ନୂଆଦିଲ୍ଲୀ: ଜାମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଛି। ଏହି ଆକ୍ରମଣର ଜବାବରେ ଭାରତୀୟ ସୈନ୍ୟବାହିନୀ ମଇ ୭ ତାରିଖ ମଧ୍ୟ ରାତିରେ ‘ଅପରେସନ୍ ସିନ୍ଦୁର’ ଜରିଆରେ ପାକିସ୍ତାନ ଓ ପାକିସ୍ତାନ ଅଧିକୃତ ଜାମ୍ମୁ ଓ କାଶ୍ମୀର (ପିଓକେ)ରେ ଥିବା ନଅଟି ଆତଙ୍କବାଦୀ ଶିବିର ଉପରେ ଜୋରଦାର ଆକ୍ରମଣ କରିଥିଲା। ଏହାର ପ୍ରତିଶୋଧ ସ୍ୱରୂପ ପାକିସ୍ତାନ ମଇ ୮ତାରିଖ ମଧ୍ୟରାତ୍ରରେ ଜାମ୍ମୁ, ପଞ୍ଜାବ ଓ ରାଜସ୍ଥାନର ବିଭିନ୍ନ ସ୍ଥାନରେ ଡ୍ରୋନ୍ ଓ ମିସାଇଲ୍ ଆକ୍ରମଣ କରିଥିଲା। ଯାହାକୁ ଭାରତୀୟ ବାୟୁ ପ୍ରତିରକ୍ଷା ବ୍ୟବସ୍ଥା ସଫଳତାର ସହ ବିଫଳ କରିଥିଲା।
ପାକିସ୍ତାନ ବାୟୁସେନା ଶୁକ୍ରବାର ଦିନ ସ୍ୱୀକାର କରିଛି ଯେ ସେମାନେ ଭାରତ ବିରୋଧରେ ଚାଇନାର ନିର୍ମିତ ପିଏଲ୍-୧୫ ମିସାଇଲ୍ ବ୍ୟବହାର କରିଥିଲେ। ଏହା ଏକ ଦୀର୍ଘ ଦୂରଗାମୀ ଏୟାର ଟୁ ଏୟାର ମିସାଇଲ୍ ବୋଲି ଜଣା ପଡିଛି। ଯାହାର ରେଞ୍ଜ ୨୦୦ କିଲୋମିଟରରୁ ଅଧିକ ବୋଲି ଅନୁମାନ କରାଯାଇଛି। ଏହା ପ୍ରଥମ ଥର ପାଇଁ ଯୁଦ୍ଧରେ ବ୍ୟବହୃତ ହୋଇଛି। ପଞ୍ଜାବର ହୋଶିଆରପୁର ଓ ବଠିଣ୍ଡା ଜିଲ୍ଲାରେ ମିଳିଥିବା ମିସାଇଲ୍ ଭଗ୍ନାଂଶ ପିଏଲ୍-୧୫ର ବୋଲି ଚିହ୍ନଟ ହୋଇଛି। ଭାରତର ଏସ୍-୪୦୦ ବାୟୁ ପ୍ରତିରକ୍ଷା ବ୍ୟବସ୍ଥା ଏହି ମିସାଇଲ୍କୁ ମଝି ଆକାଶରେ ଧ୍ୱଂସ କରି ଦେଇଥିଲା।
