ମାଲକାନଗିରି,୨୭।୪ (ଆପ୍ର): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡର ବିଜାପୁର ଜଙ୍ଗଲ ମଧ୍ୟରେ ମାଓବାଦୀଙ୍କ ଏକ ବଙ୍କରକୁ ଠାବ କରିଛନ୍ତି ସୁରକ୍ଷା କର୍ମୀ। ଏହି ବଙ୍କରରେ ମାଓ ନେତା ହିଡମା ଏବଂ ବଡ କ୍ୟାଡର ମାଓବାଦୀ ମାନେ ଦୀର୍ଘ ସମୟ ଧରି ଲୁଚି ରହୁଥିଲେ ବୋଲି ଅନୁମାନ କରାଯାଉଛି।
ସୂଚନା ଅନୁଯାୟୀ ଛତିଶଗଡର ବୀଜାପୁର ଓ ସୁକୁମା ଜିଲ୍ଲା ମଧ୍ୟରେ ଥିବା ଜଙ୍ଗଲରେ ଯବାନ ମାନେ ମାଓ ଦମନ ନିମନ୍ତେ ତଲାସି ଅଭିଯାନ କରୁଥିଲେ। ଏହି ସମୟରେ ଜଙ୍ଗଲ ମଧ୍ୟରେ ମାଓବାଦୀଙ୍କ ଦ୍ଵାରା ତିଆରି ହୋଇଥିବା କଂକ୍ରିଟ ବଙ୍କରକୁ ଯବାନ ମାନେ ଠାବ କରିଛନ୍ତି। ବଙ୍କର ଭିତରେ ରହିବା ଏବଂ ଖାଇବା ପାଇଁ ସମସ୍ତ ସୁବିଧା ରହିଥିବା ବେଳେ ଏହା ମଧ୍ୟରେ ମାଓ ନେତା ସମସ୍ତ ପ୍ରକାରର ସୁବିଧା ପାଇ ବ୍ୟବସ୍ଥା କରଯାଇଥିଲା। ଅନେକ ସମୟରେ ଯବାନଙ୍କ କବଳରୁ ଜଙ୍ଗଲ ମଧ୍ୟରେ ମାଓ ନେତା ହିଡମା ଓ ଅନ୍ୟ ବଡ ନେତା ଖସି ପଳାଇ ଯାଉଥିବା କୁହାଯାଉଥିବା ବେଳେ ସେମାନେ ନିଜର ସୁରକ୍ଷା ପାଇଁ ଏହି ବଙ୍କର ମଧ୍ୟରେ ଦୀର୍ଘ ଦିନ ଧରି ଲୁଚି ରହୁଥିବା ସୂଚନା ମିଳିଛି। ବଙ୍କରଟିକୁ ମାଓବାଦୀ ମାନେ ମାଟି ଓ ଗଛ ପତ୍ର ପକାଇ ଘୋଡାଇ ରଖୁଥିବା ବେଳେ ଯବାନ ମାନେ ଏହାର ସୁରାକ ପାଇବା ପରେ ବଙ୍କରକୁ ନଷ୍ଟ କରିଦେଇଥିବା ଜଣା ପଡିଛି।
