ନୂଆଦିଲ୍ଲୀ,୨୬।୩: ଭାରତରେ ସଂଖ୍ୟାଲଘୁଙ୍କ ବିରୋଧରେ ଭେଦଭାବ ଓ ଉତ୍ପୀଡନ ଅଭିଯୋଗ। ଏଭଳି ଏକ ଅଭିଯୋଗ ଆଣିଛି ଆମେରିକାର ଅନ୍ତର୍ଜାତୀୟ ଧାର୍ମିକ ସ୍ବତନ୍ତ୍ରତା ଆୟୋଗ(USCIRF)। ନିଜର ବାର୍ଷିକ ରିପୋର୍ଟରେ USCIRF କହିଛି ଭାରତର ଗୁଇନ୍ଦା ଏଜେନ୍ସି ରିସର୍ଜ୍ଚ ଆଣ୍ଡ ଆନାଲିସିସ୍ ଓ୍ବିଙ୍ଗ ବା ‘ର’କୁ ଆମେରିକରେ ବ୍ୟାନ୍ କରାଯାଉ। ଶିଖ ବିଚ୍ଛିନ୍ନବାଦୀଙ୍କ ହତ୍ୟାରେ ଭାରତୀୟ ଗୁଇନ୍ଦା ଏଜେନ୍ସିର ଭୂମିକା ରହିଛି।
ଭାରତରେ ସଂଖ୍ୟା ଲଘୁ ସୁରକ୍ଷିତ ନୁହେଁ। ବିଦେଶରେ ‘ର’ ଏଜେଣ୍ଟ କରୁଛନ୍ତି ଶିଖ୍ ବିଚ୍ଛିନ୍ନବାଦୀଙ୍କୁ ହତ୍ୟ। ଏଭଳି ଏକ ଅଭିଯୋଗ ଆଣିଛି ଆମେରିକାର USCIRF। ଆମେରିକୀୟ ଆୟୋଗ ନିଜ ରିପୋର୍ଟରେ ଭାରତରେ ଧାର୍ମିକ ସ୍ବତନ୍ତ୍ରତା ଉପରେ ପ୍ରଶ୍ନ ଉଠାଇବାକୁ ଚେଷ୍ଟା କରିଛନ୍ତି। ଏଥିରେ କୁହାଯାଇଛି ୨୦୨୪ ରେ ଭାରତରେ ସଂଖ୍ୟାଲଘୁଙ୍କ ବିରୋଧରେ ଆକ୍ରମଣ ଓ ଭେଦଭାବ ବଢିଛି। ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିଜେପ ବିରୋଧରେ ମଧ୍ୟ ଅଭିଯୋଗ ରହିଛି। ଗତ ବର୍ଷ ନିର୍ବାଚନ ବେଳେ ବିଜେପି ମୁସଲମାନ ଓ ଅନ୍ୟ ସଂଖ୍ୟାଲଘୁଙ୍କ ବିରୋଧରେ ଘୃଣା ସୃଷ୍ଟିକାରୀ ବୟାନବାଜି କରିବା ସହ ଗୁଜବ ପ୍ରଚାର କରିଥିଲେ।
ଆମେରିକାର ଏହି ଆୟୋଗ ଭାରତ ସରକାରଙ୍କୁ ଅପିଲ କରିଛନ୍ତି ସେ ଧାର୍ମିକ ସ୍ବତନ୍ତ୍ରତା ରକ୍ଷା କରନ୍ତୁ ଓ ଧାର୍ମିକ ଉତ୍ପୀଡନ ରୋକିବା ପାଇଁ କଡ଼ା ପଦକ୍ଷେପ ନିଅନ୍ତୁ। ବିଶେଷ ଭାବରେ ଭାରତୀୟ ନାଗରିକତା ଆଇନ୍ ଉପରେ ପ୍ରଶ୍ନ ଉଠାଇଛି। ଯାହାକୁ ଜାତିସଂଘ ମୂଳ ରୂପରେ ଭେଦଭାବପୂର୍ଣ୍ଣ ବୋଲି କହିଥିଲେ। ତା ଛଡା କାଶ୍ମୀରର ସ୍ପେଶାଲ ଷ୍ଟାଟସ୍ ଶେଷ କରିବାର ମଧ୍ୟ ସମାଲୋଚନା କରିଛି। ୨୦୨୩ ରେ ଭାରତରେ ଶିଖ୍ ବିଚ୍ଛିନ୍ନବାଦୀଙ୍କୁ ନେଇ ଆମେରିକା ଓ କାନାଡାରେ ଭାରତର କଥିତ କାର୍ଯ୍ୟାନୁଷ୍ଠାନ ଦ୍ବିପାକ୍ଷିକ ସମ୍ପର୍କ ଖରାପ କରିଥିଲା। ଆମେରିକା ପକ୍ଷରୁ ଭାରତୀୟ ‘ର’ ଏଜେଣ୍ଟ ବିକାଶ ଯାଦବଙ୍କ ବିରୋଧରେ ଏକ ଅସଫଳ ଷଡଯନ୍ତ୍ର କରାଯାଇଥିବା ଅଭିଯୋଗ ହୋଇଥିଲା। ହେଲେ ଭାରତ ଏହି ଅଭିଯୋଗକୁ ଖଣ୍ଡନ କରିଥିଲା।