ପାକିସ୍ତାନର ସହଯୋଗୀ ଚୀନ ନିକଟରେ ଏହି ମିସାଇଲ୍ ଯୋଗାଇ ଦେଇଥିଲା। ପ୍ରତିରକ୍ଷା ବିଶେଷଜ୍ଞ ସନ୍ଦୀପ ଉନ୍ନିଥନ କହିଛନ୍ତି ଯେ, “ଏହା ଏକ ଅତ୍ୟନ୍ତ ଦୁର୍ଲଭ ଚୀନୀ ମିସାଇଲ୍। ଏହା ପ୍ରଥମ ଥର ପାଇଁ କୌଣସି ଯୁଦ୍ଧରେ ବ୍ୟବହୃତ ହୋଇଛି ଏବଂ ଆମ ବୈଜ୍ଞାନିକମାନେ ଏହାର ବୈଶିଷ୍ଟ୍ୟ ଅଧ୍ୟୟନ କରୁଛନ୍ତି।” ପିଏଲ୍-୧୫କୁ ଭାରତର ଡିଆରଡିଓ ନିର୍ମିତ ଆସ୍ତ୍ର ମିସାଇଲ୍ ସହ ସମକକ୍ଷ ବୋଲି ବିବେଚନା କରାଯାଏ।
ଏହି ଘଟଣା ପରେ ଭାରତୀୟ ସୈନ୍ୟବାହିନୀ ପାକିସ୍ତାନର ଏକ ଏଫ୍-୧୬ ଯୁଦ୍ଧ ବିମାନ ଓ ଦୁଇଟି ଜେଏଫ୍-୧୭ ବିମାନକୁ ଧ୍ୱଂସ କରିଥିଲା। ଜାମ୍ମୁ ସିଭିଲ୍ ଏୟାରପୋର୍ଟରେ ଏକ ଡ୍ରୋନ୍ ଆକ୍ରମଣ ହୋଇଥିଲା ଏବଂ ଅନ୍ୟ ଦୁଇଟି ଡ୍ରୋନ୍ ଜାମ୍ମୁ ବିଶ୍ୱବିଦ୍ୟାଳୟ ନିକଟରେ ଧ୍ୱଂସ କରାଯାଇଥିଲା। ପାକିସ୍ତାନର ଆକ୍ରମଣରେ କୌଣସି ପ୍ରାଣହାନୀ କିମ୍ବା ବଡ଼ କ୍ଷୟକ୍ଷତି ହୋଇନଥିବା ପ୍ରତିରକ୍ଷା ମନ୍ତ୍ରଣାଳୟ ସୂଚନା ଦେଇଛି।
ଆନ୍ତର୍ଜାତୀୟ ସ୍ତରରେ ଏହି ଘଟଣା ଉପରେ ମିଶ୍ରିତ ପ୍ରତିକ୍ରିୟା ଦେଖାଯାଇଛି। ଯୁକ୍ତରାଷ୍ଟ୍ର, ଯୁକ୍ତରାଜ୍ୟ, ସାଉଦି ଆରବ ଓ ରୁଷିଆ ଆଦି ଦେଶ ଭାରତର ଆତଙ୍କବାଦ ବିରୋଧୀ ଲଢ଼େଇକୁ ସମର୍ଥନ କରିଛନ୍ତି। କିନ୍ତୁ ସମ୍ପୂର୍ଣ୍ଣ ଯୁଦ୍ଧ ଏଡ଼ାଇବା ପାଇଁ ଉଭୟ ଦେଶକୁ ସଂଯମ ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି।
ଏହି ଉତ୍ତେଜନା ମଧ୍ୟରେ ଜାମ୍ମୁ ଓ କାଶ୍ମୀର, ପଞ୍ଜାବ ଓ ରାଜସ୍ଥାନରେ ଉଚ୍ଚ ସ୍ତରର ସୁରକ୍ଷା ବ୍ୟବସ୍ଥା ଲାଗୁ କରାଯାଇଛି। ଦିଲ୍ଲୀରେ ମଧ୍ୟ ମକ୍ ଡ୍ରିଲ୍ କରାଯାଇ ସତର୍କତା ବଢ଼ାଇ ଦିଆଯାଇଛି। ସୀମାନ୍ତରେ ଗୁଳି ବିନିମୟ ଓ ଡ୍ରୋନ୍ ଆକ୍ରମଣ ଜାରି ରହିଛି। ଯାହା ଆଗାମୀ ଦିନରେ ପରିସ୍ଥିତିକୁ ଆହୁରି ଜଟିଳ କରିପାରେ ବୋଲି ଅନୁମାନ କରାଯାଉଛି।
