ନୂଆଦିଲ୍ଲୀ: ପ୍ରାୟ ଦୁଇ ଦଶନ୍ଧୀ ପରେ କୁଏତ ପାକିସ୍ତାନର ନାଗରିକମାନଙ୍କୁ ବଡ଼ ଆଶ୍ୱସ୍ତି ଦେଇଛି। କୁଏତ ପାକିସ୍ତାନୀ ନାଗରିକଙ୍କ ଉପରେ ୧୯ ବର୍ଷ ପୁରୁଣା ଭିସା ପ୍ରତିବନ୍ଧକ ଉଠାଇ ଦେଇଛି । ଏପର୍ଯ୍ୟନ୍ତ ପାକିସ୍ତାନୀ ନାଗରିକମାନେ କୁଏତ ଭିସା ପାଇଁ ଆବେଦନ କରିପାରୁ ନଥିଲେ। ମୁସଲିମ ବହୁଳ ଦେଶ କୁଏତର ଏହି ନିଷ୍ପତ୍ତି ପାକିସ୍ତାନୀ ନାଗରିକଙ୍କ ପାଇଁ ସେଠାରେ ଚାକିରି କରିବା ଲାଗି ଭଲ ସୁଯୋଗ ସୃଷ୍ଟି କରିବ। ପାକିସ୍ତାନୀମାନେ କୁଏତର ସ୍ୱାସ୍ଥ୍ୟସେବା, ତୈଳ ଏବଂ କୁଶଳୀ ଶ୍ରମ କ୍ଷେତ୍ରରେ କାମ କରିପାରିବେ। ସେପଟେ କୁଏତର ଏହି ନିଷ୍ପତ୍ତି ପାକିସ୍ତାନ ସହିତ ଏହାର ଦ୍ୱିପାକ୍ଷିକ ସମ୍ପର୍କରେ ମଧ୍ୟ ଉନ୍ନତି ଆଣିବ।

ଗଲ୍ଫ ନ୍ୟୁଜ୍ ଅନୁଯାୟୀ, କୁଶଳୀ ଶ୍ରମିକଙ୍କ ଚାହିଦା ବୃଦ୍ଧି ପାଉଥିବାରୁ କୁଏତ ପାକିସ୍ତାନର ଲୋକମାନଙ୍କୁ ନିଯୁକ୍ତି ଦେବା ଆରମ୍ଭ କରିଛି। ଏଥିରେ ୧୨୦୦ ନର୍ସଙ୍କ ପ୍ରାରମ୍ଭିକ ବ୍ୟାଚ୍ ଅନ୍ତର୍ଭୁକ୍ତ । କାର୍ଯ୍ୟ, ପରିବାର, ପର୍ଯ୍ୟଟକ ଏବଂ ବ୍ୟବସାୟିକ ଭିସା ପୁନଃ ଆରମ୍ଭ ହେବା ଦ୍ୱାରା କୁଏତରେ ପାକିସ୍ତାନୀମାନଙ୍କ ପାଇଁ ଅନେକ ସୁଯୋଗ ସୃଷ୍ଟି ହେବ। ପାକିସ୍ତାନୀ ନାଗରିକମାନେ ଏବେ କୁଏତ ଭିସା ପାଇଁ ଆବେଦନ କରିପାରିବେ।

ଭିସା ଆବେଦନ ଏବେ ଅନଲାଇନ୍ ପ୍ଲାଟଫର୍ମ ମାଧ୍ୟମରେ ଉପଲବ୍ଧ ହେବ। ଏହା ପାକିସ୍ତାନୀମାନଙ୍କ ପାଇଁ ଆବେଦନ କରିବା ଏବଂ ସେମାନଙ୍କର ଯାତ୍ରା ଯୋଜନା କରିବା ସହଜ କରିଛି। କୁଏତରେ ପାକିସ୍ତାନର ରାଷ୍ଟ୍ରଦୂତ ଡକ୍ଟର ଜାଫର ଇକବାଲ ଏହି ନିଷ୍ପତ୍ତି ଉପରେ କହିଛନ୍ତି ଯେ, ଏହା ପାକିସ୍ତାନ- କୁଏତ ସମ୍ପର୍କର ଏକ ମାଇଲଖୁଣ୍ଟ। ପାକିସ୍ତାନୀମାନଙ୍କ ପାଇଁ ଭିସା  ପ୍ରତିବନ୍ଧକ ହଟିବା ପରେ କୁଏତର ଶ୍ରମ ଆବଶ୍ୟକତା ପୂରଣ ହେବ ତାହା ନୁହେଁ ବରଂ ପାକିସ୍ତାନର ହଜାର ହଜାର ପରିବାର ଲାଭବାନ ହେବେ।

କୁଏତରେ ହଜାର ହଜାର ଦକ୍ଷ ପାକିସ୍ତାନୀ ଶ୍ରମିକଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି ହେବ । ଉଭୟ ଦେଶ ଆର୍ଥିକ ସହଯୋଗ ଆଡକୁ ଅଗ୍ରସର ହୋଇପାରିବେ। କୁଏତ ବଜାରରେ ପୁଣି ଥରେ ପ୍ରବେଶ ଅନୁମତି ମିଳିବା ପରେ ପାକିସ୍ତାନୀ ଉଦ୍ୟୋଗୀ ଏବଂ ନିବେଶକଙ୍କ ପାଇଁ ଡ଼ୂତନ ଅବସର ମିଳିବ। ବିଶେଷଜ୍ଞମାନେ କହିଛନ୍ତି ଯେ, ଅର୍ଥନୀତି ବ୍ୟତୀତ, ଏହି ନିଷ୍ପତ୍ତି ଲୋକଙ୍କ ମଧ୍ୟରେ ସମ୍ପର୍କ ବୃଦ୍ଧି କରିବ ।

କୁଏତ ଏବଂ ପାକିସ୍ତାନ ଏକ ନୂତନ ଶ୍ରମ ବୁଝାମଣାପତ୍ର (MoU) ଉପରେ ମଧ୍ୟ ଆଲୋଚନା କରୁଛନ୍ତି। ଏହା କୁଏତରେ ପାକିସ୍ତାନୀ ଶ୍ରମିକଙ୍କ ଅଧିକାରକୁ ନିୟନ୍ତ୍ରଣ ଏବଂ ସୁରକ୍ଷା ଦେବ । ଏହା ପ୍ରବାସୀ ଶ୍ରମିକଙ୍କ ପାଇଁ ଏକ ସୁରକ୍ଷିତ ଢାଞ୍ଚା ପ୍ରଦାନ କରିବ। ଏହା ସହିତ ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ନିବେଶ ମଧ୍ୟ ବଢ଼ିବ ବୋଲି ଆଶା କରାଯାଉଛି ।