ନୂଆଦିଲ୍ଲୀ,୩୧/୦୭: ମହାରାଷ୍ଟ୍ରର ମାଲେଗାଓଁ ବିସ୍ଫୋରଣ ମାମଲାରେ କୋର୍ଟଙ୍କ ନିଷ୍ପତ୍ତି ଆସିଛି। ଏହି ନିଷ୍ପତ୍ତିରେ ସମସ୍ତ ଅଭିଯୁକ୍ତଙ୍କୁ ପ୍ରମାଣ ଅଭାବରୁ ନିର୍ଦ୍ଦୋଷରେ ଖଲାସ କରାଯାଇଛି। ନିଷ୍ପତ୍ତି ଆସିବା ପରଠାରୁ ପୀଡ଼ିତ ପରିବାରଙ୍କ ଅସନ୍ତୋଷ ମଧ୍ୟ ସାମ୍ନାକୁ ଆସିବା ଆରମ୍ଭ ହୋଇଛି। ମାଲେଗାଓଁ ବିସ୍ଫୋରଣ ମାମଲାରେ ପୀଡ଼ିତ ପରିବାରଙ୍କୁ ସାହାଯ୍ୟ କରୁଥିବା ଏକ ସଂଗଠନ ସାତ ଜଣ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରାଯିବା ଉପରେ ଅସନ୍ତୋଷ ପ୍ରକାଶ କରିଛି। ଜମାତ-ଏ-ତଞ୍ଜିମ ସଂଗଠନ ଏହା ମଧ୍ୟ କହିଛି ଯେ କୋର୍ଟଙ୍କ ନିଷ୍ପତ୍ତି, ଘଟଣାରେ ମୃତ ଲୋକଙ୍କୁ ନ୍ୟାୟ ପ୍ରଦାନ କରିବାରେ ସମ୍ପୂର୍ଣ୍ଣ ବିଫଳ ହୋଇଛି। ଏଥି ସହିତ ସେମାନେ ପ୍ରଶ୍ନ ଉଠାଇଛନ୍ତି ଯେ ଯଦି ଏମାନେ ଘଟଣାରେ ସମ୍ପୃକ୍ତ ନଥିଲେ, ତେବେ ଏଥିପାଇଁ ଦାୟୀ କିଏ?
କେଉଁଠି ହୋଇଥିଲା ବିସ୍ଫୋରଣ?
୨୯ ସେପ୍ଟେମ୍ବର ୨୦୦୮ରେ ମୁମ୍ବାଇଠାରୁ ପ୍ରାୟ ୨୦୦ କିଲୋମିଟର ଦୂର ମାଲେଗାଓଁରେ ଏକ ମସଜିଦ ନିକଟରେ ଗୋଟିଏ ମୋଟରସାଇକେଲ ବିସ୍ଫୋରଣ ଘଟି ୬ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୦୧ ଜଣ ଆହତ ହୋଇଥିଲେ। ବିସ୍ଫୋରଣର ୧୭ ବର୍ଷ ପରେ, ଏନ୍ଆଇଏର ଏକ ସ୍ୱତନ୍ତ୍ର କୋର୍ଟ ଗୁରୁବାର ପୂର୍ବତନ ବିଜେପି ସାଂସଦ ପ୍ରଜ୍ଞା ସିଂହ ଠାକୁର ଏବଂ ଲେଫ୍ଟନାଣ୍ଟ କର୍ଣ୍ଣେଲ ପ୍ରସାଦ ପୁରୋହିତଙ୍କ ସମେତ ସମସ୍ତ ସାତ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଦେଇଛନ୍ତି, କହିଛନ୍ତି ଯେ ସେମାନଙ୍କ ବିରୁଦ୍ଧରେ "କୌଣସି ବିଶ୍ୱସନୀୟ ଏବଂ ଠୋସ୍ ପ୍ରମାଣ ନାହିଁ"।
ଅସନ୍ତୋଷ କରିଛି କୋର୍ଟଙ୍କ ନିଷ୍ପତ୍ତି:
