ଭୁବନେଶ୍ୱର,୧୯/୦୯: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଠିକଣା ବଦଳିବ । ଲୋୟର ପିଏମ୍ଜିରୁ ରାଜପଥ (ଏଜିରୁ ରାଜଭବନ) ରାସ୍ତାକୁ ଉଠି ଆସିବ ମୁଖ୍ୟମନ୍ତ୍ରୀଙ୍କ ଠିକଣା । ଅଭିଯୋଗ ପ୍ରକୋଷ୍ଠ ପାଖରେ ଭିଆଇଆଇଆଇଏମ୍ଆର୍-୩ରେ ମୁଖ୍ୟମନ୍ତ୍ରୀଙ୍କ ପାଇଁ ଉଦ୍ଦିଷ୍ଟ ସରକାରୀ ବଙ୍ଗଳାରେ ରହିବେ ମୋହନ । ଏଥିପାଇଁ ଯୁଦ୍ଧକାଳୀନ ଭିତ୍ତିରେ ନବୀକରଣ କାମ ଚାଲିଛି । ପୂରା ଅଞ୍ଚଳକୁ ହାଇ ସିକ୍ୟୁରିଟି ଜୋନ୍ କରିବାକୁ ଯୋଜନା ହୋଇଛି ।
ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଲାଗି ରହିଥିବା ବଙ୍ଗଳାରେ ମୋହନ ରହିବେ । ଏଥିପାଇଁ ସାଧାରଣ ପ୍ରଶାସନ ବିଭାଗ ଓ ଗୃହ ବିଭାଗ ପକ୍ଷରୁ ଦିଆଯାଇଥିବା ଅନୁରୋଧକୁ ସେ ଗ୍ରହଣ କରିଛନ୍ତି । ଏବେ ସେ ଲୋୟର ପିଏମ୍ଜିର ବି-୧ କ୍ୱାର୍ଟର୍ସରେ ରହୁଛନ୍ତି । କିନ୍ତୁ ଏହା ଆନ୍ଦୋଳନ ଓ ବିକ୍ଷୋଭ ସ୍ଥଳକୁ ଲାଗି ରହିଥିବାରୁ ତାଙ୍କ ସୁରକ୍ଷା ପ୍ରତି ବିପଦ ସୃଷ୍ଟି ହେଉଛି । କୌଣସି ଆନ୍ଦୋଳନ ସମୟରେ ମୁଖ୍ୟମନ୍ତ୍ରୀ ନିଜ କ୍ୱାର୍ଟର୍ସରୁ ବାହାରକୁ ଯିବା ବା କ୍ୱାର୍ଟର୍ସକୁ ଫେରିବା ସମୟରେ ଅପ୍ରୀତିକର ସ୍ଥିତି ଉପୁଜିବାର ଆଶଙ୍କା ରହିଛି । ସୁରକ୍ଷା ଦାୟିତ୍ୱରେ ଥିବା ପୁଲିସ ବି ନାକେଦମ୍ ହେଉଛି । ଏ ସବୁକୁ ନଜରରେ ରଖି ମୁଖ୍ୟମନ୍ତ୍ରୀ ନିଜ ଠିକଣା ବଦଳାଇବାକୁ ନିଷ୍ପତ୍ତି ନେଇଛନ୍ତି । ଅଭିଯୋଗ ପ୍ରକୋଷ୍ଠ ପାଖ ସରକାରୀ କ୍ୱାର୍ଟର୍ସ ଭିଆଇଆଇଆଇଏମ୍ଆର୍-୩କୁ ମୁଖ୍ୟମନ୍ତ୍ରୀ ଓ ତାଙ୍କ ପରିବାର ଲୋକେ ବୁଲି ଦେଖିଛନ୍ତି । ଏହାପରେ ନବୀକରଣ କାମ ଆରମ୍ଭ ହୋଇଛି । ପ୍ରାୟ ଅଢ଼େଇ କୋଟି ଟଙ୍କାରେ କ୍ୱାର୍ଟର୍ସକୁ ନୂଆ ରୂପ ଦେବାକୁ କାମ ଚାଲିଛି । ପୂର୍ତ୍ତ ବିଭାଗ ଟେଣ୍ଡର ପ୍ରକ୍ରିୟା ସାରିବା ପରେ ଠିକା ସଂସ୍ଥା ନବୀକରଣ କାମ ଚଳାଇଛି । ଦୁଇ ମହଲା ବିଶିଷ୍ଟ ଏହି ବଙ୍ଗଳାର ବିଭିନ୍ନ ଘରର ଚଟାଣରେ ପୂର୍ବରୁ ପୁରୁଣା ଅମଳର ମୋଜାଇକ୍ ଟାଇଲସ୍ ପଡ଼ିଥିଲା । କେବଳ ଦୁଇଟି କୋଠରୀରେ ୱିଣ୍ଡୋ ଏସି ଲାଗିଥିଲା ।
ଏବେ ପୂରା ବଙ୍ଗଳାକୁ ନୂଆ ରୂପ ଦିଆଯିବ । ଏବେ ବଙ୍ଗଳାର ମୁଖ୍ୟ ଫାଟକ ରାଜଭବନ- ଏଜି ରାସ୍ତାକୁ ମୁହଁ କରି ରହିଛି । ଏହାକୁ ବନ୍ଦ କରି ଅଭିଯୋଗ ପ୍ରକୋଷ୍ଠ ପାଶ୍ୱର୍ରେ ନୂଆ ଫାଟକ ଖୋଲାଯିବ । ବାସ୍ତୁ ଅନୁସାରେ ଫାଟକ ଖୋଲିବ । ସୁରକ୍ଷା ଦୃଷ୍ଟିରୁ କ୍ୱାର୍ଟର୍ସ ଚାରିପାଖ ପାଚେରୀକୁ ୮ ଫୁଟ ଉଚ୍ଚା କରାଯାଉଛି । ବଙ୍ଗଳା ଭିତର ଓ ପରିସରକୁ ଆକର୍ଷଣୀୟ କରାଯିବ । ସିଭିଲ୍ କାମ ପାଇଁ ପ୍ରାୟ କୋଟିଏ ଟଙ୍କା ଖର୍ଚ୍ଚ ହେବ । ସେହିଭଳି ଇଲେକ୍ଟ୍ରିକାଲ୍ କାମ ପାଇଁ ୧ କୋଟି ଓ ପିଏଚ୍ କାମ ପାଇଁ ପ୍ରାୟ ୫୦ଲକ୍ଷ ଟଙ୍କା ଖର୍ଚ୍ଚ କରାଯିବ ।
ମୋଟ ୪ ଏକର ଜାଗା ଉପରେ ଏହି ବଙ୍ଗଳା ଓ ଅଭିଯୋଗ ପ୍ରକୋଷ୍ଠ ରହିଛି । ବଙ୍ଗଳା ସାମ୍ନା ଅଞ୍ଚଳକୁ ଲ୍ୟାଣ୍ଡସ୍କେପିଂ କରାଯିବ । ବଙ୍ଗଳାର ପଛପାଶ୍ୱର୍ରେ ୧୨ଟି ୧-ବିଏଚ୍କେ ବିଶିଷ୍ଟ କ୍ୱାଟର୍ସ ତିଆରି ହେବ । ଏଥିରେ ମୁଖ୍ୟମନ୍ତ୍ରୀଙ୍କ ସୁରକ୍ଷା ଅଧିକାରୀ, ପିଏସ୍ଓ, ବ୍ୟକ୍ତିଗତ ସହାୟକ, ରୋଷେୟା, ମାଳି ଓ ଅନ୍ୟ ସହାୟକମାନେ ରହିବେ । ସେହିଭଳି ପୂର୍ବରୁ ଥିବା ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠକୁ ଏଠାରୁ ଉଠାଇ ନିଆଯିବ । ପାଖ କ୍ୱାର୍ଟର୍ସକୁ ଏହା ଉଠିଯିବ । ଅଭିଯୋଗ ପ୍ରକୋଷ୍ଠ ସ୍ଥାନରେ ମୁଖ୍ୟମନ୍ତ୍ରୀଙ୍କ ରେସିଡେନ୍ସ ଅଫିସ୍ ରହିବ । ମୁଖ୍ୟମନ୍ତ୍ରୀ ଏଠାରୁ ଜରୁରୀ ସରକାରୀ କାମ କରିବେ । ସେହିଭଳି ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଆସୁଥିବା ବିଶିଷ୍ଟ ଅତିଥି ଓ ଆମନ୍ତ୍ରିତ ଅତିଥିଙ୍କୁ ସେ ଏଠାରେ ଭେଟିବା ଭଳି ବ୍ୟବସ୍ଥା କରାଯିବ ।
କ୍ୱାର୍ଟର୍ସ ଚାରି ପାଖରେ ପୁଲିସ ୱାଚ୍ପୋଷ୍ଟ୍ ରହିବ । ଏଜି ଛକରୁ ରାଜଭବନ ଛକ ଅଞ୍ଚଳ ଓ କ୍ୱାର୍ଟର୍ସ ପଛପାଖକୁ ହାଇ ସିକ୍ୟୁରିଟି ଜୋନ୍ କରାଯିବ । ଏହି ରାସ୍ତାର ଏକାଧିକ ସ୍ଥାନରେ ପୁଲିସ ପୋଷ୍ଟ୍ ରହିବ । ମୁଖ୍ୟ ରାସ୍ତାର ଉଭୟ ପାଶ୍ୱର୍ ସମେତ ଫୁଟପାଥ୍ କଡ଼ରେ ଥିବା ସର୍ଭିସ୍ ରାସ୍ତାକୁ ପର୍ଯ୍ୟାପ୍ତ ଆଲୋକୀକରଣ କରାଯିବ । ରାସ୍ତାର ବିଭିନ୍ନ ସ୍ଥାନରେ ପୁଲିସ୍ ୨୪ ଘଣ୍ଟା ଜଗି ରହିବେ ।
ଦୀର୍ଘ ୨୪ ବର୍ଷ ପରେ ପୁଣି ଥରେ ରାଜ୍ୟର ମୁଖ୍ୟମନ୍ତ୍ରୀ ଇଅର ମାର୍କ (ମୁଖ୍ୟମନ୍ତ୍ରୀଙ୍କ ପାଇଁ ଉଦ୍ଦିଷ୍ଟ) କ୍ୱାଟର୍ସକୁ ଫେରିବେ । ୧୯୯୫ରୁ ୧୯୯୯ ମସିହା ଯାଏ ସ୍ୱର୍ଗତଃ ଜାନକୀ ବଲ୍ଲଭ ପଟ୍ଟନାୟକ ଏହି ସରକାରୀ ବଙ୍ଗଳାରେ ରହୁଥିଲେ । ତାଙ୍କ ପରେ ଗିରିଧର ଗମାଙ୍ଗ ଓ ହେମାନନ୍ଦ ବିଶ୍ୱାଳ ବି ଏହି ବଙ୍ଗଳାରେ ରହିଲେ । କିନ୍ତୁ ୨୦୦୦ ମସିହାରେ ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ହେବା ପରେ ଏହି ବଙ୍ଗଳାରେ ନ ରହି ନିଜସ୍ୱ ଘର ‘ନବୀନ ନିବାସ’ରେ ରହୁଥିଲେ । ମୁଖ୍ୟମନ୍ତ୍ରୀଙ୍କ ବାସଭବନକୁ ସେ ଅଭିଯୋଗ ପ୍ରକୋଷ୍ଠ କରିଥିଲେ । ଏବେ ମୋହନ ମୁଖ୍ୟମନ୍ତ୍ରୀ ହେବା ପରେ ପୁଣି ଏହି ବଙ୍ଗଳାରେ ରହିବାକୁ ଯାଉଛନ୍ତି ।