ନୂଆଦିଲ୍ଲୀ: ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ନିଜସ୍ବ ସାଟେଲାଇଟ୍ ବ୍ୟବହାର କରି ମହାକାଶରୁ ମହାକୁମ୍ଭ ମେଳାର ଫଟୋ ଉତ୍ତୋଳନ କରିଛି । ଉତ୍ତର ପ୍ରଦେଶର ପ୍ରୟାଗରାଜରେ ଆୟୋଜିତ ବିଶ୍ବର ସବୁଠାରୁ ବଡ଼ ଧାର୍ମିକ ସମାଗମ ମହାକୁମ୍ଭ ମେଳାର ଏହି ଫଟୋ ଏବେ ଜାରି କରିଛି ଇସ୍ରୋ । ଏହି ଫଟୋରୁ ଜଣାପଡ଼ିଛି, କୁମ୍ଭ ମେଳାରେ ବଡ଼ ଧରଣର ନିର୍ମାଣ କାର୍ଯ୍ୟ କରାଯାଇଛି । ୪୫ ଦିନର ଏହି ମେଳାରେ ୪୦ କୋଟିରୁ ଅଧିକ ଲୋକଙ୍କ ସମାଗମକୁ ନଜରରେ ରଖି ରାଜ୍ୟ ସରକାର କେଉଁଭଳି ଭାବରେ ପ୍ରସ୍ତୁତି କରିଛନ୍ତି ତାହା ସ୍ପଷ୍ଟ ଭାବେ ଦେଖାଯାଉଛି ।
ହାଇଦ୍ରାବାଦର ଜାତୀୟ ରିମୋଟ ସେନ୍ସିଂ ସେଣ୍ଟର ଦ୍ବାରା ବିକଶିତ ରାଡାରସାଟ୍ ସାଟେଲାଇଟରୁ ଏହି ଫଟୋ ଉଠାଯାଇଛି । ଅସ୍ଥାୟୀ ଭାବରେ ତିଆରି କରାଯାଇଥିବା ଏକ ବିଶାଳ ସହରକୁ ଦେଖିବାକୁ ମିଳିଛି । ମେଳା ଲାଗିବା ପୂର୍ବରୁ ଏବଂ ପରେ, ଟେଣ୍ଟ ସିଟିର ସ୍ଥିତି ଜାଣିବାକୁ ମିଳିଛି ଏହି ସାଟେଲାଇଟ୍ ଉତ୍ତୋଳିତ ଫଟୋରୁ । ସବୁ ପ୍ରକାର ପାଣିପାଗରେ ଫଟୋ ଉଠାଇବାକୁ ପାରଙ୍ଗମ ଏହି ସାଟେଲାଇଟ୍ ବିଭିନ୍ନ ସମୟରେ ଏହି ପ୍ରୟାଗରାଜର ଅସ୍ଥାୟୀ ଟେଣ୍ଟ ସିଟିର ଫଟୋ ଉତ୍ତୋଳନ କରିଛି ।
ଟେଣ୍ଟ, ଅସ୍ଥାୟୀ ବ୍ରିଜ୍ ଏବଂ ଅନ୍ୟ ନିର୍ମାଣକୁ ଏହି ଫଟୋରେ ଭଲ ଭାବେ ଦେଖିବାକୁ ମିଳିଛି । ପ୍ରଥମେ ଏପ୍ରିଲ ୬, ୨୦୨୪ରେ ଫଟୋ ନିଆଯାଇଥିଲା । ସେତେବେଳେ ପ୍ରୟାଗରାଜର ପରେଡ ଗ୍ରାଉଣ୍ଡରେ ଅଳ୍ପ କିଛି ନିର୍ମାଣ ଦେଖାଯାଉଥିଲା । ହେଲେ ଏହା ପରେ ଡିସେମ୍ବର ୨୨, ୨୦୨୪ରେ ଉତ୍ତୋଳିତ ଫଟୋରେ ମହାକୁମ୍ଭ ମେଳା ଲାଗି ଏକ ବିଶାଳ ଅସ୍ଥାୟୀ ସହର ବସି ସାରିଥିଲା । ଜାନୁଆରୀ ୧୦ ବେଳକୁ କୋଟି କୋଟି ଲୋକଙ୍କ ଗହଳି ଆରମ୍ଭ ହୋଇଯାଇଥିଲା । ତେବେ ଇସ୍ରୋ ପକ୍ଷରୁ ସେୟାର କରାଯାଇଥିବା ଫଟୋଗୁଡ଼ିକରୁ ଏହା ସ୍ପଷ୍ଟ ହୋଇଛି ଯେ, ଧର୍ମ ଏବଂ ପ୍ରଯୁକ୍ତିର ମିଳନ ଫଳରେ ଏକ ସୁନ୍ଦର ଭବିଷ୍ୟତର ନିର୍ମାଣ କରାଯାଇପାରେ । ଏହା କହିଛନ୍ତି କେନ୍ଦ୍ର ବିଜ୍ଞାନ ଓ ପ୍ରଯୁକ୍ତି ରାଷ୍ଟ୍ର ମନ୍ତ୍ରୀ ଜିତେନ୍ଦ୍ର ସିଂହ ।
