ନୂଆଦିଲ୍ଲୀ,୧୮/୦୧: ସଂସଦର ଆଗାମୀ ବଜେଟ ଅଧିବେଶନରେ ସରକାର ଏକ ନୂତନ ଆୟକର ବିଲ୍ ଆଗତ କରିପାରନ୍ତି, ଯାହାର ଲକ୍ଷ୍ୟ ହେଉଛି ବର୍ତ୍ତମାନର ଆୟକର ଆଇନକୁ ସରଳ କରିବା, ଏହାକୁ ବୁଝାମଣାଯୋଗ୍ୟ କରିବା ଏବଂ ପୃଷ୍ଠା ସଂଖ୍ୟାରେ ପାଖାପାଖି ୬୦ ପ୍ରତିଶତ କମ୍ କରିବା। କହିରଖୁଛୁ ଯେ, ବର୍ତ୍ତମାନର ଆୟକର ଆଇନ ଟିକେ ଜଟିଳ ଏବଂ ଏହାର ପୃଷ୍ଠା ଏତେ ଅଧିକ ଯେ ଏହାକୁ ପଢ଼ିବା ଏବଂ ବୁଝିବା ସମୟରେ ସାଧାରଣ ଲୋକେ ଚିନ୍ତାରେ ପଡ଼ନ୍ତି। ଏହି କାରଣରୁ, ସରକାର ଆୟକର ଆଇନକୁ ସରଳ କରିବା ପାଇଁ ଏହି ନିଷ୍ପତ୍ତି ନେଇପାରନ୍ତି। କହିରଖୁଛୁ ଯେ, ଜୁଲାଇ ବଜେଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଛଅ ଦଶନ୍ଧି ପୁରୁଣା ଆୟକର ଆଇନ, ୧୯୬୧ କୁ ଛଅ ମାସ ମଧ୍ୟରେ ଏକ ବ୍ୟାପକ ସମୀକ୍ଷା ଘୋଷଣା କରିଥିଲେ।
ସମ୍ପୁର୍ଣ୍ଣ ସୂଚନା କ'ଣ?
ପିଟିଆଇରେ ପ୍ରକାଶିତ ଏକ ଖବର ଅନୁଯାୟୀ, ଏକ ସୂତ୍ର କହିଛି ଯେ ସଂସଦର ବଜେଟ ଅଧିବେଶନରେ ନୂତନ ଆୟକର ଆଇନ ଆଗତ କରାଯିବ। ଏହା ଏକ ନୂଆ ଆଇନ ହେବାକୁ ଯାଉଥିବା ବେଳେ ବିର୍ତ୍ତମାନର ଆଇନରେ ସଂଶୋଧନ କୌଣସି ସଂଶୋଧନ ହେବନାହିଁ। ବର୍ତ୍ତମାନ, ଆଇନ ମନ୍ତ୍ରଣାଳୟ ଦ୍ୱାରା ଏହି ଡ୍ରାଫ୍ଟ ଆଇନ ଉପରେ ବିଚାର କରାଯାଉଛି ଏବଂ ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟରେ ଏହାକୁ ସଂସଦରେ ଆଗତ କରାଯିବାର ସମ୍ଭାବନା ଅଛି।
ସୂଚନାଥାଉକି, ବଜେଟ ଅଧିବେଶନ ଜାନୁଆରୀ ୩୧ ରୁ ଏପ୍ରିଲ ୪ ପର୍ଯ୍ୟନ୍ତ ଚାଲିବ। ପ୍ରଥମ ଭାଗ (୩୧ ଜାନୁଆରୀ ରୁ ୧୩ ଫେବୃଆରୀ ) ଲୋକସଭା ଏବଂ ରାଜ୍ୟସଭାର ମିଳିତ ଅଧିବେଶନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ସହିତ ଆରମ୍ଭ ହେବ, ତା'ପରେ ୨୦୨୪-୨୫ ପାଇଁ ଅର୍ଥନୈତିକ ସର୍ଭେ ଉପସ୍ଥାପନ ହେବ। ୨୦୨୫-୨୬ ଆର୍ଥିକ ବର୍ଷ ପାଇଁ କେନ୍ଦ୍ରୀୟ ବଜେଟ୍ ଫେବୃଆରୀ ୧ ତାରିଖରେ ଉପସ୍ଥାପିତ ହେବ। ଏହା ପରେ, ସଂସଦ ମାର୍ଚ୍ଚ ୧୦ ରେ ପୁଣି ଆରମ୍ଭ ହେବ ଏବଂ ଏପ୍ରିଲ ୪ ପର୍ଯ୍ୟନ୍ତ ଚାଲିବ।
ନୂଆ ଆୟକର ଆଇନରେ କି ସୁବିଧା ମିଳିବ?
ଆୟକର ଆଇନ, ୧୯୬୧ର ବ୍ୟାପକ ସମୀକ୍ଷା ପାଇଁ ଅର୍ଥମନ୍ତ୍ରୀ ସୀତାରମଣଙ୍କ ବଜେଟ ଘୋଷଣା ପରେ, ସିବିଡିଟି ସମୀକ୍ଷା ତଦାରଖ କରିବା ଏବଂ ଆଇନକୁ ସରଳ ଏବଂ ସ୍ପଷ୍ଟ ବୁଝିବା ପାଇଁ ଏକ ଆଭ୍ୟନ୍ତରୀଣ କମିଟି ଗଠନ କରିଥିଲା। ଏହା ବିବାଦ, ମକଦ୍ଦମା ହ୍ରାସ କରିବ ଏବଂ କରଦାତାଙ୍କୁ ଅଧିକ ଟିକସ ନିଶ୍ଚିତତା ପ୍ରଦାନ କରିବ। ଏହା ବ୍ୟତୀତ, ଆଇନର ବିଭିନ୍ନ ଦିଗ ସମୀକ୍ଷା କରିବା ପାଇଁ ୨୨ଟି ସ୍ୱତନ୍ତ୍ର ଉପ-କମିଟି ମଧ୍ୟ ଗଠନ କରାଯାଇଛି।
