ନୂଆଦିଲ୍ଲୀ: ଇସ୍ରାଏଲ ଏବଂ ହମାସ ମଧ୍ୟରେ ଲାଗି ରହିଥିବା ଯୁଦ୍ଧକୁ ୧୫ ମାସରୁ ଅଧିକ ବିତିଲାଣି । କିନ୍ତୁ ଏବେ ସୁଦ୍ଧା ଶାନ୍ତି ଫେରି ପାରିନାହିଁ । ଇସ୍ରାଏଲ ସେନା ଲଗାତାର ଗାଜା ଉପରେ ଆକ୍ରମଣ କରୁଛି । ହମାସର ଦୁଇ ଜଣ ମୁଖ୍ୟ କମାଣ୍ଡର ନିପାତ ହେବା ପରେ ମଧ୍ୟ ହମାସ ଗୋଷ୍ଠୀ ଇସ୍ରାଏଲ ସେନା ସହ ଲଢ଼େଇ ଜାରି ରଖିଛି । ଏସବୁ ଭିତରେ ଗାଜା ପାଇଁ ବଡ଼ ଯୋଜନା କରିଛି ଇସ୍ରାଏଲ ।
ଯୁଦ୍ଧ ବିରାମ ଲାଗି ହେଉଥିବା ଚର୍ଚ୍ଚାର ପ୍ରଗତି ଲାଗି ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଗ୍ରୀନ ସିଗନାଲ ଦେଇଛନ୍ତି । ଏଥିପାଇଁ ନିଜର ଗୁଇନ୍ଦା ଏଜେନ୍ସି ମୋସାଦର ମୁଖ୍ୟଙ୍କୁ ଯୁଦ୍ଧ ବିରାମ ଉପରେ ଆଲୋଚନା ଆଗକୁ ବଢ଼ାଇବା ଲାଗି ପଠାଇବାକୁ ଅନୁମତି ଦେଇଛନ୍ତି । ଫଳରେ ଇସ୍ରାଏଲ ଏବଂ ହମାସ ମଧ୍ୟରେ ଶାନ୍ତି ପ୍ରତିଷ୍ଠା ହୋଇପାରିବ । ଏବେ ସୁଦ୍ଧା ଇସ୍ରାଏଲ-ହମାସ ଯୁଦ୍ଧ ରୋକିବା ଦିଗରେ ଏହା ନେତାନ୍ୟାହୁଙ୍କ ସବୁଠାରୁ ବଡ଼ ପଦକ୍ଷେପ ।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏନେଇ ସୂଚନା ଦିଆଯାଇଛି । ତେବେ ମୋସାଦର ମୁଖ୍ୟ ଡେଭିଡ ବର୍ନିୟା କତାରର ରାଜଧାନୀ ଦୋହା କେବେ ଯିବେ ସେନେଇ ସ୍ପଷ୍ଟ ସୂଚନା ମିଳିନାହିଁ । ସେଠାରେ ଇସ୍ରାଏଲ ଏବଂ ହମାସ ମଧ୍ୟରେ ଶାନ୍ତି ଫେରାଇ ଆଣିବା ପାଇଁ ଆଲୋଚନା ହେଉଛି । ଏହି ଆଲୋଚନାରେ ମୋସାଦ ମୁଖ୍ୟ ଉପସ୍ଥିତ ରହିଲେ ଯୁଦ୍ଧ ବିରାମ ନେଇ ଆଲୋଚନା ଫଳପ୍ରଦ ହୋଇପାରିବ ବୋଲି କୁହାଯାଉଛି । ଗତ ୧୫ ମାସର ଯୁଦ୍ଧ ମଧ୍ୟରେ କେବଳ ଥରେ ଯୁଦ୍ଧ ବିରାମ ଉପରେ ସହମତି ହୋଇଥିଲା । ପରେ ଆମେରିକା, ଇଜିପ୍ଟ ଏବଂ କତାରର ମଧ୍ୟସ୍ଥତାରେ ଅନେକ ଥର ଯୁଦ୍ଧ ବିରାମ ନେଇ ଆଲୋଚନା ହୋଇଥିଲେ ହେଁ କୌଣସି ସୁଫଳ ମିଳିପାରି ନାହିଁ ।
