ନୂଆଦିଲ୍ଲୀ: ଉତ୍ତରପ୍ରଦେଶର ମୀରଟରେ ଘଟିଥିବା ହତ୍ୟା ମାମଲାରେ ପ୍ରତିଦିନ ନୂଆନୂଆ ତଥ୍ୟ ସାମ୍ନାକୁ ଆସୁଛି। ନିକଟରେ ଜାରି ହୋଇଥିବା ଏକ ସିସିଟିଭି ଫୁଟେଜ୍ରେ ସୌରଭ ରାଜପୁତ ତାଙ୍କର ଜଣେ ସାଙ୍ଗଙ୍କ ସହିତ ବାଇକ୍ରେ ଖାଦ୍ୟ ଆଣିବା ପାଇଁ ଯାଉଥିବା ନଜରକୁ ଆସିଛନ୍ତି। ସୂଚନା ମୁତାବକ ମାର୍ଚ୍ଚ ୩ ତାରିଖ ରାତି ୧୧:୪୯ରେ ସୈରଭ ତାଙ୍କ ଘର ଗଳିରେ ପ୍ରବେଶ କରୁଥିବା ନଜରକୁ ଆସିଛନ୍ତି। ତେବେ ଏହାର କିଛି ସମୟ ପରେ ତାଙ୍କ ପତ୍ନୀ ମୁସ୍କାନ ରସ୍ତୋଗୀ ଓ ତା ପ୍ରେମିକ ସାହିଲ ଶୁକ୍ଲାଙ୍କ ଦ୍ୱାରା ତାଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା। ପୋଲିସ ଦେଇଥିବା ସୂଚନା ଅନୁସାରେ, ସୌରଭଙ୍କ ଶରୀରକୁ ଖଣ୍ଡ ଖଣ୍ଡ କରାଯାଇ ଏକ ପ୍ଲାଷ୍ଟିକ ଡ୍ରମ୍ରେ ଭର୍ତ୍ତିକରି ସିମେଣ୍ଟରେ ସିଲ୍ କରି ଦିଆଯାଇଥିଲା।
ସୌରଭ ରାଜପୁତ ନିକଟରେ ଲଣ୍ଡନରୁ ମୀରଟକୁ ଫେରିଥିଲେ। ସେ ଲଣ୍ଡନ ସ୍ଥିତ ଏକ ବେକେରୀରେ କାମ କରୁଥିଲେ। ୨୦୧୬ରେ ମୁସ୍କାନଙ୍କ ସହିତ ପ୍ରେମ ବିବାହ କରିଥିଲେ ସୌରଭ। ସେ ଗତ ତିନି ବର୍ଷ ଧରି ତାଙ୍କ ପତ୍ନୀ ଓ ପାଞ୍ଚ ବର୍ଷୀୟା ଝିଅ ସହିତ ମୀରଟ ସ୍ଥିତ ଏକ ଭଡ଼ା ଘରେ ରହୁଥିଲେ। ପୋଲିସ କହିଛି ଯେ, ମାର୍ଚ୍ଚ ୪ ତାରିଖରେ ସୌରଭଙ୍କୁ ଶେଷ ଥର ପାଇଁ ଦେଖା ଯାଇଥିଲା। ତେବେ ସେହି ଦିନ ହିଁ ତାଙ୍କୁ ହତ୍ୟା କରାଯାଇଥିଲା।
ସୂଚନା ମୁତାବକ, ମୁସ୍କାନ ଓ ସାହିଲ ଗତ ନଭେମ୍ବର ମାସରୁ ଏହି ହତ୍ୟାର ଯୋଜନା କରିଥିଲେ। ମାର୍ଚ୍ଚ ୪ ତାରିଖ ରାତିରେ ମୁସ୍କାନ ସୌରଭଙ୍କ ଖାଦ୍ୟରେ ସେଡେଟିଭ୍ ମିଶାଇ ତାଙ୍କୁ ଅଚେତ କରି ଦେଇଥିଲେ। ଏହାପରେ ସାହିଲ ଘଟଣାସ୍ଥଳରେ ପହଞ୍ଚିବା ସହ ଉଭୟେ ମିଶି ସୌରଭଙ୍କୁ ଛୁରୀରେ ଆକ୍ରମଣ କରିଥିଲେ। ପୋଷ୍ଟମର୍ଟମ ରିପୋର୍ଟ ଅନୁସାରେ ପ୍ରଥମେ ସୌରଭଙ୍କ ହୃଦୟରେ ତିନିଥର ଛୁରା ମାଡ଼ ହୋଇଥିଲା। ପରେ ତାଙ୍କ ଗଳା କାଟି ଦିଆଯିବା ସହ ଶରୀରକୁ ଚାରି ଖଣ୍ଡରେ କାଟି ଦିଆଯାଇଥିଲା।
ହତ୍ୟା ପରେ ମୁସ୍କାନ ଓ ସାହିଲ ସୌରଭଙ୍କ ଶରୀରକୁ ଏକ ଡ୍ରମ୍ରେ ଭର୍ତ୍ତି କରି ସିମେଣ୍ଟ ଢାଳି ସିଲ୍ କରି ଦେଇଥିଲେ। ଏହାପରେ ଉଭୟେ ହିମାଚଳ ପ୍ରଦେଶର ମନାଲି, କସୋଲ ଓ ଶିମଲାକୁ ବୁଲିବାକୁ ଚାଲି ଯାଇଥିଲେ। ସୌରଭଙ୍କ ଫୋନ୍ରୁ ତାଙ୍କ ପରିବାରକୁ ମେସେଜ୍ ପଠାଇ ସେମାନେ ସନ୍ଦେହରୁ ଦୂରେଇ ରହିବାକୁ ଚେଷ୍ଟା କରିଥିଲେ। କିନ୍ତୁ ମାର୍ଚ୍ଚ ୧୮ରେ ସୌରଭଙ୍କ ଭାଇ ବବଲୁ ତାଙ୍କୁ ଖୋଜି ନ ପାଇ ପୋଲିସର ଦ୍ୱାରସ୍ଥ ହେବାରୁ ଏହି ଅପରାଧ ସାମ୍ନାକୁ ଆସିଥିଲା।
ପୋଲିସ ମୁସ୍କାନ ଓ ସାହିଲଙ୍କୁ ଗିରଫ କରିଛି। ବର୍ତ୍ତମାନ ପାଇଁ ସେମାନଙ୍କୁ ଚୌଧୁରୀ ଚରଣ ସିଂ ଜିଲ୍ଲା ଜେଲ୍ରେ ନ୍ୟାୟିକ ହେପାଜତରେ ରଖାଯାଇଛି। ଅନୁସନ୍ଧାନରୁ ଜଣାପଡ଼ିଛି ଯେ, ସାହିଲ କଳା ଯାଦୁରେ ବିଶ୍ୱାସ କରୁଥିଲେ ଏବଂ ମୁସ୍କାନ ତାଙ୍କୁ ଏହି ହତ୍ୟା ପାଇଁ ଉତ୍ସାହିତ କରିଥିଲେ। ଏହି ଘଟଣା ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି।
