ରାଉରକେଲା,୧୫/୦୬: ସୁନ୍ଦରଗଡ଼ ଜିଲ୍ଲାର କେ.ବଲାଙ୍ଗଠାରେ ବିସ୍ଫୋରକ ଲୁଟ୍ ଘଟଣାରେ ରାଉରକେଲା ଜିଲ୍ଲା ପୁଲିସ ଆଜି ଜଣେ ଇନଫର୍ମରକୁ ଗିରଫ କରିଛି । ଗିରଫ ଅଭିଯୁକ୍ତ ହେଲେ କେ. ବଲାଙ୍ଗ ଥାନା ଅଧୀନ ବଙ୍କୋ ଅଞ୍ଚଳର ଜର୍ଜ ମୁଣ୍ଡା (୪୩ ବର୍ଷ)। ଏହି ଘଟଣାରେ ଓଡ଼ିଶା - ଝାଡ଼ଖଣ୍ଡ ସୀମାନ୍ତରୁ ୩ କେଜି ୮୧୧ ଗ୍ରାମ ବିସ୍ଫୋରକ ଉଦ୍ଧାର କରାଯାଇଥିବା ଆଜି ଏସପି କାର୍ଯ୍ୟଳୟରେ ଡିଆଇଜି ବ୍ରିଜେଶ ରାୟ, ଏସପି ନୀତେଶ ୱାଧ୍ୱୱାନି ସୂଚନା ଦେଇଛନ୍ତି।
ସୂଚନା ଅନୁସାରେ, ଗତ ମାସ ୨୭ ତାରିଖ ଦିନ ଇତିମା ଗୋଦାମରୁ ପ୍ରାୟ ୪ଟନ୍ ବିସ୍ଫୋରକ ଧରି ବାଙ୍କୋ ପଥର ଖଣିକୁ ଯାଉଥିଲା। ଏହି ସମୟରେ ବାଙ୍କୋ ଅଞ୍ଚଳ ନିକଟରେ ଅଚାନକ ୧୦ରୁ ୧୫ଜଣ ନିଜକୁ ମାଓବାଦୀ କହି ଉକ୍ତ ଗାଡ଼ିକୁ ଅଟକାଇ ସରଣ୍ଡା ଜଙ୍ଗଲ ଆଡ଼କୁ ନେଇଯାଇଥିଲେ। ସେଠାରୁ ଚାଳକକୁ ଧମକାଇ ଗାଡିରୁ ୨୦୦ ପ୍ୟାକେଟ ବିସ୍ଫୋରକ ଲୁଟ୍ କରି ଜଙ୍ଗଲକୁ ଚାଲି ଯାଇଥିଲେ। ଘଟଣା ସାମ୍ନାକୁ ଆସିବା ପରେ ଏସଆଇଟି ଟିମ୍ ଗଠନ ହୋଇ ଏହାର ତଦନ୍ତ କରିଥିଲା। ତଦନ୍ତ ବେଳେ ବାଙ୍କୋ ଖଣି ଅଞ୍ଚଳରେ ରହୁଥିବା ଜର୍ଜ ଏଥିରେ ସମ୍ପୃକ୍ତି ଥିବା ଜଣାପଡିଥିଲା। ପରେ ତାକୁ ପୁଲିସ ଉଠାଇ ଆଣି ପଚରାଉଚରା ବେଳେ ସେ ସ୍ବୀକାର କରିଥିଲା। ସେ ଉକ୍ତ ଖଣିକୁ ବିରୋଧ କରି ଆସୁଥିଲା ଓ ମାଓବାଦୀଙ୍କ ସମ୍ପର୍କରେ ଥିଲା। ଲୁଟ୍ ପାଇଁ ସମସ୍ତ ସୂଚନା ଦେଇଥିଲା । ପରେ ତଦନ୍ତ କରି ୩ କେଜି ୮୧୧ ଗ୍ରାମ ବିସ୍ଫୋରକ ଜବତ କରାଯାଇଛି। ଏଥିସହ ଏଥିରେ ଅନ୍ୟ କେହି ସଂପୃକ୍ତ ସେନେଇ ଇନଫର୍ମର ଜର୍ଜଙ୍କୁ ପଚରାଉଚରା କରୁଛି।
