୍ଯ୍ୟ କରାଯିବ ସେଥିପାଇଁ ଉଭୟଙ୍କୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି ସହକାରୀ ଜିଲ୍ଲାପାଳ ତଥା ନିର୍ବାହି ମାଜିଷ୍ଟ୍ରେଟ ସୁକାନ୍ତ କୁମାର ଦାସ ।
