ଭୁବନେଶ୍ବର: ଶରୀରକୁ ଡିଟକ୍ସ (detox) ବା ବିଷ ମୁକ୍ତ କରିବା ବହୁତ ଜରୁରି । ଭୀଷଣ ଗରମ ଅନୁଭୂତ ହେଉଥିବା ବେଳେ ଲୋକେ ନିଜ ଶରୀରକୁ ଡିଟକ୍ସ କରିବା ଲାଗି ଭିନ୍ନ ଭିନ୍ନ ମିଶ୍ରଣ ପାନ କରୁଥିବା ଦେଖିବାକୁ ମିଳେ । ସେହିଭଳି ଲୋକମାନେ ସ୍କିନ୍ (ଚର୍ମ)କୁ ଡିଟକ୍ସ କରନ୍ତି । ଅର୍ଥାତ ଚର୍ମରେ ଲାଗିଥିବା ମଇଳା, ଡେଡ୍ ସ୍କିନ୍ ଆଦିକୁ ବାହାର କରାଯାଏ । ଏହା ଦ୍ବାରା ତ୍ବଚା ରୋଗମୁକ୍ତ ହେବା ସହ ଗ୍ଲୋ କରେ । ଠିକ ସେହିଭଳି ପାଦର ଯତ୍ନ ନେବା ବା ପାଦକୁ ଡିଟକ୍ସ କରିବା ବହୁତ ଜରୁରି ।
ପ୍ରବଳ ଗରମରେ ପାଦରେ ଝାଳ ହେବା ସହ ମଇଳା ଜମିଥାଏ । ଏହା ଦ୍ବାରା ପାଦରୁ ଦୁର୍ଗନ୍ଧ ବାହାରିବା ସ୍ବଭାବିକ । ସେହିଭଳି ଲମ୍ବା ସମୟ ଧରି ଛିଡ଼ା ହୋଇ କାମ କରିବା, ଧାଁ ଧପଡ଼ କରିବା ଫଳରେ ପାଦରେ ଯନ୍ତ୍ରଣା ଅନୁଭୂତ ହୋଇଥାଏ । ତେଣୁ ପାଦକୁ ଡିଟକ୍ସ କରିବା ଭଲ ବୋଲି କୁହାଯାଏ । କେବଳ ପାଦକୁ ସଫା କରିଦେଲେ ହେବନାହିଁ ଫୁଟ୍ ଡିଟକ୍ସ ପଦ୍ଧତି ଆପଣାଇବା ଭଲ । ପାର୍ଲର ଯାଇ ପାଦକୁ ଡିଟକ୍ସ କରିପାରିବେ । ନଚେତ ଘରେ ଥିବା କେତେକ ଉପକାରୀ ପଦ୍ଧତିରେ ପାଦକୁ ଡିଟକ୍ସ କରାଯାଇପାରେ ।
ଘରେ ପାଦକୁ କେମିତି କରିବେ ଡିଟକ୍ସ ?
ଘରେ ପାଦକୁ ଡିଟକ୍ସ କରିବା ଲାଗି ଏକ ପାତ୍ରରେ ଉଷୁମ ପାଣି ନିଅନ୍ତୁ । ଏଥିରେ ଦୁଇ ଚାମଚ ଆପଲ୍ ଭିନେଗାର, ୨-୪ ଡ୍ରପ୍ ସୁଗନ୍ଧିତ ତୈଳ, ସି-ସଲ୍ଟ ପକାଇ ଏହାକୁ ଭଲ ଭାବରେ ମିଶାଇ ଦିଅନ୍ତୁ । ଏହି ମିଶ୍ରଣରେ ୧୦-୨୦ ମିନିଟ ପର୍ଯ୍ୟନ୍ତ ଦୁଇ ପାଦକୁ ବୁଡ଼ାଇ ରଖନ୍ତୁ । ଏହା ପରେ ପାଣିରୁ ପାଦକୁ ବାହାର କରି ଭଲ ଭାବରେ ଟାଓ୍ବାଲ୍ରେ ପୋଛିଦିଅନ୍ତୁ । ଏହା ପରେ ପାଦରେ ମଇଶ୍ଚରାଇଜର ଲଗାଇ ଦିଅନ୍ତୁ । ଆପଣ ଚାହିଁଲେ ସ୍କ୍ରବ୍ ବି କରିପାରିବେ । ଏହା ଦ୍ବାରା ପାଦରେ ଥିବା ଡେଡ୍ ସ୍କିନ ବାହାରିଯିବ । ହାଲକା ଗରମ ପାଣିରେ ରକ୍ ସଲ୍ଟ (ସନ୍ଧୈବ ଲବଣ) ପକାଇ ପାଦକୁ ଧୋଇପାରିବେ । ଏହା ଦ୍ବାରା ପାଦରେ ହେଉଥିବା ଯନ୍ତ୍ରଣାରୁ ମୁକ୍ତି ମିଳିବ ।
ପାଦ ଡିଟକ୍ସ କରିବାର ଫାଇଦା
ଫୁଟ୍ ଡିଟକ୍ସ କରିବା ଦ୍ବାରା ଯେ କେବଳ ପାଦ ସଫା ହୁଏ ତାହା ନୁହେଁ ବରଂ ଆପଣଙ୍କ ଥକାପଣ ଦୂର ହୋଇପାରେ । ଗରମ ପାଣିରେ ପାଦକୁ ବୁଡ଼ାଇବା ଦ୍ବାରା ଆପଣଙ୍କୁ ରିଲାକ୍ସ ଲାଗିବ । ରାତିରେ ପାଦକୁ ଡିଟକ୍ସ କଲେ ଭଲ ନିଦ ହୋଇଥାଏ । ଡିଟକ୍ସ ସମୟରେ ଫୁଟ୍ ମସାଜ୍ କଲେ ମଧ୍ୟ ରକ୍ତ ସଂଚାଳନ ଭଲ ଭାବେ ହୋଇଥାଏ । ଖରାଦିନେ ଅଧିକ ଝାଳ ବାହାରୁଥିବାରୁ ଜୋତାରୁ ଦୁର୍ଗନ୍ଧ ବାହାରିଥାଏ । ନିୟମତି ଭାବରେ ଫୁଟ୍ ଡିଟକ୍ସ କରିବା ଦ୍ବାରା ଏହି ସମସ୍ୟା ଦୂର ହୋଇଥାଏ ।