ଚନ୍ଦନେଶ୍ଵର, ୨୭/୦୫: ସରକାର ଧାନର ସହାୟକ ମୂଲ୍ୟ ୩୧୦୦ ଟଙ୍କାକୁ ବୃଦ୍ଧି କରିବା ପରେ ଧାନକିଣାକୁ ନେଇ ଖରିଫ ଠାରୁ ରବି ଋତୁ ପର୍ଯ୍ୟନ୍ତ ଦେଖା ଦେଉଛି ନାନା ସମସ୍ୟା । କାଣ୍ଟଛାଣ୍ଟକୁ ଚାଷୀ ଆପାତତଃ ସହ୍ୟ କରି ନେଉଥିବା ବେଳେ ସରକାରଙ୍କ ଟାର୍ଗେଟକୁ ନେଇ ଅସନ୍ତୋଷ ହେଉଛି । ଧାନମଣ୍ଡି ଖୋଲିବାର ଏକ ସପ୍ତାହ ପୂରିଥିଲେ ମଧ୍ୟ ଉପୁଜୁଥିବା ସମସ୍ୟା ପାଇଁ ଧାନକିଣା ଆରମ୍ଭ ହୋଇ ପାରୁନାହିଁ। ଏଭଳି ଏକ ସମ୍ବେଦନଶୀଳ ଘଟଣାକୁ ନେଇ ଭୋଗରାଇ ବିଧାୟକ ଗୌତମବୁଦ୍ଧ ଦାସ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର ପ୍ରମୁଖ ସଚିବ ସଞ୍ଜୟ କୁମାର ସିଂ ଏବଂ ବିଭାଗୀୟ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ରଙ୍କୁ ଲିଖିତ ଅବଗତ କରିଛନ୍ତି । ଧାନକିଣାର ଟାର୍ଗେଟ ବୃଦ୍ଧି ପାଇଁ ସେ ନିବେଦନ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ବାଲେଶ୍ଵର ଜିଲ୍ଲାର ଭାତହାଣ୍ଡି କୁହା ଯାଉଥିବା ଭୋଗରାଇ ବ୍ଲକରେ ଚଳିତ ରବି ଋତୁରେ ୫ଲକ୍ଷ କ୍ୟୁଇଣ୍ଟାଲରୁ ଅଧିକ ଧାନ ଅମଳ ହୋଇଛି । ମାତ୍ର ୧୯ଟି ସେବା ସମବାୟ ସମିତି ଜରିଅରେ ସରକାର ୧୮ହଜାର ୫ଶହ କ୍ୟୁଇଟାଲ ଧାନ କିଣିବା ପାଇଁ ଟାର୍ଗେଟ ରଖିଛନ୍ତି । ଅବଶିଷ୍ଟ ଧାନ ଚାଷୀ କରିବେ କଣ? ଗୋଟିଏ ପଟେ ଧାନକୁ ପଶ୍ଚିମବଙ୍ଗର ବେପାରୀ ନ କିଣିବା ପାଇଁ କଟକଣା ରହିଥିବା ବେଳେ ଅନ୍ୟପଟେ ଟାର୍ଗେଟ ମଧ୍ୟ କମ୍ । ଯେଉଁ ଚାଷୀ ୨ଶହ କ୍ୟୁଇଣ୍ଟାଲ ଧାନ ବିକିବା ପାଇଁ ଟୋକନ ପାଇଛନ୍ତି ସମିତି ତାଙ୍କ ଠାରୁ ୫୦କ୍ୟୁଇଣ୍ଟାଲ କିଣିବା ପାଇଁ ସକ୍ଷମ ହେଉଛି।
ଏଭଳି ପରିସ୍ଥିତିରେ ଉଭୟ ଚାଷୀ ଓ ସମବାୟ ସମିତି ହରଡ଼ଘଟଣାରେ ପଡ଼ିଛନ୍ତି। ତେବେ ସମସ୍ତ ଘଟଣା ସମ୍ପର୍କରେ ବିଧାୟକ ବିଭାଗୀୟ ସଚିବଙ୍କୁ ଅବଗତ କରିବା ସହ ଆହୁରି ୩ଲକ୍ଷ କ୍ୟୁଇଟାଲ ଧାନ କିଣିବା ପାଇଁ ନିବେଦନ କରିଥିଲେ । ଶ୍ରୀ ସିଂ ଏହାର ଗୁରୁତ୍ବକୁ ଉପଲବ୍ଧି କରି ଖୁବଶିଘ୍ର ବାଲେଶ୍ବରକୁ ଆହୁରି ୮ଲକ୍ଷ କ୍ୟୁଇଣ୍ଟାଲ ଧାନ କିଣିବା ପାଇଁ ଟାର୍ଗେଟ ଦିଆ ଯିବ ବୋଲି ପ୍ରତିଶୃତି ଦେଇଥିବା କଥା ବିଧୟକ ଦାସ ପ୍ରକାଶ କରିଛନ୍ତି । ଏପରି ହେଲେ ଭୋଗରାଇ ଚାଷୀଙ୍କ ସମସ୍ୟା ନିଶ୍ଚିତ ହଟି ଯିବ। ସୂଚନା ଥାଉକି,ଭୋଗରାଇ କଂଗ୍ରେସ ପକ୍ଷରୁ ମଧ୍ୟ ଧାନ କିଣାର ସମସ୍ୟାକୁ ନେଇ ସମ୍ବାଦିକ ସମ୍ମିଳନୀ ହୋଇଥିଲା । ଚାଷୀଙ୍କ ଠାରୁ ସବୁ ଧାନ ନକିଣିଲେ ଆନ୍ଦୋଳନ ହେବ ବୋଲି ଚେତାବନୀ ଦେଇଥିଲା କଂଗ୍ରେସ।
