ନୂଆଦିଲ୍ଲୀ: ସ୍ପେନର ଜାରାଗୋଜାରେ ଏକ ଦୁଃଖଦ ଦୁର୍ଘଟଣା ଘଟିଛି। ଏଠାରେ ଥିବା ଏକ ନର୍ସିଂ ହୋମ୍ରେ ନିଆଁ ଲାଗିବା କାରଣରୁ ଅତି କମରେ ୧୦ ଜଣଙ୍କର ମୃତ୍ୟୁ ଘଟିଛି। ସ୍ଥାନୀୟ ଅଧିକାରୀ ମାନେ ଶୁକ୍ରବାର ଏ ବିଷୟରେ ସୂଚନା ଦେଇଛନ୍ତି । ଉତ୍ତର ପୂର୍ବାଞ୍ଚଳ ମାଡ୍ରିଡ ଠାରୁ ପ୍ରାୟ ୩୦ ମିନିଟ୍ ରାସ୍ତା ଦୂର ଉତ୍ତରରେ ଥିବା ଭିଲ୍ଲା ଫ୍ରାଙ୍କା ଡି ଏବ୍ରୋ ନର୍ସିଂହୋମରେ ଅଗ୍ନିକାଣ୍ଡ ଘଟିଛି । ତେବେ ଅଗ୍ନିକାଣ୍ଡ ସମ୍ପର୍କରେ ଅଧିକାରୀ ମାନଙ୍କୁ ସୂଚନା ଦିଆଯାଇଥିଲା। ସୂଚନା ପାଇବା ପରେ ଅଗ୍ନିଶମ ବାହିନୀ ଦଳ ଘଟଣାସ୍ଥଳରେ ପହଞ୍ଚିଥିଲେ । ଅଧିକାରୀଙ୍କ ଅନୁଯାୟୀ ଦୁଇ ଜଣଙ୍କ ଅବସ୍ଥା ଗୁରୁତର ରହିଛି । ସ୍ଥାନୀୟ ଗଣମାଧ୍ୟମ ଅନୁଯାୟୀ ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ଜଣା ପଡିନାହିଁ । ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି ଯେ ନର୍ସିଂହୋମରେ ୮୨ ଜଣ ଥିଲେ । ମାନସିକ ସ୍ବାସ୍ଥ୍ୟ ସମସ୍ୟାରେ ପୀଡିତ ଲୋକଙ୍କୁ ଏହି ନର୍ସିଂହୋମରେ ଚିକିତ୍ସା କରାଯାଏ।
ଅରଗୋନର ସ୍ଥାନୀୟ ପ୍ରଶାସନର ମୁଖ୍ୟ ଜର୍ଜ ଆଜକନ୍ ମୃତ୍ୟୁକୁ ନିଶ୍ଚିତ କରି ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ କହିଛନ୍ତି ଯେ ଆଜି ଏହି ଅଞ୍ଚଳର ସମସ୍ତ ସରକାରୀ କାର୍ଯ୍ୟକ୍ରମ ବାତିଲ କରାଯାଇଛି । ଏହି ଅଗ୍ନିକାଣ୍ଡ ଏବଂ ଏଠାରେ ମୃତ୍ୟୁକୁ ନେଇ ସ୍ପେନର ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ ମଧ୍ୟ ଦୁଃଖ ପ୍ରକାଶ କରିଛନ୍ତି । ଶୁକ୍ରବାର ସକାଳେ ଭିଲା ଫ୍ରାଙ୍କା ଡି ଏବ୍ରୋ ମେୟର ଭୋଲଗା ରାମିରେଜ ଗଣମାଧ୍ୟମକୁ କହିଛନ୍ତି ଯେ ମୃତ୍ୟୁ ପାଇଁ ନିଆଁରୁ ଧୂଆଁ ଦାୟୀ ।
