ଲକ୍ଷ୍ନୌ: ଉତ୍ତର ପ୍ରଦେଶର କ୍ୟାବିନେଟ ମନ୍ତ୍ରୀ ଓମପ୍ରକାଶ ରାଜଭରଙ୍କ ଘରୁ ଲକ୍ଷ ଲକ୍ଷ ଟଙ୍କା ଚୋରି । ଏହି ମାମଲାରେ ମନ୍ତ୍ରୀଙ୍କ ପୁଅଙ୍କ ଡ୍ରାଇଭରକୁ ପୋଲିସ ଗିରଫ କରିଛି । ଗିରଫ ହୋଇଥିବା ଡ୍ରାଇଭର ହିଁ ମନ୍ତ୍ରୀ ଓମପ୍ରକାଶଙ୍କ ଘରୁ ଲକ୍ଷାଧିକ ଟଙ୍କା ଚୋରି କରିଛି ବୋଲି ପୋଲିସ କହିଛି । ମିଳିଥିବା ସୂଚନା ଅନୁସାରେ, ଟାଣ୍ଡା କୋତବାଲିରେ ଥିବା ପାହାଡ଼ପୁର ଗାଁର ବାସିନ୍ଦା ରାମଜିତ ରାଜଭର ରାଜ୍ୟର ମନ୍ତ୍ରୀ ଓମପ୍ରକାଶ ରାଜଭରଙ୍କ ପୁଅ ଅରବିନ୍ଦ ରାଜଭରଙ୍କ ଗାଡ଼ି ଚଳାଉଥିଲା ।
ରାମଜିତର ପରିବାର ଲୋକେ କହିଛନ୍ତି, ନଭେମ୍ବର ୫ରେ ପ୍ରଥମେ ବାଇକରେ ଏବଂ ପରେ କାରରେ ପୋଲିସ ଆସିଥିଲେ । ଏହା ପରେ ପୋଲିସ ରାମଜିତକୁ ଗାଁରୁ ନେଇଯାଇଥିଲେ । ପରବର୍ତ୍ତୀ ସମୟରେ ରାମଜିତକୁ ଧରି ପୋଲିସ ପୁଣି ଥରେ ଗାଁକୁ ଆସିଥିଲା ଏବଂ ତା ଘରେ ଖୋଜାଖୋଜି କରିଥିଲା । ହାଇପ୍ରୋଫାଇଲ ମାମଲା ହୋଇଥିବାରୁ ପୋଲିସ ଅଧିକ କିଛି ସୂଚନା ନଦେଇ ତଦନ୍ତ ଚଳାଇଛି । ଚୋରି ଟଙ୍କା ପୋଲିସ ଜବତ କରିଛି ବୋଲି ଜଣାପଡ଼ିଛି ।
ମନ୍ତ୍ରୀଙ୍କ ସହ ରାମଜିତର ସଂପର୍କ ବହୁ ପୁରୁଣା । ରାମଜିତ ପ୍ରଥମେ ଓମପ୍ରକାଶଙ୍କ ଗାଡ଼ି ଚଲାଉଥିଲା ଏବଂ ପରେ ତାଙ୍କ ପୁଅଙ୍କ ଡ୍ରାଇଭର ହୋଇଥିଲା । ସେପଟେ ଅଭିଯୁକ୍ତ ରାମଜିତର ପତ୍ନୀ କହିଛନ୍ତି ଯେ, ଧନତେରସ ଦିନ ସେ ଘରକୁ ଆସିଥିଲେ । ଆଜି ପୋଲିସ ଆସି ତାଙ୍କୁ ସାଙ୍ଗରେ ନେଇଯାଇଛି । ଏହି ସମୟରେ ଟଙ୍କା ଭର୍ତ୍ତି ଏକ ବଡ଼ ପଲିଥିନ ମଧ୍ୟ ପାଇଛି ପୋଲିସ । ଯାଞ୍ଚ ସମୟରେ ପୋଲିସ ଘରେ ଥିବା ଗହମ ଢ଼ାଳି ଦେଇଥିବା ବେଳେ ଅନ୍ୟ ଜିନିଷଗୁଡ଼ିକୁ ଫୋପାଡ଼ି ଦେଇଛି ବୋଲି ରାମଜିତର ପତ୍ନୀ ଅଭିଯୋଗ ମଧ୍ୟ କରିଛନ୍ତି । ଏନେଇ ପୋଲିସ କୌଣସି ପ୍ରତିକ୍ରିୟା ଦେଇ ନାହିଁ ।
