ନୂଆଦିଲ୍ଲୀ,୨୦/୦୧: ଦେଶର ସିଂହ ଭାଗ ଲୋକ ଗ୍ରାମାଞ୍ଚଳରେ ବସବାସ କରିଥାନ୍ତି । ସରକାର କୌଣସି ଯୋଜନା ପ୍ରଣୟନ ବେଳେ ଗ୍ରାମାଞ୍ଚଳ ବିକାଶକୁ ଧ୍ୟାନରେ ରଖିଥାନ୍ତି । ଫେବ୍ରୁଆରି ପହିଲାରେ ଆସିବ ସାଧାରଣ ବଜେଟ । ଏଥର ବଜେଟରେ କେନ୍ଦ୍ର ସରକାର ଗ୍ରାମାଞ୍ଚଳ ଇଲାକା ସହ ଜଡିତ ଯୋଜନା ଗୁଡିକରେ ବ୍ୟୟ ବରାଦ ବଢ଼ାଇବାର ଢ଼େର ସମ୍ଭାବନା ରହିଛି । ବ୍ରୋକରେଜ ଫାର୍ମ ଗୋଲ୍ଡମ୍ୟାନ ସ୍ୟାଚ୍ ଏ ନେଇ ଆକଳନ କରିଛି ।
ଏଥିରେ ଜନକଲ୍ୟାଣକାରୀ ଯୋଜନା ସହ ଅନ୍ୟ ଯୋଜନା ଗୁଡିକ ସାମିଲ ରହିବ । ତେବେ ଆଗାମି ଦିନରେ ଏଭଳି ଯୋଜନାରେ ସରକାରଙ୍କ ଖର୍ଚ୍ଚ ଜିଡିପି ଅଭିବୃଦ୍ଧି ତୁଳନାରେ କମ୍ ରହିପାରେ ବୋଲି କୁହାଯାଉଛି । ସରକାର ବଜେଟରେ ଗ୍ରାମାଞ୍ଚଳ ଯୋଜନା ଗୁଡିକରେ ବ୍ୟୟବରାଦ ବଢ଼ାଇଲେ ଏହା ଗ୍ରାମାଞ୍ଚଳ ଅର୍ଥନୀତିକୁ ଚଳଚଞ୍ଚଳ କରିବାରେ ସହାୟକ ହେବ ବୋଲି ବିଶେଷଜ୍ଞ କହିଛନ୍ତି ।
ଏହା ଦ୍ୱାରା ଲୋକଙ୍କ ଆୟ ଉପରେ ଏହା ଭଲ ପ୍ରଭାବ ପକାଇବ । ଫଳରେ ଲୋକଙ୍କ ହାତକୁ ପୁଞ୍ଜି ଆସିଲେ ସେମାନେ ଏହାକୁ ଖର୍ଚ୍ଚ କରିବେ କିମ୍ବା ଖର୍ଚ୍ଚ ବଢ଼ାଇବେ । ତେବେ ଏଭଳି ସ୍ଥିତି ସଞ୍ଚୟ ବୃଦ୍ଧି ମଧ୍ୟ ଆବଶ୍ୟକତା ରହିଛି । ଲୋକଙ୍କ ଆୟରେ ସୁଧାର ଆସିଲେ ଏହା ଗ୍ରାମାଞ୍ଚଳରେ ଚାହିଦା ବଢ଼ାଇବାରେ ସହାୟକ ହେବ । ସେହିଭଳି ଗ୍ରାମୀଣ ବିକାଶ ପ୍ରକ୍ରିୟାକୁ ମଧ୍ୟ ତ୍ୱରାନ୍ୱିତ କରାଯିବାର ଆବଶ୍ୟକତା ମଧ୍ୟ ରହିଛି ।
ଏ କ୍ଷେତ୍ରରେ ବ୍ୟାଙ୍କିଙ୍ଗ କ୍ଷେତ୍ର ଶାଖା ବିସ୍ତାର କରିବାକୁ ପ୍ରୟାସ ଜାରି ରଖିବେ । ଆୟରେ ସୁଧାର ହେଲେ ଲୋକମାନେ ଭବିଷ୍ୟତ ସମ୍ପର୍କରେ ଚିନ୍ତା କରିବେ । ଏହା ସହ ଗ୍ରାମାଞ୍ଚଳରେ ବୀମା ସୁବିଧା ମଧ୍ୟ ତ୍ୱରାନ୍ୱିତ ହେବ । ଆଇସିଆଇସିଆଇ ପ୍ରୁଡେନସିଆଲ ଏଏମ୍ସିର ଫଣ୍ଡ୍ ମ୍ୟାନେଜର ପ୍ରିୟଙ୍କା ଖଣ୍ଡେଲୱାଲ କହିଛନ୍ତି, ଦେଶର ଯୁବ ଶ୍ରମଶକ୍ତିର ଏକ ବଡ ଭାଗ ଗ୍ରାମାଞ୍ଚଳରେ ବସବାସ କରୁଛନ୍ତି । ଏମାନଙ୍କ ବିକାଶ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଦେଶର ୬୪% ଭାଗ ଲୋକ ଗ୍ରାମାଞ୍ଚଳରେ ବସବାସ କରୁଛନ୍ତି ।
