ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରତି ଘୋଷଣା କରିବା ପରେ ୱାଶିଂଟନ ସମେତ ସମଗ୍ର ବିଶ୍ୱ ଆଶ୍ୱସ୍ତିର ନିଶ୍ୱାସ ମାରିଛି । ବର୍ତ୍ତମାନ ଯୁଦ୍ଧବିରତି ହୋଇଥିଲେ ମଧ୍ୟ ଆମେରିକୀୟ ଗୁଇନ୍ଦା ସଂସ୍ଥାଗୁଡ଼ିକର ଏକ ରିପୋର୍ଟ ଚିନ୍ତା ବଢ଼ାଇଛି । ରିପୋର୍ଟରୁ ଜଣାପଡ଼ିଛି ଯେ, ଏହି ଯୁଦ୍ଧବିରତି ଟ୍ରମ୍ପଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇପାରେ। ଦି ଟେଲିଗ୍ରାଫ ୟୁକେର ଏକ ରିପୋର୍ଟ ଅନୁଯାୟୀ, ସୁରକ୍ଷା ବିଶେଷଜ୍ଞମାନେ ବିଶ୍ୱାସ କରୁଛନ୍ତି ଯେ, ଇରାନ ସ୍ଲିପର ସେଲଙ୍କ ଜରିଆରେ ଆମେରିକା ମାଟିରେ କିଛି ବଡ଼ କରିପାରେ । ଏହା ଟ୍ରମ୍ପ ସମେତ ସମଗ୍ର ବ୍ୟବସ୍ଥା ପାଇଁ ଏକ ସତର୍କ ସଙ୍କେତ ।
ଏହି ସ୍ଲିପର ସେଲ୍ ସାଧାରଣ ମଣିଷ ଭଳି ଜୀବନଯାପନ କରିଥାନ୍ତି ଏବଂ ଯେକୌଣସି ସମୟରେ ସକ୍ରିୟ ହୋଇପାରନ୍ତି । ସେମାନେ ଚାକିରି କରନ୍ତି, ସମାଜ ସହିତ ମିଶିଯାଆନ୍ତି କିନ୍ତୁ ପ୍ରକୃତରେ ସେମାନେ କୌଣସି ବିଦେଶୀ ଏଜେନ୍ସି ସହିତ ଜଡିତ । ସବୁଜ ସଙ୍କେତ ପାଇବା ମାତ୍ରେ, ସେମାନେ ଯେକୌଣସି ରଣନୈତିକ ଲକ୍ଷ୍ୟସ୍ଥଳକୁ ଆକ୍ରମଣ, ବ୍ଲାକମେଲ୍ କିମ୍ବା କ୍ଷତି ପହଞ୍ଚାଇ ପାରନ୍ତି । ରିପୋର୍ଟରେ ପ୍ରକାଶ ପାଇଛି ଯେ, ଇରାନ ଏଜେଣ୍ଟମାନେ ଆମେରିକୀୟ ସହରଗୁଡ଼ିକରେ ଲୁଚି ରହିଛନ୍ତି। ଏହି ଏଜେଣ୍ଟମାନେ ଇରାନ କିମ୍ବା ଅପରାଧିକ ନେଟୱାର୍କ ମାଧ୍ୟମରେ ସେମାନଙ୍କର ମିଶନ ପୂରଣ କରିବାକୁ ଅପେକ୍ଷା କରିଛନ୍ତି ।
ଅତୀତରେ ଏପରି ଅନେକ ଅପରେସନ ଧରାପଡ଼ିଛି । ଇରାନର ଏଜେଣ୍ଟମାନେ ହତ୍ୟା କିମ୍ବା ଅପହରଣ କରିବାକୁ ଚେଷ୍ଟା କରି ଧରାପଡ଼ିଛନ୍ତି । ରିପୋର୍ଟ ଅନୁସାରେ, ଏହି ଏଜେଣ୍ଟମାନେ ଆମେରିକା ଭିତରେ ସାଇବର ଆକ୍ରମଣ ଏବଂ ଡ୍ରୋନ ଆକ୍ରମଣ ପାଇଁ ମଧ୍ୟ ପ୍ରସ୍ତୁତ ହେଉଛନ୍ତି। କିଛି ଆମେରିକୀୟ ନାଗରିକ କିମ୍ବା ଇରାନ ବଂଶୋଦ୍ଭବଙ୍କୁ ଏଥିପାଇଁ ବ୍ୟବହାର କରାଯାଇପାରେ । ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜେ ଦାବି କରିଛନ୍ତି ଯେ, ବାଇଡେନ ସରକାରଙ୍କ ସମୟରେ ସୀମା ସୁରକ୍ଷା ଦୁର୍ବଳ ଥିଲା ଏବଂ ଏହାର ସୁଯୋଗ ନେଇ ଅନେକ ଇରାନ ଏଜେଣ୍ଟ ଆମେରିକାରେ ପ୍ରବେଶ କରିଛନ୍ତି । ସେ ଏହି 'ସ୍ଲିପର ସେଲ୍' ବିଷୟରେ କଡ଼ା ଚେତାବନୀ ଦେଇଛନ୍ତି। ଦି ଟେଲିଗ୍ରାଫର ଏକ ରିପୋର୍ଟ ଅନୁଯାୟୀ, ସୀମାରେ ୧୫୦୦ ରୁ ଅଧିକ ଇରାନ ନାଗରିକ ଧରାପଡ଼ିଥିଲେ । ବିଶେଷଜ୍ଞମାନଙ୍କ ଅନୁସାରେ, ଏହି ଏଜେଣ୍ଟଙ୍କ ସଂଖ୍ୟା ପ୍ରକୃତ ସଂଖ୍ୟା ଠାରୁ ବହୁତ ଅଧିକ ହୋଇପାରେ।