ସମଗ୍ର ଜମାତ-ଏ-ତଞ୍ଜୀମ ସଂଗଠନର ପ୍ରଭାରୀ ଫିରୋଜ ଅହମ୍ମଦ ଆଜମୀ କହିଛନ୍ତି, "ମାଲେଗାଓଁ ବିସ୍ଫୋରଣ ମାମଲାରେ କୋର୍ଟଙ୍କ ନିଷ୍ପତ୍ତି ଆମକୁ ଅସନ୍ତୋଷ କରିଛି, କାରଣ ମୃତକମାନଙ୍କୁ ନ୍ୟାୟ ମିଳିନାହିଁ।" ୨୦୦୮ ମାଲେଗାଓଁ ବିସ୍ଫୋରଣ ପରେ, ଆମେ ସବୁବେଳେ ଏଜେନ୍ସିଗୁଡ଼ିକୁ ସଠିକ ଦିଗରେ କାମ କରିବାକୁ ଦାବି କରିଥିଲୁ। ୨୦୦୮ ବିସ୍ଫୋରଣ ପରେ, ତତ୍କାଳୀନ ମହାରାଷ୍ଟ୍ର ଆତଙ୍କବାଦ ନିରୋଧୀ ସ୍କ୍ୱାଡ୍ (ଏଟିଏସ୍) ମୁଖ୍ୟ ହେମନ୍ତ କରକରେ ଉପଯୁକ୍ତ ତଦନ୍ତ କରିଥିଲେ ଏବଂ ଏହି ଅଭିଯୁକ୍ତମାନଙ୍କ ବିରୁଦ୍ଧରେ ମାମଲା ରୁଜୁ କରିଥିଲେ। ସେ ଆହୁରି ମଧ୍ୟ କହିଛନ୍ତି, "ଆମେ ଖୁସି ଥିଲୁ କାରଣ ତଦନ୍ତ ସଠିକ ଦିଗରେ ଗତି କରୁଥିଲା। ଏଜେନ୍ସିଗୁଡ଼ିକ ଗତ ୧୭ ବର୍ଷ ଧରି କାମ କରୁଥିଲେ, ତେଣୁ ସେମାନଙ୍କ ପାଖରେ ନିଶ୍ଚିତ ଭାବରେ ଦୃଢ଼ ପ୍ରମାଣ ଥିଲା କିନ୍ତୁ କୋର୍ଟ ଏପରି ରାୟ ଦେଇଛନ୍ତି ଯାହା ଆମକୁ ଚିନ୍ତିତ କରିଛି,।"
ମାଲେଗାଓଁ ମାମଲାର ଦୋଷୀ କିଏ?
ଆଜମୀ କହିଛନ୍ତି, "ବିସ୍ଫୋରଣରେ ମୃତ ଲୋକଙ୍କୁ ନ୍ୟାୟ ମିଳିନାହିଁ। ଯଦି ଏହି ଲୋକମାନେ ମାଲେଗାଓଁ ବିସ୍ଫୋରଣ ପାଇଁ ଦାୟୀ ନଥିଲେ, ତେବେ ଏଥିରେ କିଏ ସମ୍ପୃକ୍ତ ଥିଲେ? ଏଜେନ୍ସିଗୁଡ଼ିକ ଦୋଷୀଙ୍କୁ ଧରିବା ପାଇଁ ଏହି ନିଷ୍ପତ୍ତି ବିରୁଦ୍ଧରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବା ଉଚିତ," ସେ ଆହୁରି ମଧ୍ୟ କହିଛନ୍ତି ଯେ ଏପରି ନିଷ୍ପତ୍ତି ପୀଡ଼ିତ ପରିବାରଙ୍କୁ ଆଶ୍ୱସ୍ତି ଦେବା ପରିବର୍ତ୍ତେ ଅସୁବିଧାରେ ପକାଇଛି।" ମାଲେଗାଓଁ ବୋମା ବିସ୍ଫୋରଣ ପୀଡ଼ିତ ଆଖଲାକ ଅହମ୍ମଦ କହିଛନ୍ତି ଯେ ଏହି ନିଷ୍ପତ୍ତି ସମ୍ପୂର୍ଣ୍ଣ ଭୁଲ। ଆମେ ଏହି ନିଷ୍ପତ୍ତିକୁ ମୁମ୍ବାଇ ହାଇକୋର୍ଟରେ ଚ୍ୟାଲେଞ୍ଜ କରିବୁ। ବୋମା ବିସ୍ଫୋରଣ ହୋଇଥିଲା ଏବଂ ଅନେକ ଲୋକଙ୍କ ମୃତ୍ୟୁ ହୋଇଥିଲା ଏବଂ ଅନେକ ଲୋକ ଆହତ ହୋଇଥିଲେ। ଆମେ ଜାଣିନାହୁଁ ଯେ କୋର୍ଟ କେଉଁ ଆଧାରରେ ନିଷ୍ପତ୍ତି ନେଇଛନ୍ତି, କିନ୍ତୁ ଏପରି ନିଷ୍ପତ୍ତିରେ ଆମେ ବହୁତ ଦୁଃଖିତ ଏବଂ ଅସନ୍ତୋଷ ବ୍ୟକ୍ତ କରୁଛୁ।"
