ଧବଳେଶ୍ୱର, ୨୯।୭: ପବିତ୍ର ଶ୍ରାବଣ ମାସର ଦ୍ୱିତୀୟ ସୋମବାର ଚଳଚଞ୍ଚଳ ଆଠଗଡ଼ର ପ୍ରସିଦ୍ଧ ଶୈବପୀଠ ବାବା ଧବଳେଶ୍ଵରଙ୍କ ପୀଠ । ରାତି ୪ଟାରୁ ପହଡ଼ ଖୋଲାଜାଇ ୧୦୮ ଗରା ସୁବାସିତ ଜଳରେ ବାବା ଧବଳେଶ୍ୱରଙ୍କୁ ସ୍ନାନ ପରେ ସମସ୍ତ ନିତୀକାନ୍ତି କରାଯାଇ ସାଧାରଣ ଦର୍ଶନ ସହିତ ଜଳଲାଗି ପାଇଁ ଦ୍ଵାର ଫିଟାଯାଇଥିଲା । ବାବା ଧବଳେଶ୍ୱରଙ୍କ ପୀଠକୁ ସଂଯୋଗ କରୁଥିବା ସ୍ଥାୟୀ କଂକ୍ରିଟ୍ ସେତୁ ଦେଇ ଶ୍ରାବଣୀ ଲିଙ୍ଗରେ ଜଳଲାଗି କରିଛନ୍ତି ହଜାର ହଜାର କାଉଡ଼ିଆ । 

ପ୍ରଶାସନ ପକ୍ଷରୁ ବ୍ୟାରିକେଟ୍ ବ୍ୟବସ୍ଥା କରାଯିବା ସହ ଭିଡ଼କୁ ଦୃଷ୍ଟିରେ ରଖି ପୀଠ ମଧ୍ୟକୁ ବାହୁଙ୍ଗିକୁ ସମ୍ପୁର୍ଣ୍ଣ ବାରଣ କରାଯାଇଛି ।  କଂକ୍ରିଟ ସେତୁ ପୂର୍ବରୁ କାଉଡ଼ିଆମାନେ ବାହୁଙ୍ଗି ରଖି କେବଳ ଜଳ କଳସ ଧରି ପୀଠ ଭିତରକୁ ପ୍ରବେଶ କରି ବାବା ଧବଳେଶ୍ୱରଙ୍କ ଶ୍ରାବଣୀ ଲିଙ୍ଗରେ ଜଳ ଲାଗି କରିଛନ୍ତି । ଚଳିତ ବର୍ଷ ପ୍ରଶାସନ ଓ ପୂଜକ ସମିତି ପକ୍ଷରୁ ପ୍ଲାଷ୍ଟିକ କଳସୀ ବା ଗଡ଼ୁକୁ ପୀଠ ମଧ୍ୟକୁ ବାରଣ କରାଯାଇଛି କେବଳ ମାଟି କିମ୍ବା ପିତଳ ଓ ତମ୍ବା କଳସରେ ଜଳ ଆଣିବା ପାଇଁ ନିମନ୍ତେ କୁହାଯାଇଛି । ଭିଡ଼କୁ ଦୃଷ୍ଟିରେ ରଖି ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି ।