ହରଭଙ୍ଗା, ୨୭/୫(ଆପ୍ର): ପୁଣି ଚାରି ନଂ ଟନେଲରେ ଅନ୍ୟ ସ୍ଥାନରେ ମାଟି ଧସି ସୃଷ୍ଟି ହୋଇଛି ଗର୍ତ୍ତ l ଖୋର୍ଦ୍ଧା-ବଲାଙ୍ଗୀର ରେଳ ପ୍ରକଳ୍ପରେ ବୌଦ୍ଧ ଜିଲ୍ଲା ଆଡ଼େଣି ଗଡ଼ ନିକଟସ୍ଥ କଖାରୁଫାଳ ଟନେଲ ନଂ ୪ରେ ମାଟି ଭୁଶୁଡିବା ୨୦ ଘଣ୍ଟା ନପୁରୁଣୁ ସେହି ସ୍ଥାନରୁ ମାତ୍ର ୫୦ ମିଟର ଦୂରରେ ଆଉ ଏକ ଗର୍ତ୍ତ ସୃଷ୍ଟି ହୋଇଛି। ଏହି ଗର୍ତ୍ତ ୧୦ ଫୁଟ ଓସାରିଆ ହୋଇଥିବା ଦେଖିବାକୁ ମିଳିଛି। ପ୍ରାୟ ୨୦ ଫୁଟ ତଳକୁ ମାଟି ଅତଡା ଖସିଥିବାବେଳେ ଟନେଲ ତଳକୁ ମାଟି ଯାଇଛି ନା ନାହିଁ ତାହା ଏଯାଏ ସ୍ପଷ୍ଟ ହୋଇ ପାରିନାହିଁ । 

ଘଟଣାସ୍ଥଳରେ ଜଣେ କର୍ମଚାରୀ ଅନୁଧ୍ୟାନ କରି ଫେରିଥିବା ବେଳେ ଉପରିସ୍ଥ ଅଧିକାରୀଙ୍କୁ ଜଣାଇଥିବା ସୂଚନା ମିଳିଛି। ତେବେ ଗତ ୨୦ ଘଣ୍ଟା ଧରି ଏହି ଟନେଲରେ ବାରମ୍ବାର ମାଟି ଧସି ଦୁର୍ଘଟଣା ଘଟୁଥିବା ଓ ଗତକାଲିର ମାଟି ଅତଡ଼ା ଏ ପର୍ଯ୍ୟନ୍ତ ଠିକା ସଂସ୍ଥା ବାହାର କରିନଥିବା ନେଇ କ୍ଷୟକ୍ଷତିର ସୂଚନା ସଂପୁର୍ଣ ମିଳିପାରିନାହିଁ l