ନୂଆଦିଲ୍ଲୀ: ଜମ୍ମୁର ଏକ ଛୋଟ ଗାଁରେ ଏବେ ଭୟଙ୍କର ରୂପ ନେବାରେ ଲାଗିଛି ଏକ ରହସ୍ୟମୟ ରୋଗ। ଏହି ରୋଗ ଏପର୍ଯ୍ୟନ୍ତ ୧୬ ଜଣଙ୍କ ଜୀବନ ନେଇ ସାରିଲାଣି। ଏହାକୁ ଦେଖି ସ୍ଥାନୀୟ ଅଂଚଳରେ ଭୟର ବାତାବରଣ ଖେଳିଯାଇଛି। ସ୍ଥାନୀୟ କର୍ତ୍ତୃପକ୍ଷଙ୍କୁ ମଧ୍ୟ ଏହା ବିସ୍ମିତ କରିଦେଇଛି । ତେବେ ସବୁଠୁ ବଡ କଥା ହେଉଛି ପ୍ରଥମ ମୃତ୍ୟୁର ଦୁଇ ମାସ ପରେ ମଧ୍ୟ ଏହାର କାରଣ ନିର୍ଣ୍ଣୟ କରିବାରେ ପ୍ରଶାସନ ଅସମର୍ଥ ଥିବା କିଛି ସୂତ୍ରରୁ ଜଣାପଡିଛି। ସଦ୍ୟ ରିପୋର୍ଟ ଅନୁଯାୟୀ, ଶୁକ୍ରବାର ଦିନ ଜଣେ ୬୦ ବର୍ଷୀୟା ବୃଦ୍ଧାଙ୍କର ଏହି ଅଜଣା ରୋଗ ଯୋଗୁଁ ମୃତ୍ୟୁ ଘଟିଛି । ଏହି ସମୟରେ ଅନ୍ୟ ଜଣେ ଝିଅ ଏବେ ବି ଜୀବନ ପାଇଁ ସଂଘର୍ଷ କରୁଛି।

ସୂଚନା ଅନୁଯାୟୀ, ପୀଡିତ ମାନେ ରାଜୌରୀ ଜିଲ୍ଲାର କୋଟରଙ୍କା ମଣ୍ଡଳର ବଡହାଲ ଗ୍ରାମର । ଏଠାରେ ଗତ ବର୍ଷ ଡିସେମ୍ବରରୁ ଏପର୍ଯ୍ୟନ୍ତ ତିନୋଟି ପରିବାରର ୧୬ ଜଣ ସଦସ୍ୟଙ୍କ ମୃତ୍ୟୁ ଘଟିଛି। ଏଥି ମଧ୍ୟରୁ ରବିବାର ପରଠାରୁ ୭ ଜଣଙ୍କର ମୃତ୍ୟୁ ହୋଇଛି। ତେବେ ପ୍ରଶାସନ ପ୍ରଭାବିତ ପରିବାରର ତିନୋଟି ଘରକୁ ସିଲ୍ କରିଦେଇଛନ୍ତି। ସେମାନଙ୍କର ୨୧ ଜଣ ନିକଟ ସମ୍ପର୍କୀୟଙ୍କୁ କଡ଼ା ନଜର ରଖିବା ପାଇଁ ସରକାରୀ ଯତ୍ନ କେନ୍ଦ୍ରକୁ ସ୍ଥାନାନ୍ତରିତ କରାଯାଇଛି। ଅଧିକାରୀ ମାନେ କହିଛନ୍ତି ଯେ ଅତିରିକ୍ତ ଡେପୁଟି କମିଶନର ଦିଲ ମିରଙ୍କ ନେତୃତ୍ୱରେ ଏକ ଦଳ ଏହି ଅଭିଯାନ ଚଳାଇଥିଲା ଯେଉଁଥିରେ ସୁରକ୍ଷା କର୍ମୀଙ୍କୁ ଘଟଣାସ୍ଥଳରେ ନିୟୋଜିତ କରାଯାଇଥିଲା। ଅନ୍ୟପକ୍ଷରେ, ମୃତ୍ୟୁ ମାମଲା ଗୁଡ଼ିକର ତଦନ୍ତ ପାଇଁ ବୁଧଲ ପୋଲିସ ଅଧୀକ୍ଷକ ୱାଜାହତ ହୁସେନଙ୍କ ନେତୃତ୍ୱରେ ଏକ ୧୧ ଜଣିଆ ସ୍ୱତନ୍ତ୍ର ତଦନ୍ତ ଦଳ (SIT) ଗଠନ କରାଯାଇଛି। 

ମୁଖ୍ୟ ସଚିବ ଅଟଳ ଦୁଲ୍ଲୁ ଜମ୍ମୁରେ ସାମ୍ବାଦିକ ମାନଙ୍କୁ କହିଛନ୍ତି ଯେ, "ପରିସ୍ଥିତି ଉପରେ ସମସ୍ତ ଦିଗରୁ ନଜର ରଖାଯାଇଛି। ଏହି ମୃତ୍ୟୁର କାରଣ ଜାଣିବା ପାଇଁ ଅନେକ ସ୍ୱାସ୍ଥ୍ୟ ସଂସ୍ଥା ପୂର୍ବରୁ ତଦନ୍ତ ଚଳାଇଛନ୍ତି। ସେ କହିଛନ୍ତି ଯେ, "ଏପର୍ଯ୍ୟନ୍ତ, ଭାଇରାଲ୍, ଜୀବାଣୁ କିମ୍ବା ଫଙ୍ଗାଲ୍ ସଂକ୍ରମଣର କୌଣସି ପ୍ରମାଣ ନାହିଁ। କାରଣ ଖୋଜିବା ପାଇଁ ତଦନ୍ତ ଚାଲିଛି । ଯେକୌଣସି ସମ୍ଭାବ୍ୟ ଦିଗକୁ ତଦନ୍ତ କରିବା ପାଇଁ ଏକ SIT ଗଠନ କରାଯାଇଛି।