ଦାରିଙ୍ଗବାଡି ୨୩/୬: ଦାରିଙ୍ଗବାଡି ଠାରେ ୨୦୨୨ ମସିହାରେ ଏକ ଅବକାରୀ ଥାନା ହୋଇଥିବା ବେଳେ ତାହା ଭଡା ଘରେ ଚାଲିଛି। ହେଲେ ଉକ୍ତ ଅବକାରୀ ଥାନା ବାହାରେ ଆଜି ପର୍ଯ୍ୟନ୍ତ କୌଣସି ସୂଚନା ଫଳକ ଲାଗି ନାହିଁ । ଫଳରେ ସାଧାରଣ ଲୋକ ଦାରିଙ୍ଗବାଡିରେ ଏକ ଅବକାରୀ ଥାନା ଅଛି ବୋଲି ଜାଣି ପାରୁ ନାହାଁନ୍ତି। ଚୋରା ମଦ ବେପାର ବିଷୟରେ ସୂଚନା ଦେବା ପାଇଁ ଚାହିଁଲେ ବି ସୂଚନା କିମ୍ବା ଅଭିଯୋଗ ଦେଇ ପାରୁ ନାହାଁନ୍ତି। ଖାଲି ଜିଲ୍ଲାପାଳଙ୍କ ଅଭିଯୋଗ ଶୁଣାଣିରେ ଅଭିଯୋଗ ପ୍ରଦାନ କରୁଛନ୍ତି। ଅବକାରୀ ଥାନା ଭିତରେ କେବଳ ନାମ ଫଳକ ରହିଥିବା ବେଳେ ବାହାରେ କୌଣସି ଫଳକ ନାହିଁ। ଏହି ଅବକାରୀ ଥାନାରେ ସବୁ ବେଳେ ଭିତର ପଟୁ ହେଉ ଅବା ବାହାର ପଟୁ ତାଲା ଝୁଲି ରହୁଥିବା ମଧ୍ୟ ଦେଖିବାକୁ ମିଳିଛି। ଫଳରେ ଦାରିଙ୍ଗବାଡି ଅଞ୍ଚଳରେ ଚୋରା ମଦ ବେପାର ବୃଦ୍ଧି ପାଇବା ସହ ଗଞ୍ଜେଇ କାରବାର ବୃଦ୍ଧି ପାଉଛି । ଅନ୍ୟ ପଟେ ଅଞ୍ଚଳରେ ଚୋରା ମଦ ବୃଦ୍ଧି ପାଉଥିବା ବେଳେ ଅବକାରୀ ବିଭାଗ ପକ୍ଷରୁ ପାଲା ନାଚ ଓ ସଚେତନ ସଭା ମାଧ୍ୟମରେ ନିଶାଦ୍ରବ୍ୟ ଓ ଅପମିଶ୍ରିତ ବିଷାକ୍ତ ମାଦକ ଦ୍ରବ୍ୟ ବ୍ୟବହାର ନକରିବାକୁ କୁହା ଯାଉଛି । ଅବକାରୀ ଅଧିକ୍ଷକ ସୁଶାନ୍ତ ପାଢ଼ୀ ଙ୍କୁ ପଚାରିବାରୁ ସେ କହିଲେ କାହିଁକି ସୂଚନା ଫଳକ ଲାଗି ନାହିଁ, ମୁଁ ପଚାରି ବୁଝୁଛି ବୋଲି କହିଥିଲେ ।