ଅର୍ଥନୀତିକୁ ସେମାନଙ୍କ ଯୋଗଦାନ ଗୁରୁତ୍ୱପୂର୍ଣ୍ଣ । ଗତ ୧୦ ବର୍ଷରେ ସରକାର ଗ୍ରାମାଞ୍ଚଳର ବିକାଶ ଲାଗି ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି । ଏ କ୍ଷେତ୍ରରେ ଆଖିଦୃଶିଆ ନିବେଶ ସହ ବହୁତ ଲୋକଙ୍କୁ ଦାରିଦ୍ର୍ୟତାରୁ ବାହାରକୁ ବାହାର କରାଯାଇଛି । ସାମାଜିକ କଲ୍ୟାଣକାରୀ ଯୋଜନା ଗୁଡିକ ବାଦ ଗତ କିଛି ବର୍ଷରେ କୃଷି ଆୟ ବୃଦ୍ଧି ଉପରେ ମଧ୍ୟ ଉଦ୍ୟମ ଜାରି ରହିଛି । ତେବେ ଏ କ୍ଷେତ୍ରରେ ସରକାରଙ୍କୁ ଏତେଟା ସଫଳତା ମିଳିନି ।
ଆସୋସିଏସନ ଅଫ୍ ମ୍ୟୁଚୁଆଲ ଫଣ୍ଡ୍ସ ଇନ୍ ଇଣ୍ଡିଆ (ଏଏମ୍ଏଫ୍ଆଇ) ର ପରାମର୍ଶଦାତା ବିକାଶ ଆନନ୍ଦ କହିଛନ୍ତି, ଗତ ୧ ଦଶନ୍ଧି ଧରି ଅଣି କୃଷି କ୍ଷେତ୍ରରେ କାର୍ଯ୍ୟରତ ଲୋକଙ୍କ ଜୀବନରେ ସେଭଳି ଆଖିଦୃଶିଆ ପରିବର୍ତ୍ତନ ଆସିନାହିଁ । ଏବେ ଅଧିକ ଲୋକ କୃଷି ଉପରେ ନିର୍ଭରଶୀଳ ହେଉଥିବାରୁ ଏ କ୍ଷେତ୍ରରେ ଦେଶକୁ ଆହୁରି ଅଧିକ କାମ କରିବାକୁ ହେବ । କାରଣ କୃଷି ଆୟର ଏକ ସୀମା ରହିଛି । ମାତ୍ର ସହରାଞ୍ଚଳରେ ଲୋକଙ୍କ ଆୟ ବଢ଼ୁଛି ।
ଏଭଳି କାରଣରୁ ସହରୀ ଭାରତ ଗ୍ରାମୀଣ ଭାରତ ତୁଳନାରେ ଆୟ ଏବଂ ଚାହିଦା ବୃଦ୍ଧି କ୍ଷେତ୍ରରେ ଏକ ଉନ୍ନତ ସ୍ଥାନରେ ରହିଛି । ଚଳିତ ଦଶନ୍ଧିରେ ଗ୍ରାମୀଣ ଭାରତ ଲାଗି ଦୃଷ୍ଟିକୋଣ ଅଲଗା ହୋଇପାରେ । କାରଣ ଅଣ କୃଷି ନିଯୁକ୍ତି କ୍ଷେତ୍ର ଉନ୍ନତ ସ୍ଥିତିରେ ରହିବ ବୋଲି ଆଶା କରାଯାଉଛି । ଘରୋଇ ଆବଶ୍ୟକତା ସହ ଦେଶ ବିନିର୍ମାଣ କ୍ଷେତ୍ର ରପ୍ତାନି ବୃଦ୍ଧି ଉପରେ ଏବେ ଫୋକସ କରୁଛି । ଲାଡଲି ବହନ ଭଳି ଯୋଜନା ଗ୍ରାମାଞ୍ଚଳ ଚାହିଦା ଏବଂ ଆୟ କ୍ଷେତ୍ରରେ ଉନ୍ନତ ସଙ୍କେତ ଦେଉଛି ।
