ନୂଆଦିଲ୍ଲୀ: କ୍ରିକେଟର ସର୍ବୋଚ୍ଚ ସଂସ୍ଥା ଅନ୍ତର୍ଜାତୀୟ କ୍ରିକେଟ ପରିଷଦ (ICC) ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କୁ ICC ହଲ୍ ଅଫ୍ ଫେମ୍ରେ ସାମିଲ କରିଛି। ମହେନ୍ଦ୍ର ସିଂହ ଧୋନୀ ICC ହଲ୍ ଅଫ୍ ଫେମ୍ରେ ସାମିଲ ହେବାରେ ୧୧ତମ ଭାରତୀୟ କ୍ରିକେଟର। ଧୋନୀଙ୍କ ପୂର୍ବରୁ ବିଶନ ସିଂହ ବେଦୀ, କପିଲ ଦେବ, ସୁନୀଲ ଗାଭାସ୍କର, ଅନିଲ କୁମ୍ବଲେ, ସଚିନ ତେନ୍ଦୁଲକର, ଭିନୁ ମଙ୍କଡ, ବୀରେନ୍ଦ୍ର ସେହୱାଗ, ରାହୁଲ ଦ୍ରାବିଡ, ନୀତୁ ଡେଭିଡ୍ ଏବଂ ଡାଏନା ଏଡୁଲଜିଙ୍କୁ ICC ହଲ୍ ଅଫ୍ ଫେମ୍ରେ ସାମିଲ କରାଯାଇଛି । ମହେନ୍ଦ୍ର ସିଂହ ଧୋନୀଙ୍କ ଅଧିନାୟକତ୍ୱରେ, ଟିମ୍ ଇଣ୍ଡିଆ ତିନୋଟି ICC ଟ୍ରଫି ଜିତିଥିଲା।
ଅଧିନାୟକ ଭାବରେ ଧୋନୀ ୨୦୦୭ ଟି-20 ବିଶ୍ୱକପ୍, ୨୦୧୧ ଦିନିକିଆ ବିଶ୍ୱକପ୍ ଏବଂ ୨୦୧୩ ଚାମ୍ପିଅନ୍ସ ଟ୍ରଫି ଜିତିଥିଲେ। ସେ ବିଶ୍ୱର ପ୍ରଥମ ଅଧିନାୟକ ଯିଏ ତିନୋଟି ଭିନ୍ନ ICC ଟ୍ରଫି ଜିତିଥିଲେ। ଧୋନୀ କେବଳ ଭାରତରେ ନୁହେଁ ବରଂ ବିଶ୍ୱର ସବୁଠାରୁ ସଫଳ ଅଧିନାୟକଙ୍କ ମଧ୍ୟରେ ଅନ୍ୟତମ । ଆଇସିସି ହଲ୍ ଅଫ୍ ଫେମରେ ସାମିଲ ହେବା ପରେ, ପୂର୍ବତନ ଭାରତୀୟ ଅଧିନାୟକ ଧୋନୀ କହିଛନ୍ତି ଯେ, ଏହି ସମ୍ମାନ ସର୍ବଦା ତାଙ୍କ ସହିତ ରହିବ। ଆଇସିସି ହଲ୍ ଅଫ୍ ଫେମରେ ସାମିଲ ହେବା ଏକ ସମ୍ମାନର ବିଷୟ, ଯାହା ବିଭିନ୍ନ ପିଢ଼ି ଏବଂ ବିଶ୍ୱର କ୍ରିକେଟରଙ୍କ ଅବଦାନକୁ ସ୍ୱୀକୃତି ଦିଏ।
ଧୋନୀ ଭାରତ ପାଇଁ ୩୫୦ଟି ଦିନିକିଆ ଖେଳି ୫୦.୫୭ ହାରରେ ୧୦୭୭୩ ରନ କରିଛନ୍ତି । ଏହି ସମୟ ମଧ୍ୟରେ ସେ ୧୦ ଟି ଶତକ ଏବଂ ୭୩ ଟି ଅର୍ଦ୍ଧଶତକ ମଧ୍ୟ କରିଛନ୍ତି । ସେ ୯୦ ଟି ଟେଷ୍ଟ ମ୍ୟାଚ ମଧ୍ୟ ଖେଳିଥିଲେ । ସେ ୬ ଟି ଶତକ ସହିତ ଟେଷ୍ଟରେ ୪୮୭୬ ରନ କରିଛନ୍ତି। ସେ ୨୦୧୯ ବିଶ୍ୱକପ ସେମିଫାଇନାଲରେ ନ୍ୟୁଜିଲାଣ୍ଡ ବିପକ୍ଷରେ ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ ଏବଂ ଅଗଷ୍ଟ ୨୦୨୦ରେ ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିଥିଲେ ।
ଧୋନୀଙ୍କ ବ୍ୟତୀତ ଅଷ୍ଟ୍ରେଲିଆର କିମ୍ବଦନ୍ତୀ ବ୍ୟାଟର ମାଥ୍ୟୁ ହେଡେନ୍, ନ୍ୟୁଜିଲାଣ୍ଡର ପୂର୍ବତନ ଅଧିନାୟକ ଡାନିଏଲ୍ ଭିଟୋରି, ଦକ୍ଷିଣ ଆଫ୍ରିକାର ପୂର୍ବତନ କ୍ରିକେଟର ହାସିମ୍ ଆମଲା ଏବଂ ଗ୍ରେମ ସ୍ମିଥ୍ ମଧ୍ୟ ଆଇସିସି ହଲ୍ ଅଫ୍ ଫେମ୍ରେ ସାମିଲ ହୋଇଛନ୍ତି। ଏହି ବର୍ଷ ମୋଟ ପାଞ୍ଚ ଜଣ ପୁରୁଷ ଏବଂ ଦୁଇ ଜଣ ମହିଳା କ୍ରିକେଟରଙ୍କୁ ଏହି ମର୍ଯ୍ୟାଦାଜନକ ତାଲିକାରେ ସାମିଲ କରାଯାଇଛି। ଏହି ପାଞ୍ଚ ଜଣ ପୁରୁଷ କ୍ରିକେଟରଙ୍କ ବ୍ୟତୀତ, ଇଂଲଣ୍ଡର କିମ୍ବଦନ୍ତୀ ସାରା ଟେଲର ଏବଂ ପାକିସ୍ତାନର ସାନା ମିର୍ ମଧ୍ୟ ଆଇସିସି ହଲ୍ ଅଫ୍ ଫେମ୍ରେ ସାମିଲ ହୋଇଛନ୍ତି। ICC ହଲ୍ ଅଫ୍ ଫେମ୍ କ୍ରିକେଟର ମହାନ ଖେଳାଳିଙ୍କ ସଫଳତାକୁ ସ୍ୱୀକୃତି ଦିଏ। ଏହା ୨୦୦୯ ମସିହାରେ ଆରମ୍ଭ ହୋଇଥିଲା । ସେବେଠାରୁ ୧୨୨ ଜଣ ଖେଳାଳିଙ୍କୁ ଏଥିରେ ସାମିଲ କରାଯାଇଛି ।
