ଅହମ୍ମଦାବାଦ,୧୨।୬: ଅହମ୍ମଦାବାଦ ବିମାନ ଦୁର୍ଘଟଣାରେ ବର୍ତ୍ତମାନ ସୁଦ୍ଧା ୨୦୪ ଜଣ ମୃତକଙ୍କ ଶବ ଉଦ୍ଧାର କରାଯାଇଛି। ଆଗକୁ ମୃତ ସଂଖ୍ୟା ବଢିବା ନେଇ କୁହାଯାଉଛି। ତେବେ ଏମାନଙ୍କ ମଧ୍ୟରେ କେବଳ ଜଣେ ଜୀବିତ ଯାତ୍ରୀଙ୍କୁ ଉଦ୍ଧାର କରାଯାଇଛି। ଯାତ୍ରୀଙ୍କର ନାଁ ହେଉଛି ରମେଶ ବିଶ୍ବାସକୁମାର। ହସ୍ପିଟାଲରେ ୩୮ ବର୍ଷୀୟ ରମେଶଙ୍କ ଚିକିତ୍ସା ଜାରି ରହିଛି। ସେ କହିଛନ୍ତି, ଦୁର୍ଘଟଣା ପରେ ଜୋରଦାର ବିସ୍ଫୋରଣ ହୋଇଥିଲା। ଚାରିପଟେ କେବଳ ନିଆଁ ହିଁ ନିଆଁ। ମୋତେ ଆମ୍ବୁଲାନ୍ସ ଜରିଆରେ ହସ୍ପିଟାଲ ନିଆଯାଇଥିଲା। ସେ ପର୍ଯ୍ୟନ୍ତ ବି ମୁଁ ବିଶ୍ବାସ କରିପାରୁନଥିଲି ଜୀବିତ ଅଛି, ଏହା କୌଣସି ଚମତ୍କାରଠାରୁ ମୋ ପାଇଁ କମ୍ ନୁହେଁ।
ବିମାନ ଦୁର୍ଘଟଣା ବେଳେ ୬୨୫ ଫୁଟ୍ ତଳକୁ ଖସି ପରେ ମଧ୍ୟ ତାଙ୍କର ଜୀବନ ବଞ୍ଚି ଯାଇଛି। ବ୍ୟକ୍ତି ଜଣକ ଦୁର୍ଘଟଣାସ୍ଥଳରେ ମୃତଦେହଙ୍କ ଭିତର ଦେଇ ଚାଲିଚାଲି ଆମ୍ବୁଲାନ୍ସ ପର୍ଯ୍ୟନ୍ତ ପହଁଞ୍ଚିଥିଲେ। କୁହାଯାଉଛି ଯେ, ଦୁର୍ଘଟଣା ସମୟରେ ସେ ବିମାନରୁ ତଳକୁ ଡେଇଁ ପଡିଥିଲେ। ରମେଶ ଚାଲିଚାଲି ଆମ୍ବୁଲାନ୍ସ ର୍ଯ୍ୟନ୍ତ ଯାଉଥିବାର ଭିଡିଓ ମଧ୍ୟ ଭାଇରାଲ ହେଉଛି। ରମେଶ ତାଙ୍କ ପରିବାରକୁ ଭେଟିବା ପାଇଁ କିଛି ଦିନ ପାଇଁ ଭାରତ ଆସିଥିଲେ ଏବଂ ତାଙ୍କ ଭାଇ ଅଜୟ କୁମାର ରମେଶ (୪୫)ଙ୍କ ସହ ଲଣ୍ଡନ ଫେରୁଥିଲେ। ବିଶ୍ୱାସ କହିଛନ୍ତି ସେ ୨୦ ବର୍ଷ ଧରି ଲଣ୍ଡନରେ ରହୁଛନ୍ତି। ତାଙ୍କ ସ୍ତ୍ରୀ ଏବଂ ପିଲାମାନେ ମଧ୍ୟ ଲଣ୍ଡନରେ ରୁହନ୍ତି।
ଅହମ୍ମଦାବାଦ ପୋଲିସ କମିଶନର ଜିଏସ୍ ମଲିକ କହିଛନ୍ତି, ସିଟ୍ ନମ୍ବର ୧୧ ଏ ରେ ଜଣେ ଜୀବିତ ବ୍ୟକ୍ତିଙ୍କୁ ପାଇଥିଲୁ। ତାଙ୍କର ହସ୍ପିଟାଲରେ ଚିକିତ୍ସା ଚାଲିଛି। ମୃତକଙ୍କ ସଂଖ୍ୟା ଆଗକୁ ଆହୁରି ବଢିପାରେ। କାରଣ ବିମାନ ଆବାସିକ ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଛି।
